Salmos
Fiyu runakunata Tayta Dios juzgananpaq kashqan
94 TAYTA DIOS, contraykikunata castigaq kaykarqa yanapaykalämay.
2 Kay patsacho lapan runakunata juzgaq juezmi kaykanki.
Orgullösu runakunata juzgar castigaykulay.
3 TAYTA DIOS, ¡imayyaqraq fiyu runakuna kushipaykämanqa!
4 ¡Imayyaqraq jutsata rurashqanpita alabakur purirkaykanqa!
¡Imayyaqraq runa tukärinqa!
5 TAYTA DIOS, paykunaqa kuyashqayki runakunatami makitsakärin.
Herenciaykipaq akrashqayki runakunatami nakatsipäkun.
6 Viüdakunata, jäpakunata y waktsakunatami wanutsipäkun.
7 Paykunaqa kaynömi nin:
“TAYTA DIOS manami rikantsu.
Jacob yärakushqan Dios manami cuentatapis qokuntsu”.
8 Mana tantiyakuq upa runakuna, ¿imanirtaq mana tantiyakärinkitsu?
¡Imayraq tantiyapäkunki Tayta Dios munayniyuq kashqanta!
9 Rinritapis ruraykarqa ¿manatsuraq mayamäshun?
Nawitapis ruraykarqa ¿manatsuraq rikamäshun?
10 Juk lädu nacionkunacho taqkunatapis castigaykarqa ¿manatsuraq qamkunatapis castigashunkipaq?
Runakunata yachatsinanpaq lapantapis musyaykarqa ¿manatsuraq rurashqaykitapis musyan?
11 Tayta Dios musyaykanmi runakuna manakaqkunata yarpapäkushqanta.*
12 TAYTA DIOS, kushishqami kawanqa corrigishqayki runa.
Kushishqami kawanqa leynikikunata yachatsishqayki runa.
13 Tsay runaqa desgracia pasaptinpis jawkalami kawanqa.
Fiyu runakunami itsanqa manaraqpis aykälata ushakanqa.
14 Kuyashqan runakunataqa TAYTA DIOS manami imaypis kachanqatsu.
Payman yärakuq runakunataqa imaypis yanapanmi.
15 Juezkunapis shumaqnami runakunata arreglapäkunqa.
Tsayno juzgaptinqa ali runakunapis kushikärinqami.
16 Fiyu runakuna conträ sharkuptin ¿pilaraq favornï sharkunqa?
Lutan ruraq runakuna conträ sharkuptin ¿pilaraq yanapamanqa?
17 TAYTA DIOS mana yanapamaptinqa maynami ushakäman karqan.
18 TAYTA DIOS, ima ruraytapis mana kamäpakurmi yanapamänaykipaq manakushqä.
Kuyapäkuq karmi yanapamashqanki.
19 Pasaypa lakishqa kaykaptïmi imaypis shakyätsimashqanki.
20 ¿Mana ali juezkunapa amïgun kankimantsuraq?
Paykunaqa leykunata mana cäsurmi runakunata nakatsipäkun.
21 Paykunaqa jutsaynaq runakunapa contran sharkunanpaqmi wilanakärin.
Tsaynölami ali runakunata wanutsinanpaqpis “wanutsiy” nipäkun.
22 Tsayno kaptinpis TAYTA DIOSMI noqataqa tsapäman.
Amparakunä qaqami pay kaykan.
23 Fiyu runakunataqa paymi castiganqa.
TAYTA DIOSNINTSIMI paykunata ushakätsinqa.