Jeremías
Templu punkucho Jeremías wilakushqan
7 Jeremíastami TAYTA DIOS kayno nirqan: 2 “Templu punkuman aywaykur kayno wilakuy: ‘TAYTA DIOSTA adoraq kay punkupa yaykuq Judá runakuna, TAYTA DIOS nishqanta mayapäkuy. 3 Israel runakunata kuyaq y lapanta mandaq TAYTA DIOS kaynömi nin: Shumaq tantiyakushpayki yätsishqäno kawapäkuy. Cäsukamaptikiqa kay nacionnikicho imaypis jawka kawanaykipaqmi yanapashayki. 4 Ama criyipäkuytsu runakuna yaparir yaparir kayno nishuptiki: “¡TAYTA DIOSPA templun kaycho kaykaptinqa imaypis tsapämäshunmi!”
5 “ ‘Kay nacionnikicho imaypis jawka kawapäkunaykipaq lutan ruraykunata kacharir alikunata rurapäkuy. Runa mayikita ali rikapäkuy. 6 Jäpa runakunata, waktsakunata y viüdakunata ama nakatsipäkuytsu. Ali runakunata ama wanutsipäkuytsu. Juk dioskunatapis ama adorapäkuytsu. Tsaykunata adoraptikiqa desgraciami pasashunkipaq. 7 Yätsishqäno kawaptikiqa kay nacionnikicho jawkala kawanaykipaqmi imaypis yanapashayki. Kay naciontaqa unay ayluykikunatami qoykurqä kaycho imayyaqpis tänanpaq.
8 “ ‘Lulapäshushqaykita criyirmi qamkunaqa yarparkaykanki templü kaycho kashqanpita imaypis mana castiganäpaq kashqanta. Tsaytaqa ama criyipäkuytsu. 9 Qamkunaqa suwakurkaykanki, runa mayikita wanurkaykätsinki, jukpa majanwan karkaykanki, lulakur jurarkaykanki y inciensuwan *Baaltapis qoshtarkaykätsinki. Tsaynölami wakin dioskunatapis adorarkaykanki. Tsay dioskunataqa unay ayluykikuna imaypis manami adorapäkurqantsu.
10 “ ‘Tsayno rurarkurpis cärayki kanraq templüman shamur jutïta joqarishpayki adoramänaykipaq. Qamkunaqa yarparkaykanki lutanta rurarkurpis kay templuman shamuptikiqa mana castiganäpaq kashqantami. 11 Kay adoramänaykipaq templuqa ¿suwakunapa machaynin kashqantaku yarparkaykanki?* Imata rurashqaykitapis lapantami rikashqä. Noqa TAYTA DIOSMI tsayno nï.
12 “ ‘Maski Silo markaman* aywapäkuy imano kashqantapis rikamunaykipaq. Tsay markata tänäpaq akrashqa karpis tsaycho taqkuna jutsata rurar rabyanätsimaptinmi ushakätsishqä. 13 Qamkunapis lutan rurayta kacharinaykipaq niptïpis manami cäsukärinkitsu. Mayjina parlapaptïpis manami mayamankitsu. Tsayno kashqaykipitami* 14 Silo markata ushakätsishqäno kay yärakushqayki templutapis ushakätsishaq. Tsayno ushakätsishaq kaycho adoramänaykipaq qamkunata y unay ayluykikunata qoykushqa kaykarpis. 15 Efraín runakunata nacionninpita qarqushqänömi qamkunatapis nawpäpita qarqushayki juk lädu nacionchöna tänaykipaq’.
Ïdulukunata Israel runakuna adorashqan
16 “Jeremías, kay runakunapa favornin ama manakamaytsu. Yaparir yaparir manakamaptikipis manami mayashaykitsu. 17 ¿Manaku rikanki Judá markakunacho y Jerusalén cällikunacho runakuna imano rabyanätsimashqantapis? 18 Jana patsacho kaykaq reina nishqan diösapaq* mikuyta rurananpaqmi wamrakuna yantata shuntapäkun. Taytankunami ninata ratatsipäkun. Warmikunanami tantata masarapäkun. Jäpa runakuna adorashqan wakin dioskunapaqpis vïnutami jicharkaykan. Tsayta rurarmi fiyupa rabyatsiman. 19 Tsayno rabyanätsimarmi kikinkuna penqaycho karkaykan.
