Cuyapar pitapis yachachicuycäshunla

1. ¿Imatataj yachacushcanchi 2023 wata ruracashgan reuniuncho?

¡CUSHICUYPÄMI cashga 2023 watacho ruracashgan jatun reunión!a Chay reuniunchoga achca wilacuycunami cashga predicaciunninchipita. Jucnin caj cargan ‘waquin runacunaga salvacuyta puedingaräshi shamoj tiempucho Jehová Diosta sirviyta munaptin, Jatuncaray Babilonia ushacashgana captinpis’. Jina wilacamurgan 2023 noviembre quilla galaycunanpita jucnopana informinchita ruranapaj. Pero chay wilacuycunaga manami carganchu predicaciunman alapa manana yargunapaj. Diospita yachachicunapäga masraj calpachacuycanchi canan wichan.

2. ¿Imanirtaj imaypitapis canan wichan Diospita masraj yachachicushwan? (Marcos 13:10).

² Imaypitapis canan wichanmi masraj predicananchi. Tiempuga ushacaycannami. Chaypaj parlarmi Jesuspis Marcos 13:10 (leiriy) textucho ali wilacamurgan canan wichan ima pasananpaj cajta. Chaynola Mateo libruchopis Jesús nergan Diospa ali wilacuynincuna may chaymanpis chayananpaj cajta “manaraj cay pacha ushacaptin” (Mat. 24:14). ¿Imataj ushacanga? Satanaspa gobiernuncho ricaycashganchi lapan mana alicuna. “Imay junaj imay öra” cashgantapis Jehová musyanmi (Mat. 24:36; 25:13; Hech. 1:7). Masnami chayaycanchi chay junajman (Rom. 13:11). Chaycamaga Diospita yachachicuycäshunla.

3. ¿Imanirtaj predicaciunman yargunchi?

³ Lapanchicunami cay tapucuyta ruracunanchi: ¿imanirtaj ali wilacuycunata may chaypa apanchi? Cuyacoj cashpanchimi. Predicaciunmanga yargunchi waquincunapis rasunpa cajta yachacärinanpaj, runacunata cuyarpis y Taytalanchi Jehovata y jutilantapis alabayta munarmi. Chaypita jucnin jucninta yachacushun.

RASUNPA CAJTA WILACUYTA MUNARMI PREDICACUNCHI

4. ¿Imatataj ruranchi ali wilacuycunata chasquirerga?

⁴ ¿Imanotaj ricacushcanqui pilapis ali wilacuyta wasiquiman apamushgan hora? Capaz maygan castayquipis nishushcanqui wamrayoj cananpaj, o ashiycashgan ali trabajuta tarishgantapis. Mayraj chayta wiyar cushicurishcanqui y waquincunatapis wilaparchi galaycushcanqui. Chaynolami Diospa Gobiernunpita ali wilacuyta chasquirpis, lapanchicuna mayraj cushicurcushcanchi; ‘imawanpis tincunchu’ nishcanchiraj.

5. ¿Imanotaj ricacushcanqui Bibliapita yachacushgayqui wichan? (Fotucunatapis ricay).

⁵ Yarpachacuy imanotaj ricacushcanqui Bibliapita yachacuyta galaycushgayqui wichan. Yachacushcanqui Jehová cuyashushgayquita, marcancho paylata aduranayquita munashganta, y cay mundupita lapan mana alicunata ushacächinanpaj; jina yachacushcanqui Mushoj Pachacho wanushgacunapis sharcamunanpaj o jatarimunanpäpis (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Lapan yachacushgayquega shongulayquimanchi chayashga (Luc. 24:32). Y chay lapancunata cuyarga upälalaga cacuyta munashcanquichu (Jeremías 20:9 textuwan tincuchiy).

6. ¿Imataj yachacunchi Ernest y Rose matrimoniupita?

⁶ Ernest hermanunchipita parlarcushun.b Paymi wilacun 10 watayojla caycaptin papänin wanushganta. Cayno nin: “Cutin cutinmi tapucurgä: ‘¿Cieluchoraj caycan papänë, tincushächuraj o manachuraj?’. Jucnomi ricacoj cä waquin wamracuna taytanwan carcaycajta ricar”. Cay hermanunchega cementeriuman waran waran aywarshi, papänin pamparaycashganman gongurpacur cayno mañacoj: “Taytalä Dios, wilaycalämay maychotaj caycan papänë”. 27 wataman chayashgan wichan Bibliapita yachacur galaycurgan. Ali shongulanwan chasquicurgan. Jucla tantiargan wanushgacuna punurashganola carcaycajta y shamoj tiempucho yapay cawarimunanpaj cajta (Ecl. 9:5, 10; Hech. 24:15). Chayraj yachacurgan unaypita ashiycashgan lapan tapucuynincunapa respuestanta. Amatar cushishga caycargan. Rose jutiyoj warminpis Bibliapita ganas ganasla yachacur galaycurgan, y ishcan bautizacärergan 1978 watacho. Lapan yachacärishgantaga castancunaman, amiguncunaman y pï maymanpis apapäcurganshi. Chayta rurar yanapacärishga 70 runacunano Jehovata reguir bautizacärinanpaj.

