6 CAJ YACHACUY

Textucunata shumaj tantiachicushwan

Juan 10:33-36

ICHIC YACHACUY: Juc textuta leirga shumaj tantiachicuy ima ninantaj, nircur-raj juc yachachicuyman pasanquiman. Leishgayqui textuga yachachicushgayqui temapita parlanman.

IMANOTAJ RURASHWAN

Importante palabracunata fuertipa leiriy. Juc textuta leirga, shumaj tantiachicamuy más importante palabracuna imano tincushganta yachachicushgayquiwan. Chaypäga importante palabracunata cutin cutin ninayqui o tapucuytapis ruranquiman wiyaycajcuna chaypita cuentata gocunanpaj.

Textucho nishganpita juc palabracunawan o quiquiqui parlashgayquino tantiachicurga, imata nishgayquega yachachicushgayqui temawan tincunman.
Yachachicunayquipaj cajta tantiachicuy. Juc textuta manaraj leir imata yachacunapaj cajta niriy o imanir chay textuta leinayquipaj cajtapis. Nircur tantiarcachiy leishgayqui textupita más importante palabracuna imano tincushganta yachachicushgayquiwan.

Bibliayquega quicharashgala caycanman tantiachicuycaptiqui. Chaynopa wiyaycajcuna cuentata gocärenga yachachicushgayqui temaga jinan Bibliapita cashganta.
Achcataraj parlacamuychu mana pantachinayquipaj. Yarpay imacunata yachachicuyta munanqui y chaylapita parlacamuy. Cuentamanpis churay wiyaycajcuna imacunata musyashganta, nircur paycunata yanapänanpaj yachachicuycunalapita parlanayqui.