¿Bibliapa yachachicuynincunaga tincunchu cientificucuna nishganwan?
¿Ima nintaj Biblia?
Bibliaga manami parlanchu cienciapita, chayno captinpis yachachicuynincuna tincunmi cientificucuna nishganwan. Chaymi Bibliapa waquilan yachachicuynincunata yachacurcushun, y nircur ricärishun runacuna nipäcushganwan imano tincushganta.
Jana pachata y cay pachatapis Dios camashga (Génesis 1:1). Waquin runacuna creipäcunchu imapis mana caycaptinmi Dios lapanta camashganta, paycunaga nipäcun caj Pacha y jana pachacho caycajcunapis yurimushga imapis caycaptinna. Babilonio runacuna creipäcoj ishcay jatun mayucunapita diosnincuna yargamur cay lapanta rurashganta. Waquincunana nipäcun cay Pacha jatuncaray runtupita yurimushga.
Dios leycunata churashga lapanpis imano cananpaj (Job 38:33; Jeremías 33:25). Waquincuna yachachipäcun lapanpis jucpa maquincho caycashganta y manashi musyanchichu imata pasamänanchitapis.
Cay Pachaga warcushga caycan imapis mana cashganmanmi (Job 26:7). Unay caj runacunaga creipäcurgan cay Pacha juc pampano carmi pipis jegarcunanpaj y jatuncaray uywacunapa janancho caycashgantapis nipäcurgan.
Mayucunapa y lamarpa yacuga shanaywan pucutayman ticrarcun, nircur Dios tamyachimun cay pachacho mayucuna y puquiucuna cananpaj (Job 36:27, 28; Eclesiastés 1:7; Isaías 55:10; Amós 9:6). Unay griego runacunaga yarpapäcoj lamarpa rurinpita yacu yargamushganta. Pero tiempuwanga jucnopana yarpapäcurgan.
Unay puntacunata y jircacunatapis yacuwanmi Dios chapacurcushga, nircur yurirgan puntacuna y ragracunapis (Salmo 104:6, 8). Pero waquincunaga nipäcun canan wichan puntacunataga diosnincunash camargan.
Saludninchita cuidanapaj leycunaga yanapämanchimi. Diospa leynincuna niycargan pipis ayata yataycorga, maquinta jucla maylacunanpaj, contagioso gueshyawan caycajcunata wichgarächinanpaj y ishpaynincunatapis chaparcunanpaj (Levítico 11:28; 13:1-5; Deuteronomio 23:13). Egipcio runacunaga ishpaynincunata utilizargan jampita rurananpaj, nircur chaywan lashtacunanpaj.
¿Imatataj runacuna nipäcushga Bibliapita?
Waquin runacuna nipäcushga Bibliaga manami tincunchu cientificucuna nishganwan. Pero Bibliata shumaj tantiarcurga cuentata gocunchi manami chaynochu. Ricärishun runacuna imacunata nipäcurgan.
Luta yachachicuy: Diosga sojta junajlacho lapanta camargan.
Biblia yachachicun: Bibliaga nin imapis mana caycaptinmi Dios lapanta camashga (Génesis 1:1). Pero manami wilacunchu ayca horataj cargan cada junajcuna. Tantiarinapaj, Génesis 2:4 textucho “Syëluta cay pachata [Dios] camanan wichanga” niptinga, parlaycan achca watacunacho Dios chaycunata camashganta.
Luta yachachicuy: Inti manaraj captinmi jachacunata y yoracunatapis Dios camashga, pero Inti mana captinga yoracuna manami winanmanchu (Génesis 1:11, 16).
Biblia yachachicun: Bibliaga nin ‘imapis manaraq kaptinmi Tayta Dios kamarqan jana patsata’, chaycho camargan goylarcunata y Intitapis (Génesis 1:1). Galanan camanan wichanga cielo chaylaraj asulyaraycargan, pero quimsa junaj camanan wichanpäga cielo shumajna asulyaraycargan. Chaurasga alpapita winar galaycurgan tucuy niraj muruyoj jachacuna chayno tucuy niraj wayoj yoracunapis (Génesis 1:3-5, 12, 13). Nircur ricacur galaycurgan cay Pachaman Inti achicyapämushganta (Génesis 1:16).
Luta yachachicuy: Intiga Pachapa jirurojninpa tumamun.
Biblia yachachicun: Eclesiastés 1:5 nin: “Intipis yagarcamun, yagacurcun. Yapay yagarcamun yapay yagacurcun”. Cay textuga claro nin Intiga yargamun y jegacurcun, manami tumamunchu. Chaychi runacunapis nipäcun “Inti yalimaycanna” o “Inti jegarcuycanna”.
Luta yachachicuy: Pachaga manami redonducho, sinoga pampa jupuyno.
Biblia yachachicun: Biblia niptinmi “angilkuna kay patsapa chuskun kuchuncho ichirpaykaqta”, manami ninanchu cay pacha juc pampano cashganta, sinoga cayga tantiachicun cay Pacha imano rurashga caycan. Bibliaga claro nin cay Pacha redondo cashganta (Apocalipsis 7:1).