7. ¿Imataraj rurashun shongunchicho ali wilacuycuna caycaptenga? (Lucas 6:45).

⁷ Aumi, lapanchicunami shongunchicho caycashgan ali wilacuytaga pï maytapis wilapayta munanchi (leiriy Lucas 6:45). Unay cristianucunanomi ricacunchi, paycuna cayno nipäcurgan: “Rikashqäta y mayashqätaqa manami upälakärïmantsu” (Hech. 4:20). Rasunpa cajcunata alapa cuyarmi pï maytapis wilapayta munanchi.

RUNACUNATA CUYASHPANCHIMI YACHACHICUNCHI

8. ¿Imanirtaj ali wilacuycunata runacunaman apanchi? (“Cuyashpanchimi yachachicunchi” nishgan recuadruta y fotutapis ricay).

⁸ Jehovawan Jesús rurashgannolami noganchipis runacunata cuyanchi (Prov. 8:31; Juan 3:16). Shogaytami munanchi ali wilacuycunawan, achcajmi “Diosniynaq” carcaycan (Efes. 2:12). Cay mana ali munducho undicaycajnomi carcaycan, salvanapäga Diospa Gobiernunpita ali wilacuycunatami apapayta munanchi. Cuyar y laquiparmi shacyächiylapa parlapayta munanchi nacaycaj runacunata. Orupitapis más valuryojmi Diospa ali wilacuynincunaga, runacuna yachacur galaycuptenga “tsaynöparaqmi rasunpa ali kawayta taripäkunqa” (1 Tim. 6:19).

9. ¿Ima pasananpätaj runacunata wilapanchi y imanir? (Ezequiel 33:7, 8).

⁹ Jina cuyacoj carmi runacunata niycanchi cay mundupa ushacaynin caylachona caycashganta (leiriy Ezequiel 33:7, 8). Vecinunchicunapis y quiquin castanchicunapis ima tiempucho cawaycashganchita cuentata mana gocäriptenga laquicuypämi. Mateo 24:21 texto nin ima pasananpäna caycashganta: “Tsay witsanqa runakuna fiyupami nakapäkunqa” y “kay patsata kamashqanpita patsa manami imaypis tsayjinanpa nakapäkushqatsu”. Chauraga chay wichan lapan luta religiuncuna ilgächishga canga, nircur Armagedón guerra galacaycamuptin ima mana alicunapis ushacashga canga (Apoc. 16:14, 16; 17:16, 17; 19:11, 19, 20). Jehová Diosta ruwacuyculanchi ali shongu runacunata tarinapaj, chaynopa Paylata sirvipäcunanpaj. Pero, ¿ima nishwantaj canan wichan mana chasquicoj cajcunapita? ¿Maygan castayquipis chucru shongu ticracurishgachu?

10. ¿Imanirtaj mana uticaypa runacunataga yachachicuycashwanla?

¹⁰ Pasaj yachachicuycho ricashganchinopis, capaz Jehová chasquingaraj arrepenticoj runacunata Jatuncaray Babilonia ushacayninman chayashgan wichan. Chayta tantiarmi canan tiempo masraj calpachacunanchi runacunata yachachinapaj. Cayta gongashunchu: capaz canan wichan imata parlapashganchitami yarpapäcunga chay wichancho (Ezequiel 33:33 textuwan tincuchiy). Canan wichan ima pasananpaj cajta yachachicushganchitaga yarpapäcungachi y chay hora Jehovata sirvirpis galaycäringachi. ¿Manachu unay tiempuchopis Filipos runa rasunpa cajtaga chasquicurgan terremoto cashgan horaraj? Aumi. Chaynolachi shamoj tiempuchopis juc terremotuno Jatuncaray Babilonia ushacashga captinraj waquin runacunaga Diosta sirvir galaycärenga (Hech. 16:25-34).