20 “Tsaymi kayno nï: Pasaypa rabyarmi kay templuta ushakätsishaq. Nina bunyaypa bunyar imatapis ushashqannömi runakunatapis, uywakunatapis, yörakunatapis y mikuykunatapis chipyaq ushakätsishaq”.
Sacrificiuta rupatsinanpa trukan cäsukärinanta Tayta Dios munashqan
21 Israel runakunata kuyaq y lapanta mandaq TAYTA DIOS kaynömi nin: “Rupatsina sacrificiuta noqapaq rupatsishqaykita manami chaskishaqnatsu. ¡Tsay aytsataqa wakin sacrificiutano qamkunala mikapäkuy! 22 Unay ayluykikunata Egiptupita jorqamushpä manami nirqätsu rupatsina sacrificiuta ni ima sacrificiutapis *altarcho rupatsipäkunanpaq.* 23 Tsaypa trukanqa kaynömi nirqä: ‘Nishqäta cäsukamaptikiqa noqami qamkunapa Diosniki kashaq. Qamkunami kuyashqä runakuna kankipaq. Noqa munashqäno kawaptikiqa lapan rurashqaykipis alimi kanqapaq’.*
24 “Tsayno niptïpis paykunaqa nishqäkunata manami wiyakärimarqantsu ni cäsukärimarqantsu. Tsaypa trukanqa shonqun munashqanta rurarmi lutankunata rurapäkurqan. Munashqäno kawananpa trukanqa qonqaykamarqanmi.
25 “Tsaynöpis unay ayluykikunata Egiptupita jorqamushqä junaqpita patsami sirvimaqnï profëtakunata imaypis kachamushqä. 26 Tsayno kaptinpis manami cäsukamashqankitsu. Tsaypa trukanqa unay ayluykikunapitapis mas peormi mana cäsukuq rikakärishqanki.
Ïduluta adorashqanpita Tayta Dios rabyakushqan
27 “Jeremías, runakuna mana cäsushuptikipis nishqäkunata wilapay. 28 Wilakur kayno ninki: ‘Kay nación runakunaqa kuyashqan TAYTA DIOS nishqanta manami cäsukärintsu. Olqüpaptinpis manami chaskikärintsu. Tayta Dios munashqanno kawananpaq promitishqantapis manami cumplipäkuntsu ni cumplinanpaq rimakuylapis rimakärintsu. 29 ¡Lakikärishpayki aqtsaykita rutukäriy! ¡Chunyaq jirkaman aywaykur waqay waqayta cantapäkuy! TAYTA DIOS fiyupa rabyashpan mananami yanapashunkipaqnatsu. Manami rikaytapis munashunkipaqnatsu’ ”.
30 TAYTA DIOSMI kayno nin: “Judá runakunaqa adoramänan templüta mana respitarmi mana väliq ïdulunkunata churapäkushqa. Tsayno jutsata rurarmi fiyupa rabyanätsimashqa. 31 Tsaynölami Ben-Hinom raqracho kaykaq Tofet nishqancho *altarkunata perqapäkushqa* olqutapis warmitapis tsurinkunata rupatsipäkunanpaq.* Tsayta rurananpaq noqa manami nirqätsu ni yarpaylapis yarparqätsu”.
32 Tsaymi TAYTA DIOS kayno nin: “Castiganä junaq chayamuptin tsay raqrata manami Tofet jutiwantsu ni Ben-Hinom jutiwantsu reqipäkunqa, sinöqa Wanutsinakuy Raqra jutiwanmi reqipäkunqa.* Ayakunata pampananpaq sitiu mana jäkuptinmi Tofetmanna pampapäkunqa. 33 Tofetchöpis pampapäkunanpaq manana kaptinmi pampänilana ayakuna jitarpanqa. Tsay ayakunatami wiskulkuna y jirka uywakuna mikunqa. Washänalanpaqpis manami pipis kanqatsu.
34 “Tsayno castigaptïmi kay intëru nación chunyaq rikakunqa. Tsaymi Judá nacioncho kaq markakunacho y Jerusalén cällikunacho runakuna kushikushqan ni asikushqanpis mana mayakanqanatsu. Casaray fiestapis manana kaptinmi ni mözupis ni jipashpis cantapänakunqanatsu”.*