Jehová alapa poderyoj car imaypis yanapäshunquimi

1. Moisés israelitacunata Egipto naciunpita jorguriptin, ¿imanotaj Jehovaman yäracurgan?

HEBREOS librucho parlaycämun waquin Jehovapa sirvejnincunapita. Jucnin caj cargan Moisés, paypita yachacushun (Heb. 3:2-5; 11:23-25). Moisés yäracoj runa cargan, chaymi israelitacunata Egipto naciunpita jorgurgan. Manami manchacurganchu faraunta ni achca soldaduncunatapis. Jehovaman lapan shongunwan yäracurmi israelitacunata pushargan, Puca Lamarpa chaupinpa pasachergan nircur chunyaj jircamanpis apargan (Heb. 11:27-29). Waquin israelitacunaga Jehovaman manana yäracurgannachu paycunata cuidananpaj. Moisés ichanga, Jehovaman yäracurgan y chayga alimi cashga. Chunyaj jircacho Jehovaga yacuta micuyta manami faltachirganchu, israelitacuna ali cawacärinanpaj (Éx. 15:22-25; Sal. 78:23-25).a

2. ¿Imanirtaj Jehová Moisesta nergan: “Pasaypa munayniynaq kashqätaku yarpanki”? (Números 11:21-23)

² Egipto marcapita jorgaramushganpita juc watano pasariptinna, Jehová israelitacunata nergan aychata camaripänanpaj cajta. Moisés Jehovaman yäracoj carpis, capazchi cayno yarpargan ‘chunyaj jircacho caycar maypitataj Jehová aychata camaripämäshun maychicaj runacunapaj’ nir. Chayta musyarmi, quiquin Jehovami Moisesta nergan: “¿Pasaypa munayniynaq kashqätaku yarpanki?” (leiriy Números 11:21-23). Hebreo rimaycho “Jehovapa maquinpita” parlarga, santo espiritunpajmi parlaycan. Jehová poderninwan voluntäninta ruran.

3. ¿Imata yachacunchi Moisés y israelitacunata pasashganpita?

³ ¿Capaz imaylapis yarpachacushcanquicu gamta y familiayquita nestashgayquicunata Jehová camaripäshunayquita? Canan yachacushun imanirtaj Moisés y waquin israelitacuna Jehovaman manana yäracurgannachu, paycunata cuidananpaj. Jina waquin textucunata yachacur yanapämäshun Jehovaman masraj yäracunanchipaj.

MOISESPITA Y ISRAELITACUNAPITA YACHACUSHUN

4. ¿Imanirtaj achca israelitacuna Jehovaman manana yäracärirgannachu nestashgancunata camaripänanpaj?

⁴ ¿Imanirtaj achca israelitacuna Jehová nestashgancunata camaripänanpaj manana yäracärirgannachu? Israelitacuna y jäpa runacuna Jehová Aunishgan marcaman manaraj yaycur, achca watacuna chunyaj jircacho puripäcurgan (Éx. 12:38; Deut. 8:15). Jäpa runacunami jamurpargan maná tantapita micushganta, chaycunata wiyar waquin israelitacunapis jamurparcur galaycärergan (Núm. 11:4-6). Egiptucho caycaj micuycunapita yarpar munapäcurgan. Moisés chayta wiyar, aychata tarinanpaj munargan pero manami musyarganchu maycho tarinanpaj (Núm. 11:13, 14).

5, 6. ¿Imata yachacunchi israelitacuna jäpa runacunano jamurpaypaj parlashganpita?

⁵ Jäpa runacunano israelitacunapis manana Jehovawan agradecido caycarganchu. Noganchipis Diosta mana sirvej runacunanopis yarpar galaycushwan, Jehovawanpis manana agradecido caycashwannachu y naupacho imatapis jaguishganchipita yarpar galaycushwan. Waquincuna charashgancunatapis munapashwanmi. Chaymi charashganchicunalawan contentacuptinchi más cushishgalami cawacushun.

⁶ Israelitacuna yarpapäcunman cargan Jehová aunishganman. Payga nergan Aunishgan marcaman chayar imaycacunata camaripänanpaj cajta, manami chunyaj jircacho purishgancho. Chaynolami, canan tiempo imaycacunata tariyta yarpänanchipaj trucan yarpachacushwan Jehová shamoj tiempucho imacuna aunimashganchiman. Jina, achca textucunata tarishwan Jehová lapan aunimashganchicunaman masraj yäracunanchipaj.

7. ¿Imanirtaj seguro caycanchi Jehová poderninwan imaypis yanapämänanchipaj cajta?

⁷ Números 11:23 textucho Jehová Moisesta tapurgan: ¿“Pasaypa munayniynaq kashqätaku yarpanki”? nir. Chay tapucuywan Jehová munaycargan Moisés caycunapita tantiananpaj: 1) Jehovapa poderninga manami ichiclachu ni ushacanchu, 2) paypa poderninga may chaymanpis chayan. Chaymi israelitacuna chunyaj jircacho caycaptinpis Jehová poderninwanmi achca aychatapis camaripanman cargan. Dios poderninwanmi musyachicurgan listo caycashganta maycho caycaptinpis marcanta yanapänanpaj (Éx. 6:6). Noganchitapis ima sasacunapa pasarpis, may chaycho caycaptinchipis Jehová poderninwan listo caycan yanapämänanchipaj (Sal. 138:6, 7).

