“Kanan akrapäkuy pita sirvipäkunaykipaqpis”

1. ¿Imatataj rurananchi cushish cawacunanchipaj, y imanirtaj chayta rurananchi? (Isaías 48:17, 18).

TAYTALANCHI Jehová alapa cuyamashpanchi canan tiempo y shamoj tiempucho cushish cawacunanchipaj munan (Ecl. 3:12, 13). Chaypäga yachayta gomashcanchi imaycacunata rurananchipaj. Pero manami quiquilanchicuna gobernanacunanchipaj, ni imataj ali o mana ali caycashganta decidinanchipächu camamashcanchi (Ecl. 8:9; Jer. 10:23). Jehová musyan paylata sirvir y cäsucur cushish cawacunanchipaj (leiriy Isaías 48:17, 18).

2. 1) ¿Imata Satanás niycämanchi? 2) Satanás lula cashganta musyachinapaj, ¿imatataj Jehová rurashga?

² Satanás niycämanchi ‘cushish cawacunayquipaj Diostaga ama cäsupaychu, quiquilayqui cushish cacuy’ nir (Gén. 3:4, 5). Satanás lula cashganta musyachinapäga Jehová permitishgami ichic tiempula runacuna quiquincunapura gobernanacunanpaj. Pero chayno cashganpita pasaypa nacaycunami cashga. Ichanga Biblia wilamanchi achca warmicuna olgucunapis Diosta sirvir cushish cawashganta, y más cushishgaga quiquin Jesusmi Papäninta sirvirgan. Puntataga ricashun imanirtaj Jesús acrargan Jehovalata sirvinanpaj. Nircur yachacushun imanirtaj Jehovalatami adurashwan. Y ushanancho yarparcushun imanirtaj decidishcanchi Jehovata sirvinanchipaj.

IMANIRTAJ JESÚS JEHOVALATA SIRVIRGAN

3. ¿Imatataj Satanás Jesusta nergan, y Jesús imapätaj decidido caycargan?

³ Cay Pachacho caycar Jesusmi decidido caycargan Papäninlata adurananpaj. Chaylaraj bautizacushganpita Satanasmi nergan gongurpacur aduraptin lapan naciuncunata gonanpaj. Jesús ichanga contestargan: “¡Witikuy, Satanás! Tayta Diospa palabrancho kaynömi qelqaraykan: ‘[Jehová] Dioslata adorapäkunki. Pay japalanta sirvipäkunki’” nir (Mat. 4:8-10). ¿Imanir Jesús chaytami nergan? Canan chaypita yachacushun.

4, 5. ¿Imanirtaj Jesús decidido caycargan Papäninlata adurananpaj?

⁴ Jesusga lapan shongunwan Papäninta cuyar decidido caycargan Paylatami sirvinanpaj (Juan 14:31). ¿Imanir? Payga musyanmi Jehovalata sirvir ali cashganta, jina musyanpis Jehová lapanta Camacoj y yäracuypaj Dios cashganta, y imayca alicunata gomashganchita (Juan 8:28, 29; Apoc. 4:11; Sal. 33:4; 36:9; Sant. 1:17). Jehová Jesusta lapan nishganga rasunmi cashga, y Jesús lapan charashgancunaga Jehovapitami cashga; chaycunapita agradecido caycargan (Juan 1:14). Ichanga Satanás lulacoj, wanuchicoj y quiquilanman yarpaj (Juan 8:44). Jesusga ali reguin Jehovata y Satanastapis, chaymi yarpaylapis yarparganchu Satanasno cayta y Jehovapa contrancho churacänanpaj (Filip. 2:5-8).

⁵ Jina Jesús musyarganmi wanunancama Taytanta cäsucushganpita shamoj tiempucho achca bendiciuncuna cananpaj y Jehovapa jutin jogarish cananpaj, chaynopa Satanás lapan nacachimashganchita ushacächish cananpaj (Heb. 12:2).

IMANIRTAJ JEHOVALATAMI ADURASHWAN

6, 7 1) ¿Imanirtaj achca runacuna Jehovata aduranchu? 2) ¿Imanirtaj Jehovalatami adurashwan?

⁶ Achca runacuna Jehovata manami aduranchu, ¿imanir? Paycunaga Jehovata manami reguinchu. Manami musyanchu Pay ali cashganta y imaycacunachopis yanapämashganchita. Chaynomi pasargan Pablo predicashgan Atenas runacunatapis (Hech. 17:19, 20, 30, 34).

⁷ Pablo paycunata nergan Jehová Dioslami “kawanantsipaqpis jämayta qomantsi y lapan munashqantsikunatapis kamaripämantsi”. Jina nerganpis Pay “yanapamaptintsiraqmi kawantsipis y purintsipis”. Yachacherganpis Jehová “juk runalata kamarkurmi bendicionninta churarqan atskaqman mirarkur nacionkuna maytsaychöpis kananpaq”. Chauraga Jehová camamajninchi cashganraycu, paylatami adurananchi (Hech. 17:25, 26, 28).

