Riccha ricchala caycäshun tentaciunman mana tuninapaj

1, 2. 1) ¿Imataj Jesús discipuluncunata wilapargan? 2) ¿Imanirtaj Jesuspa discipuluncuna tentaciunman tunirgan? (Dibujucunatapis ricay).

“CÄSUKAMAYTA munarpis kikilaykikunapitaqa manami kamäpakunkitsu” (Mat. 26:41b). Chaywan Jesús nimashganchi juchayoj cashganchiraycu imalachopis pantarcushwanmi, jina nimashganchi quiquilanchiman mana confiacunanchipaj. Chaytaga Jesús manaraj wilar discipuluncuna nipäcushga payta imaypis mana jaguirinanpaj (Mat. 26:35). Paycuna ali shongu carpis manami cuentata gocurganchu tentaciuncunaga alapa sasa cashganta. Chaymi Jesús cayno wilapargan: “Rikchapäkuy. Tayta Diosta manakäriy Satanásta ichipänaykipaq” (Mat. 26:41a).

² Jesús presuyashgan hora, discipuluncuna gueshpicur aywacärergan. Paycuna riccha ricchala mana cashganraycu tentaciunman tunirgan. Mana yarpashgan hora tentación yurimurgan, chaymi Jesusta imaypis mana jaguinanpaj niptinpis, chaytami rurargan (Mat. 26:56).

3. 1) Jehovata imaypis cäsucunapaj, ¿imanirtaj quiquilanchiman mana confiacushwanchu? 2) ¿Imatataj canan ricärishun?

³ Noganchipis quiquilanchiman ama confiacushwanchu. Lapan shongunchiwan Jehovata cäsucuyta munaptinchipis, juchayoj cashganchiraycu imaylapis tentaciunman ishquishwanchi (Rom. 5:12; 7:21-23). Mana shuyarashganchi hora sasa tentaciuncunami yurimunman, chaymi Jehovata y Jesusta imaypis cäsucunanchipaj, Jesús nishganno riccha ricchala caycänanchi. Chayta ruranapäga cay yachacuymi yanapämäshun. Canan ricärishun imacunachotaj cuidacushwan jatun juchaman mana chayanapaj, imata rurananchi tentaciuncunaman mana ishquinapaj, jina imanotaj riccha ricchala imaypis caycänapaj.

¿IMACUNACHOTAJ RICCHA RICCHALA CAYCÄNANCHI?

4, 5. Juchata rurashganchi jatun mana captinpis, ¿imanirtaj alcäbula caycänanchi?

⁴ Juchata rurashganchi jatun mana captinpis, Jehovapita ichic ichiclapa raquicächimashwanmi. Y tiempuwanna jatun juchamanpis chayachimashwan.

⁵ Lapanchimi juchasapa captinchipis cada ununchipita caycan debilidäninchicuna. Waquincuna fornicaciunman o juc jatun juchacunaman mana tuninanpaj luchaycan. Waquincunapis ganra cajcunata rurayta munapäcun, capazchi partincunata adrede cupacun o galapächula caycajcunata ricayta gustan. Jina waquincunana calpachacuycan orgulloso mana cananpaj, runacunata manchacoj, o rasla rabiacoj mana cananpaj. Chaymi Santiago nergan “quiquinchïpa shongunchichömi yarpanchi ima jucha ruraypäpis” (Sant. 1:14, TDI).

6. ¿Imatataj cuentata gocunanchi?

⁶ ¿Gam cuentata gocunquichu ima juchamanpis ishquinayquipaj más fácil cashganta? Manami yarpashwanchu ‘nogaga ima juchamanpis ishquishächu’ nir (1 Juan 1:8). Pabluga chayno yarpajcunata nergan “cuidädu kikikikunapis jutsa rurayman ishkinkiman” (Gál. 6:1). Quiquinchi cuentatami gocunanchi imacunachopis ricchala caycänapaj (2 Cor. 13:5).

7. ¿Imacunachotaj masraj cuidacunanchi? Tantiachicamuy.