8. ¿Imata yanapämäshun waquin israelitacunano mana canapaj? (Dibujutapis ricay).

⁸ Jehová aunishgantaga cumplirganmi, chaymi montuypa montuypa codornizcunata micunanpaj cachapargan. Israelitacunaga chay milagrucunata rurashganpitaga Jehovata manami agradecicärerganchu. Codicioso car pachalanpa munar chay junaj, chay chacay warajnin junajpis mana jamaypa codornizcunata shuntapäcurgan. Chay codicioso israelitacunata Jehová rabiacur castigarganmi (Núm. 11:31-34). ¿Imata yachacunchi caypita? Cuidacunanchimi codicioso runano mana cananchipaj. Chaypa trucan rico carpis o waccha carpis masmi yarpänanchi ‘cielucho riquezacunata shuntananchipaj,’ chaypäga calpachacunanchi Jehovawan y Jesuswan masraj amigo cananchipaj (Mat. 6:19, 20; Luc. 16:9). Chayta ruraptinchi seguro caycäshun Jehová pishimashganchicunata camaripämananchipaj.

9. ¿Imapitataj seguro caycanchi?

⁹ Canan wichanpis, Jehová listo caycan sirvejnincunata yanapänanpaj. Chauraga, ¿nishwanchuraj imaypis guellayninchi micuyninchi mana faltamänanchipaj? Manami. Pero chaycunapa pasarpis seguro caycashwan Jehová manami imaypis jaguimänanchipaj cajta.b Ima pruebacunapa pasar o calpaynaj taricuptinchipis Jehovami calpata gomäshun. Canan yachacushun imanotaj Jehová yanapämäshun caycunapa pasaptinchi: 1) guellay mana captin, aruy mana captin, 2) edayashga caycarga pilapis mantenimänanchipaj yarpaptinchi.

GUELLAY O ARUY MANA CAPTIN

10. Último tiempucho cawashganchiraycu, ¿imacunapataj pasashwan?

¹⁰ Último tiempucho cawashganchiraycu ima cambiucunapis caycanman. Autoridäcuna juc juc yaycushganraycu, guerraraycu, desgraciaraycu o gueshyacuna may chaycho caycashganraycu; capazchi guellaypis cangachu, aruyniynaj quedacushwan, imata tarishganchicunatapis ograshwanmi. Chaycunapa pasar capazchi aruyta tarinanchipäga juc marcapa aywananchi familianchita manteninanchipaj. Chauraga Jehovaman yäracurga, ¿imata rurananchi ali decisiunta acrananchipaj?

11. ¿Imata rurashwan guellay pishiptin o aruy mana captin? (Lucas 12:29-31).

¹¹ Mana alicunapa pasarga Jehovata wilapar mañacunanchi (Prov. 16:3). Jehovata mañacunanchi ali tantiaj cananchipaj, ali decisiunta acrananchipaj y alapa mana yarpachacunanchipajpis (leiriy Lucas 12:29-31). Chaypitapis Jehovata ruwacushwan charashganchicunalawan contentacunanchipaj (1 Tim. 6:7, 8). Publicaciuncunachopis consejucuna caycan imata ruranapaj aruy mana captin o guellay pishiptin. Y waquincunatapis yanapargan jw.org paginanchicho chay temacunapita yachacushganta y videucunata ricashganta.

12. Juc cristiano familiayoj captin manaraj imatapis decidir, ¿imamantaj yarpachacunman?

¹² Waquincuna familiancunata jaguirir juc naciuncho arunanpaj aywacärergan, tiempuwanga cuentata gocärergan chay decisiunga mana ali cashganta. Chaymi manaraj ima aruymanpis yaycur manami yarpananchichu achca guellayta ganananchipaj, sinoga familianchiwan cushi cushila Jehovata sirvir caycänanchipaj (Luc. 14:28). Pilapis juc naciunman aywayta munaptenga caycunaman yarpanman: “¿Carupa arunäpaj aywaptë, runäwan o warmëwan alichuraj caycäshaj? ¿Reuniunman aywanäpaj, predicaciunman yargunäpaj y hermanucunawan juntula cayta puedishächuraj?”. Y wamrayquicuna captenga caytapis tapucunayqui: “Wamräcunawan mana caycarga, ¿imanopataj Jehovapa consejuncunapita paycunata yachachishaj?” nir (Efes. 6:4). Manaraj imatapis decidir Jehovapa consejuncunatami cäsucunayqui. Ama cäsupaychu Jehovata mana sirvej familiayquicunapa o amiguyquicunapa consejuncunata.c Asia occidental naciunpita Tony hermanunchita nipäcurgan juc naciuncho arunanpaj y ali pagashga cananpaj. Pero manaraj chay aruyta chasquir Jehovata mañacurgan y warminwanpis parlacärergan, nircur decidirgan chay aruyman mana yaycunanpaj y walca guellaylawan cawacärinanpaj. ¿Imataj nin Tony decidishganpita? Paymi nin: “Achca runacunata yanapashcä Jehovata reguinanpaj y wamräcunapis lapan shongunwan Jehovata sirvircaycan. Familiäwan yachacushcanchi Mateo 6:33, nishganno ruraptinchi Jehovami imaypis cuidamäshun”.