8. ¿Imatataj Jehová mana ruranmanchu?

⁸ Jehová lapanta Camacoj y munayniyoj carpis, manami a las malas nimanchichu voluntäninta rurananchipaj. Chaypa trucanga, Pay cuyamashpanchi amigun cananchita munar, claro musyachimashcanchi juc Dios cashganta (1 Tim. 2:3, 4). Chaymi shumaj yachachimanchi noganchipis achcajta yachachinapaj shamoj tiempucho Jehová runacunaraycu imayca bendiciuncunata apamunanpaj cajta (Mat. 10:11-13; 28:19, 20). Jina Jehová ali camacächishga hermanunchicunawan junto payta adurananchipaj y congregaciunta pushacojcuna cuidamänanchipäpis (Hech. 20:28).

9. Jehová runacunata cuyashpanmi, ¿imacunata rurash?

⁹ Jehová runacunata alapa cuyashpanmi payman mana yäracojcunatapis imayca alicunata camaripan. Unaypita canancama achca runacuna quiquin munashgannola cawananpaj decidipäcush. Chayno captinpis Jehová nestashgancunata camaripashga cushish cawapäcunanpaj (Mat. 5:44, 45; Hech. 14:16, 17). Jehová cuyashganraycu paycuna familiayoj y ali amigucunayoj cayta puedinmi y ali arushganpitapis cushish cawacuyta tarinmi (Sal. 127:3; Ecl. 2:24). Chaywanmi claro ricacan Jehová lapan runacunata cuyashganta (Éx. 34:6). Canan yarparcushun imanirtaj Jehovata sirvinapaj decidishcanchi y imanotaj pay bendecimanchi.

IMANIRTAJ DECIDISHCANCHI JEHOVALATA SIRVINAPAJ

10. 1) ¿Imanirtaj Jehovata sirvinchi? (Mateo 22:37). 2) Gam, ¿ima bendiciuntataj chasquishcanqui Jehová perdunacoj cashganpita? (Salmo 103:13, 14).

¹⁰ Jesusno noganchipis lapan shongupita Jehovata cuyar paylata sirvinchi (leiriy Mateo 22:37). Chayno cuyananchipaj Pay imano cashganta shumaj reguishwan. Mä yarparcushun Jehová pacienciacoj cashganman. Israelitacuna mana cäsucuptin Paymi cayno ruwacoj: “Jutsa ruraykunata kacharir alilatana rurapäkuy” nir (Jer. 18:11). Jehová musyanmi “alpalapita kashqantsita” (leiriy Salmo 103:13, 14). Payga pacienciacoj y ali Dios cashganman yarpachacuptinchi, ¿manacu lapan shongupita imaypis sirviyta munanchi?

11. ¿Imanirtaj decidishcanchi Jehovalata adurananchipaj?

¹¹ Musyanchimi Jehovata sirvishganchega ali cashganta, chaymi shongupitami payta aduranchi (Mat. 4:10). Jinamanpis mana gonganchichu Jehovata adurar paypa jutinta alabanchi, Satanás lulacoj cashganta musyachinchi y Jehovapa shonguntapis cushichinchi. Y Jehovata sirvinanchipaj decidiptinchega, imaycamayajpis cawacuyta chasquishun (Juan 17:3).

12, 13. ¿Imata yachacunchi Yenny y Paula rurashganpita?

¹² Wamrala cashganchipita Jehovata cuyar galaycushwan, y chay cuyacuy imaypis mana ushacanmanchu. Chaytami rurargan Yenny y Paula jipashcuna.a Paycunashi jucnin 11 watayoj y jucnin 10 watayoj caycar Bibliata estudiar galaycurgan. Taytancunaga Bibliata yachacuyta munarganchu, ichanga taytanmi nergan ‘iglesiäman shamurpis Testigucunawan Bibliata yachacur siguinquiman’. Yenny wilacun: “Testigucunawan Bibliata yachacushgäga yanapämargan estudiaj masëcunano drogata mana shogunäpaj y jucwan jucwan mana cacunäpaj”.

¹³ Jipashyarna ishcanmi congregaciunwan predicar galaycurgan. Y tiempuwanga precursorano sirvirgan, jina chachayash taytancunatapis cuidargan. Lapan pasashganman yarpar Yenny cayno nin: “Quiquëmi ricashcä Jehová amiguncunata imaypis mana cachashganta, 2 Timoteo 2:19 nishganno: ’Payman yärakuqkunataqa Tayta Dios reqinmi’.

14. ¿Imanotaj Jehová ali Dios cashganta musyachicunchi? (Fotucunatapis ricay).

¹⁴ Jehová ali Dios cashganta lapancuna musyananpaj yanapacuyta munanchi. Chayno canman pï amigulanchipis cuyapäcoj, garacoj y perdunacoj captenga. Pilapis paypita mana ali parlaptin, lulacoj o suwacoj cashganta niptin, ¿manacu payta imaycanopapis defendinquiman? Chaynolami pilapis Jehovapita mana ali parlaptin noganchi imaycanopapis defendiyta munanchi, Jehová ali Dios cashganta musyacänanpaj paypita rasunpa cajta wilacunchi (Sal. 34:1; Is. 43:10).

