Imano Jehová yanapämanchi imayca problemacunata aguantananchipaj

1. 1) ¿Ima problemacunapataj pasaycanchi? 2) ¿Pitaj yanapämäshun aguantanapaj? (1 Pedro 5:10).

SASA o aja tiempucho cawaycanchi chaymi lapanchipaj imayca problemanchicuna caycan. Waquincuna achca tiempupaj fiyu gueshyawan nacaycan. Waquincunapa cuyashga ayluncuna wanushga. Y waquincuna Jehovata sirvishganraycu autoridäcuna michan y familiancunapis chiquin (Mat. 10:18, 36, 37). Ama gongaychu gampis laquesacunapa pasaycaptiqui Jehovami yanapäshunqui aguantanayquipaj (leiriy 1 Pedro 5:10).

2. Cristianucunaga, ¿imanotaj problemanchicunata aguantanchi?

² Pruebacunapa pasar, gaticachashga caycar o ima problemacunapa pasarpis mana jaguiypa Jehovata sirviycäshun. Y cristianucuna ima problemacunapis “Tayta Diospa poderninwanmi” aguantanchi manami quiquinchi calpanchipitachu (2 Cor. 4:7). Canan yachacushun Jehovapa chuscu yanapacuynincunapita y imacunata rurashwan problemanchicunata aguantananchipaj.

JEHOVATA MAÑACUNANCHI

3. ¿Imanirtaj Jehovata mañacuptinchi cushicuypaj caycan?

³ Juchayoj captinchipis Jehovata mañacunanchi yanapämänanchipaj problemanchicunata aguantananchipaj. (Heb. 4:16). Jehová munan payta mañacunanchipaj: imay horapis, imacunapitapis, ima rimaychopis, maycho caycarpis o carcelcho wichgarashga caycarpis (Jon. 2:1, 2; Hech. 16:25, 26). Y alapa laquesacunapa pasaptinchi o mana imatapis niyta puediptinchi payga yarpashganchicunata musyanmi (Rom. 8:26, 27). Alapa cushicuypajmi caycan Jehovata mañacuyta puedishganchita.

4. Imayca problemacunata aguantananchipaj, ¿imanirtaj Jehovata mañacunanchi?

⁴ Jehová palabrancho claro nimanchi pay ‘munashqanno kaptin imatapis manakuptintsiqa mayamantsimi’ (1 Juan 5:14). Chauraga, ¿alicu caycan imayca problemacunata aguantananchipaj Jehovata mañacunanchipaj? Aumi, Jehovaga munan imayca problemacuna captinpis aguantananchipaj. Y Jehovata mana yamacaypa sirviptinchi, Satanás lula cashganta ricächicunga (Prov. 27:11). Jehová “lapan shonqunwan payman yärakuqkunata yanapananpaq” munaycan (2 Crón. 16:9). Chauraga convencidumi caycanchi Jehová yanapämänanchipaj munashganta, chaypaj calpatapis gomanchi imayca problemacunata aguantanapaj (Is. 30:18; 41:10; Luc. 11:13).

5. ¿Jehovata mañacuptinchi imanotaj shongunchicho sienticunchi? (Isaías 26:3).

⁵ Bibliaga nimanchi laquesacunapa pasar Jehovata mañacunapaj: ‘Payga jauca cawayta gomäshun, shonqunchitapis y yarpayninchitapis cuidanga’ (Filip. 4:7). ¡Chaypita alapa agradecicunchi! Diosta mana reguej runacuna problemancunata gongananpaj y jaucala cacunanpaj imaycacunatami ruran. Ichanga Diospa sirvejnincunaga Jehovata mañacuptinchi shongunchicho jaucala sienticunchi y chayga imawanpis tincunchu. Aumi, Jehovaman lapan shongunchiwan yäracur mañacuptinchi, shongunchita y yarpayninchita cuidangami jaucala caycänanchipaj (leiriy Isaías 26:3). Jehová palabrancho shacyächicoj textucunawan yarpächimanchi alapa cuyamashganchita y yanapämänanchipaj listo caycashganta (Sal. 62:1, 2).