JEHOVATA CUYAR Y JUTINTA ALABARMI PREDICACUNCHI

11. ¿Imanotaj tantianchi “qamlami lapanpaq munayniyuq kaykanki” Jehovata nerga? (Apocalipsis 4:11; fotucunatapis ricay).

¹¹ Jehovata cuyarpis y jutinta alabarpis ganas ganasla predicacuycanchi. Cielucho caycajcunapis Jehovata alabapäcunmi, paycuna nishgannolami noganchipis cayno ninchi: “Qamlami lapanpaq munayniyuq kaykanki” (leiriy Apocalipsis 4:11). Cay texto tantiachimanchi runacunata wilapänapaj Jehová Diosla camacojninchi cashganta y payraycurla imacunapis cawaycashganta. Jina tantiachimanchi calpanchipis tiempunchipis y imaycanchicunapis Paylata aduranapaj cananpaj cajta (Mat. 6:33; Luc. 13:24; Col. 3:23). Aumi, Diosta cuyashpanchega manami uticäshunchu pitapis paypita parlayta. ¿Y jutinpitaga ima nishwantaj? ¿Imanotaj yachachicur alabaycunchi?

12. ¿Imanotaj predicarga Diospa jutinta respetar alabaycanchi?

¹² Jehovata cuyarga jutintapis alabayta munanchi (Mat. 6:9). Unaypitanami Diabluga Diospa jutinta ganratächishga, manachi upälalaga quedacushunchu (Gén. 3:1-5; Job 2:4; Juan 8:44). Chaymi predicaciunman aywarga listo caycanchi rasunpa cajta wilacur Diospa jutinta defendinapaj. Pitapis wilapayta munanchi Taytalanchi cuyacoj y ali cajta ruraj Dios cashganta, y Gobiernun ichiclachona ali cawayta apamunanpaj cajta (Sal. 37:10, 11, 29; 1 Juan 4:8). Chay lapanta rurashganchicunachomi ricacaycämun Diospa jutinta respetar alabaycashganchita y Testigun caycashganchipis. Caypita masla yachacushunna.

13. ¿Imanirtaj ‘Jehovapa testigun cä’ cushi cushila ninchi? (Isaías 43:10-12).

¹³ Quiquin Jehová acramashcanchi testiguncuna canapaj (leiriy Isaías 43:10-12). Guepa watacunachomi Jehovapa testiguncunata Pushajcuna cayta guelgapäcurgan: “Diospa jutinta apashganchega imawanpis trucanapaj canchu”.c Mä cayta masla tantiarishun. Imaraj canman juc runa chiquimashpanchi washanchita parlar galacuycuptin; autoridäcunaman aywarga maygan amigulatapis acrashwanchi favorninchicho parlananpaj. Ali amigunchi captenga, chay runaga rasunpa cajtachi parlanga, defendimashwanchi. Chaynolami Jehovapis acraycalämashcanchi Paypita rasunpa cajta wilacunapaj; chaymi ninchi imawanraj trucachishwan paypa amistänintaga y apashganchi jutintapis. Listumi caycanchi may chaychopis rasunpa caj Diosninchipita yachachicunapaj, chaynopa lutan yachachicojcunapita defendinapaj. Aumi, pitapis musyachishwan Jehovapa testigun cashganchita (Sal. 83:18; Rom. 10:13-15).

USHANANCAMAMI YACHACHICUYCÄSHUNLA

14. ¿Ima pasaptinraj cushi cushila Diosta agradecicushun?

¹⁴ Imaycapis Jehová munashgannola ruracanga. Munayculanchi más runacuna Diosta reguinanta, jatun nacay tiempo manaraj chayamuptin. Y chay tiempuchona cawaycarpis, Diosta cushi cushila agradecicushunrächi ali shongu runacuna cuentata gocurir Jehovata sirvir galaycäriptin (Hech. 13:48).

15, 16. ¿Imatataj ruraycashwanla, y imaycama?

¹⁵ Cananmi tiempo caycan mana uticaylapa may chaychopis Diospita yachachicunapaj, Gobiernunpita valurcharcur wilacunapaj. Jina wilacunapaj caycan cay mundupa ushacaynin chayamunanpäna caycashganta. Chay tiempo chayamuptenga lapancuna cuentata gocärenga wilacushganchicunaga quiquin Jehovapita shamushganta (Ezeq. 38:23).

¹⁶ ¿Chauraga imata ruranapätaj listo caycashwan? Shongunchicho ali wilacuycunata charar y runacunatawan Jehovata cuyarga ganas ganaslami predicaycäshun. Imaylapis quiquin Jehovanachi nimäshun: “¡Predicación chaylachona ushacan!” nir.