15. ¿Imatataj apóstol Pablo chasquergan Jehová munashganno rurashganpita? (Filipenses 3:7, 8).

¹⁵ Calpachacunchimi Jehová munashganno cawar ganas ganasla payta sirvinanchipaj. Chaytami rurargan apóstol Pablo, paymi marcancho ali ricashga cananpaj trucan decidirgan Jesusta gatinanpaj y Jehovata sirvinanpäpis (Gál. 1:14). Chayno rurashganpita premiuta chasquirgan cushish cawacuyta y Jesuswan cielucho gobernamunanpaj cajta. Apóstol Pablo chay lapanta chasquishganpita alapami cushicurgan, noganchipis Jehovata sirvishganchipita alapami cushicunchi (leiriy Filipenses 3:7, 8).

16. ¿Imata yachachimanchi Julia pasashgan? (Fotucunatapis ricay).

¹⁶ Shongupita Jehovata sirviptinchi imayca bendiciuncunata chasquishun canan wichan y shamoj tiempuchopis. Chaypa pasargan Julia hermananchi. Payshi wamrala cashganpita iglesiancho cantaj, y shumaj cantashganta wiyarga juc cantayta yachaj paytami yachachir galaycurgan. Cantayta yachaptin alapa reguishganami cargan y may chaychopis cantaj. Chay wichan cantayta yachaj masin parlapargan Jehovapa jutinpita. Chaypita Julia Bibliata yachacur galaycurgan semanacho ishcay cuti. Y tiempuwan cantayta jaguirgan lapan tiempunwan Jehovata sirvishganraycu. Chayno decidinanpäga manami facilchu cargan. Reguishgancuna nergan ‘cantayta yachashgayquita mana cajman churaycanqui’, ichanga Julia munargan lapan vidanwan Jehovalata sirvinanpaj. Canan quimsa chunca watana pasashga, y pay nin: “Cushishmi sienticö, yäracömi shamoj watacunapa lapan shongö munashganta Jehová cumplinanpaj cajta” (Sal. 145:16).

JEHOVALATA IMAYPIS SIRVISHUN

17. Diosta sirvejcuna y Diosta mana sirvejcunapis, ¿imanotaj caycan cay ushanan tiempucho?

¹⁷ Mana alicuna ushacänanpaj ichiclanami pishin. Apóstol Pablo cayno escribirgan: “Shamunanpaj cäga chayamongapänami. Manapis aycällatanami chayamonga” (Heb. 10:37, TDI). ¿Ima ninantaj chayga? Ichic tiempulanami pishin runacuna decidipäcunanpaj Jehovata sirvinanpaj o manapis (1 Cor. 7:29). Y Jehovata sirvinanchipaj decidishgana carga, sasapa pasaptinchipis ichic tiempulapami chayga canga.

18. ¿Imata rurananchipätaj Jehová y Jesús shacyächimanchi?

¹⁸ Jesús gatejnincunata shacyächergan mana uticaypa payta imaypis sirvinanpaj (Mat. 16:24). Chauraga achca watapa Jehovata sirviycarpis manami yamacäcushwanchu. Payta sirvinapaj calpachacunanchirämi, y öraga manami facilchu canman. Ichanga Jehová imayca bendiciuncunata camaripämäshun (Sal. 35:27).

19. ¿Imata yachacunchi Jim pasashganpita?

¹⁹ Waquincuna yarpapäcun Jehovata sirvishganraycu manaraj cushish caycashganta. Gam joven captiquega, ¿chaynochu yarpanqui? Jim jutiyoj mozu cayno wilacun: “Noga yarpashcä Testigo cashgäraycu cushish cayta mana puedishgäta. Alapa gustamaj waquin mozucunano fiestacunata, jipashcunawan yarguyta y peliacoj puclacunata ricayta, pero reuniunman y predicaciunmanpis aywanämi cargan. Chayno yarpashgäpita waquin mozucunano mana alita rurar galaycurgä. Galananchoga ichicla cushicurgä, tiempuwan ichanga manami cushicurgänachu. Chay hora yarpargä rurashgäcunaga Biblia nishganno mana ali cashganta, chaymi decidirgä lapan shongöwan Jehovata sirvinäpaj. Chaypita pacha mayargä Jehová lapan mañacushgäcunata wiyashganta”.

20. ¿Imata rurananchipätaj decidido caycanchi?

²⁰ Salmistaga Jehovata cantar cayno nergan: “Kushishqami kawan templuyki patiucho taq runaqa. Paytami akrashqanki nawpaykicho tänanpaq” (Sal. 65:4). Josueno lapan shongupita cayno nishun: “Noqaqa wayïcho taqkunawan TAYTA DIOSLATAMI imayyaqpis sirvipäkushaq” (Jos. 24:15).