6. ¿Mañacuyninchicho imacunapitataj Jehovata wilapashwan? (Dibujutapis ricay).

⁶ Imata rurananchi. Ima laquesacunapa pasarpis, Jehovata ruwacur paypa maquinman cachaycushun. Jauca caycänanchipäpis mañacushwan, jina mañacushwan ali yachayta gomänanchipaj imatapis rurananchipaj (Sal. 55:22; Prov. 2:10, 11). Ima problemacunata aguantananchipaj mañacuptinchipis, ama gongashunchu yanapamashganchipita agradecicunanchipaj (Filip. 4:6). Chaymi ima problemacunapa pasarpis cuentata gocushwan imano Jehová yanapämashganchita y bendecimashganchita, chaycunapita payta agradecicunapaj (Sal. 16:5, 6).

BIBLIAPITA YACHACUNANCHI

7. Bibliata leishganchicho, ¿imata yachacunchi Jehovapita?

⁷ Imayca problemacunata aguantananchipaj Jehová palabran Bibliata gomashganchi. Achca textucunacho nimanchi Jehová listo caycan yanapämänanchipaj. Jesús Taytanta imano cashganta shumaj reguirmi chayno nergan Mateo 6:8 textucho, pay nergan: “Manaraq manakuptikipis Taytaykiqa ima pishïshushqaykitapis musyaykannami”. Chaymi nacaptinchi o imalanchipis pishimaptinchi segurumi caycanchi Jehová altantula caycashganta y yanapämänanchipaj listo caycashganta. Palabran Bibliachopis aunicuynincunata gomashganchi calpata jorgur aguantananchipaj (Sal. 94:19).

8. 1) ¿Ima consejuta Bibliacho tarinchi? 2) ¿Imanotaj yanapämanchi cay consejo problemanchicunata aguantanapaj?

⁸ Bibliacho shumaj consejuncunata tarinchi problemanchicunata aguantanapaj y alicunalata rurananchipäpis (Prov. 2:6, 7). Cayman yarpäshun: Biblia nimanchi ‘wara warantin, ¿imanöraj cawashaj?’ nir mana yarpachacunanchipaj, sinoga cada junaj imano cawananchipaj yarpachacunanchi (Mat. 6:34, TDI). Chaymi cada junaj Bibliata leiptinchi y y leishganchiman yarpachacuptinchi, ima problemacunapa pasar o manaraj imatapis decidir leishganchiman shumaj yarpachacushun.

9. Jehovapa unay sirvejnincunapita, ¿imatataj yachacunchi?

⁹ Bibliatapis leir tarinchi unay Diospa sirvejnincuna payman yaracushganraycur paycunata yanapashganta (Heb. 11:32-34 ; Sant. 5:17). Imano Jehová paycunata yanapashganman yarpar payman masraj yäracunchi. Jehovaga “pakakunantsi törrinömi kaykan. Paymi imapitapis tsapämantsi. Ima nakaycho kaptintsipis yanapamantsimi” (Sal. 46:1). Nacarpis unay Diospa sirvejnincuna Jehovata manami jaguirganchu, chaypita yachacur noganchipis yäracoj paycunano cayta munanchi (Sant. 5:10, 11).

10. ¿Imatataj rurananchi Diospa Palabran yanapämänanchipaj?

¹⁰ Imata rurananchi. Cada junaj Bibliata leishganchicho shumaj textucunata yanapämänanchipaj tariptinchi anotacushwan. Cada junajpaj acracämushgan textuta achca hermanunchicuna leipäcun, leishgancunaga yanapan calpata tarinanpaj. Chaynoshi pasargan Mariea hermananchita. Paypa taytancunatashi doctor nergan cancer gueshyawan caycashganta, payga taytancunata cuidargan wanunanyaj. Marie wilacun ima yanapashganta: “Cada tutami acracämushga textucunata liej cä y leishgäman yarpachacoj cä. Chayga yanapämargan Jehovaman y palabrancho aunimashganchicunaman yarpachacunapaj. Chaynopa nacaycashgaläman mana yarpachacunäpaj” (Sal. 61:2).