EDAYASHGANA CAYCARGA PILAPIS MANTENIMÄNANCHIPAJ YARPAPTINCHI

13. ¿Imata rurananchi auquinna caycar nestashganchicunata charananchipaj?

¹³ Auquinmanna chayarga capaz yarpashwan ‘pitaj cuidamanga’ nir. Chayno yarparpis Jehovaman yäracushun pay cuidamänanchipaj. Bibliaga yachachimanchi ali arucoj cananchipaj chaynopa shamoj tiempucho nestashganchita charananchipaj (Prov. 6:6-11). Alichi canman guellayninchi shuntaptinchi auquinna caycar yanapämänanchipaj. Guellayga yanapämanchi cawacunanchipaj, pero manami guellaylata ashinapaj yarpananchichu (Ecl. 7:12).

14. Auquinman o chacuanman chayaptinchina yarpar, ¿imanopataj Hebreos 13:5 texto yanapämashwan alapa mana yarpachacunapaj?

¹⁴ Jesús juc tincuchicuywan nergan pipis guellaylaman shuntananpaj yarparga Jehovapa ricaynincho mana tantiaj runano caycan (Luc. 12:16-21). Manami musyanchichu waracuna ima pasamänanchipaj cajta (Prov. 23:4, 5; Sant. 4:13-15). Jina, Jesús nergan pipis discipulun cayta munarga listo caycanman ima aycajnincunatapis jaguirinanpaj (Luc. 14:33). Naupa caj cristiano Judea marcapita mana laquiypa ima aycajnincunatapis jaguipäcurgan (Heb. 10:34). Canan wichanpis, politicaman mana talucashganraycu achca hermanucuna aruyniynaj o jinayla quedapäcurgan (Apoc. 13:16, 17). Chaynopa lapan shongunwan Jehovapa aunicuyninman yäracärin, pay cayno nir aunimanchi: “Imaypis manami kacharishaykitsu ni qonqashaykitsu” (leiriy Hebreos 13:5). Pero alichi canman guellayninchita shuntananchipaj chaynopa auquinna caycaptinchi nestashganchicunata charananchipaj. Ichanga ilajpita ima mana alicuna pasamaptinchi yäracunchi Jehová cuidamänanchipaj.

15. Cristiano taytacuna, ¿imata munartaj wamrancunata ashmapäcunman? (Fotucunatapis ricay).

¹⁵ Waquin naciuncunacho runacuna wamrayoj cayta munapäcun auquinna caycaptin wamrancuna paycunata manteninanpaj. Ichanga Biblia nin tayta cajcuna wamrancunata nestashganta camaripänanpaj (2 Cor. 12:14). Chayno captinpis capazchi taytancuna auquinna caycar imatapis nestaptin wamrancuna yanapangami. Chaymi achca wamracuna cushi cushila taytancunata yanapaycan (1 Tim. 5:4). Pero cristiano taytacuna wamrancunata yanapan lapan shongunwan Jehovata sirvinanpaj, manami achca guellayta ganar paycunata manteninanpajchu. Wamrancuna Jehovata sirviptin alapa cushicärin (3 Juan 4).

16. Taytacuna, ¿imanopataj wamrayquicunata yachachinquiman quiquincuna mantenicärinanpaj? (Efesios 4:28).

¹⁶ Taytacuna, ali arucoj canquiman y Jehovamanpis yäracunquiman. Chaynolami wamrayquicunata tacshalapita yachachinquiman ali arucoj cananpaj y Jehovamanpis yäracärinanpaj (Prov. 29:21; leiriy Efesios 4:28). Winaycaptinna wamrayquita yanapay escuelacho ali estudioso cananpaj. Publicaciunninchicho Bibliapa consejuncunata ashinanpajpis yachachiy, chaynopa ali decisiunta acranga imata estudiananpaj. Jina wamrayquicunata yanapay ima aruylachopis arunanpaj quiquincuna mantenicärinanpaj. Chaynopa tiempunpis canga predicaciunman yargunanpaj o precursor regularno sirvinanpaj.

17. ¿Imapitataj seguro caycanchi?

¹⁷ Jehovapa sirvejnincuna seguro caycan pay nestashgancunata camaripänanpaj cajta. Jehová munaycan y rurangami. Nacay tiempo chayamunanpäna caycan, chaymi masraj Jehovaman yäracunanchi. Ima pasaptinpis Jehová poderninwan nestashganchicunatapis camaripämäshun. Chayraycu seguro caycanchi may chaycho caycaptinchipis Pay poderninwan imaypis listo caycan yanapämänanchipaj.