HERMANUNCHICUNAWAN JUNTULA CAYCÄNANCHI

11. Hermanunchicuna pruebacunapa pasar aguantashganta ricar, ¿imata yachacunchi?

¹¹ Jehová hermanunchicunawanmi yanapämanchi pruebacunata aguantanapaj. ‘Yärakuq mayintsikuna maytsaychöpis noqantsikunano nakaykashqanta musyar’ yarpächimanchi japalanchi mana caycashganchita (1 Ped. 5:9). Hermanunchicuna pruebacunata aguantashganta ricar noganchipis ima pruebacunapa pasarpis aguantashunmi (Hech. 14:22).

12. 1) Problemacunapa pasaptinchi, ¿imanotaj yanapämanchi hermanunchicuna? 2) Noganchipis, ¿imata rurananchi paycunapaj? (2 Corintios 1:3, 4).

¹² Hermanunchicuna ruraynincunawan y parlayninwanpis shacyächimanchi. Apóstol Pablutapis carcelcho wichgarashga caycaptin hermanucuna rurayninwan y parlayninwanpis shacyächergan, chaymi cartacamushgancho jucnin jucninta agradecicurgan (Filip. 2:25, 29, 30; Col. 4:10, 11). Canan wichanpis, ima problemacunapa pasaptinchi hermanunchicuna listo caycan yanapämänanchipaj, chaynola noganchipis hermanunchicunata yanapacunanchi (leiriy 2 Corintios 1:3, 4).

13. Maya hermananchi problemancunata aguantananpaj, ¿pïcunataj yanapargan?

¹³ 2020 watacho Rusia naciunpita Maya hermananchipa wasinman guardiacuna yaycupäcurgan imaycancunatapis ashinanpaj. Nircur juezman apargan Diospita yachachicushganraycur. Pay hermanucuna yanapashganpita cayno nin: “Juc cuticho calpaynaj ricacurgä pero hermanunchicuna telefunupa gayamargan y cartacamushganwan cuyamashganta nipäcamargan shacyächimänanpaj. Unaypitana musyargä hermanunchicuna cuyacoj familiano caycashganta, ichanga 2020 watapita mana alicunapa pasaycaptë hermanunchicuna cuyamashganta quiquë ricashcä”.

14. ¿Imata rurananchi hermanunchicuna yanapämänanchipaj? (Dibujutapis ricay).

¹⁴ Imata rurananchi. Ima problemanchicuna captenga hermanunchicunapita carupäcushunchu. Jina ancianucunapa yanapacuyninta ashinanchi, paycuna imayca problema pasaycaptinchi listo caycan yanapämänanchipaj (Is. 32:2). Hermanunchicunapis imayca problemacunapa pasapäcuycan. Paycunata yanapaptinchi cushishga sienticushun y problemanchicunalaman manami yarparäshunnachu, chaynopa noganchipis ima pruebacunatapis aguantashun (Hech. 20:35).

MUSHOJ PACHACHO CAWANANCHIPAJ CAJMAN YARPÄNANCHI

15. 1) Jesús aguantananpaj, ¿imamantaj yarpargan? 2) Noganchipis ima problemacunata aguantanapaj, ¿imamantaj yarpashwan? (Hebreos 12:2).

¹⁵ Shamoj tiempupaj Jehová aunimashganchiman yarpaptinchi yanapämanchi imayca problemanchicunata aguantananchipaj (Rom. 15:13). Chaymi Jesuspis aguantargan. Jesús cay pachacho caycar musyargan cäsucoj carga Jehovapa jutinta respetashga cananpaj. Jina pay alapa munargan papäninwan cielucho yapay tincunanpaj y musyargan shamoj tiempucho acrashga cajcunawan cay pachata gobernamunanpaj. Chaycunaman yarpar yanapargan wanunancama aguantananpaj (leiriy Hebreos 12:2). Chaynolami noganchipis mushoj pachacho cawacunanchipaj yarpaptinchi yanapämäshun canan tiempo problemanchicunata aguantanapaj.

16. 1) Alla hermananchita paraisucho cawacunanpaj cajman yarpar, ¿imanotaj yanapashga? 2) ¿Pay nishganpita imata yachacunqui?

¹⁶ Chaynomi cashga, Rusia naciunpita Alla jutiyoj hermananchipa runan carcelcho wichgarashga caycaptin, pay mushoj pachacho cawacunanpaj cajman yarpashgan yanapargan. Hermananchi cayno nergan: “Laquishgala mana caycänäpaj Diosta mañacoj cä y paraisucho imano cawacunapaj cajman yarpachacoj cä. Musyämi ichiclacho cay nacaycuna ushacänanpaj cajta. Jehová chiquejnincunatapis ushacächenga y noganchi cushishga cawacushun”.

17. Jehovapa aunicuynincunapita agradecicur, ¿imatataj rurananchi? (Dibujutapis ricay).

¹⁷ Imata rurananchi. Tiempunchita raquinanchi paraisucho cawaycashganchiman yarpachacunanchipaj. Yarpäshun paraisuchona caycashganchiman familianchicunawan amigunchicunawan, cushi cushila caycashganchiman. Chaycunaman yarpar cuentata gocushun mana ali pasashganchicunaga pasajlami caycashganta (2 Cor. 4:17). Jina runacunatapis paraisupita parlapananchi. Paycuna imayca problemacunapa pasaycan pero manami musyanchu Jehovapa aunicuynincunapita, chaymi paraisupita ichiclatapis yachachiptinchi capazchi Jehovapa aunicuynincunapita yachacuyta munapäcunga

18. ¿Imanirtaj Jehovapa aunicuynincunaman yäracunchi?

¹⁸ Job imayca pruebacunapa pasarpis Jehovata manami jaguirganchu. Chaypitana Jehovata cayno nergan: “Lapanpaq munayniyuq kashqaykita musyämi. Ruranaykipaq yarpashqaykitaqa lapantami kamakätsinki.” (Job 42:2). Job tantiargan Jehová aunicuynincunata cumplinanpaj mana pipis michayta puedishganta. Noganchipis chayta musyar yanapämanchi problemanchicunata aguantanapaj. Cayman yarpäshun, juc warmi pasaypa gueshyanraycu juc doctor juc doctorman aywan aliyananpaj pero mayganpis alchacächiyta puedinchu, chaymi laquicun. Pero juc junaj, juc ali doctorta tarin, gueshyanpita musyan y imano aliyananpaj parlapan. Cay warmi gueshyanpita aliyananpaj shuyararpis cananga calpachacun aguantananpaj. Chaynolami noganchipis musyanchi ichiclachona cay pacha paraisuman ticrananpaj cajta, chaymi imayca nacaycunata aguantananchipaj calpachacunchi.

19. ¿Imacunataj Jehová gomashganchi imayca problemacunata aguantanapaj?

¹⁹ Cananacama yachacushganchi imata rurananchi ima nacaycunata aguantananchipaj: Jehovata mañacunanchi, palabran Bibliata leinanchi, hermanunchicunawan junto caycänanchi y mushoj pachacho imano cawananchipaj cajman yarpänanchi. Caycunawan Jehová yanapamäshun. Ichiclachona Satanaspa munaynin chipyaypa ushacächishga canga, chaycamayajga imayca problemacunata aguantaycäshun (Filip. 4:13).