⁷ Ima juchamanpis fácil ishquinayquipaj musyarga, ¿imataraj ruranquiman? Alirämi cuidacunanchi. Cayman yarparcushun: unay wichan juc murallashga marcacho, ¿maypataj pilapis más fácil yaycunman? Puncunpa, ¿au? Chaymi chaycunata más cuidananraj cargan. Chaynolami noganchipis debilidäninchicunachomi masraj cuidacunanchi (1 Cor. 9:27).

¿IMATATAJ RURASHWAN TENTACIUNMAN MANA ISHQUINAPAJ?

8, 9. Proverbios 7 caj capítulo wilacushgan mozuga, ¿imacunataj ruranman cargan juchaman mana ishquinanpaj? (Proverbios 7:8, 9, 13, 14, 21).

⁸ ¿Imacunataj rurashwan tentaciunman mana ishquinapaj? Proverbios 7 caj capítulo ima nishganta ricärishun. Chaycho wilamanchi juc mozushi mañosa warmiwan oglanacur cacurgan. 22 caj versículo wilacun chay mozo warmipa wasinman ilajpita yaycushganta. Ichanga naupa caj versiculucuna ricächicun chay mozuga ichic ichiclapa tentaciunman tunishganta.

⁹ ¿Imacunapitataj witicurganchu? Chay mozo chacaypa mañosa warmipa wasinpa cercalanpa pasargan, nircur wasinman aywargan (leiriy Proverbios 7:8, 9). Chaypita warmita ricaycurga manami tumaycur aywacurganchu. Chaypa trucan mucharcuptin y ‘nogaga Diospaj sacrificiucunatapis rurashcä’ nir engañaycuptin, payga quedacurgan (leiriy Proverbios 7:13, 14, 21). Chay mozo chaycunata mana ruracuptenga, juchaman manami ishquinmanchu cargan.

10. Proverbios libro mozupa wilacushganno, ¿imapataj pï cristianupis pasaycunman?

¹⁰ Chaypaga pï cristianupis pasanmanmi. Jatun juchaman ishquiycur capaz ninman ‘¿imanirtaj cayga ilajpita pasamashga? ¿Imanotaj chayman ishquiycushcä?’ nir. Ichanga shumaj yarpachacuptenga cuentata gocunga ichic ichiclapa chay juchaman tunishganta. Capazchi mana ali amigucunata acrargan, y cushicushgan hora o internetcho ashiptin mana alicunaman jaticargan. Jina Jehovata mañacurgannachu, Palabranta leirgannachu y reuniunman ni predicaciunmanpis aywargannachu. Proverbios libro mozuta pasashganno ichic ichiclapa juchaman ishquicushga.

11. ¿Imatataj rurananchi juchaman tuniyta mana munarga?

¹¹ ¿Imata yachacunchi? Cananpita calpachacunanchi ali tantiaj cananchipaj, chaynopa ichic ichiclapa jatun juchaman mana tuninapaj. Chaypitami Salomón wilacurgan chay mozo mañosa warmiwan ishquishganpita parlarga. Paymi nergan: “Tsay niraq warmiwanqa ama jatikaytsu” (Prov. 7:25). Jina consejarganpis: “Wayrapakuq warmipita witikunki. Wayi punkulanmanpis ama chayankitsu” (Prov. 5:3, 8). Manami munanchichu juchaman tuninanchipaj, chaymi calpachacunchi ali tantiaj canapaj, chaynopa ichic ichiclapa chayman mana chayanapaj.a Waquin ruraycunaga jucha mana captinpis tiempuwan jatun juchaman ishquichimashwan, chauraga chaycunapita alcäbula caycänanchi (Mat. 5:29, 30).

12. ¿Imataj Job decidirgan, y chayga imanotaj yanapashga ricchala caycänanpaj? (Job 31:1).

¹² Juchalicuyman mana ishquinapaj Job rurashganno rurananchi, pay shonguncho ni yarpaylapis yarparganchu pï warmicunata ricapänanpaj. Nerganmi: “Shonqulächömi yarpachakurqä pï jipashtapis mana rikapänäpaq ni mana munapänäpaq” (leiriy Job 31:1). Chayno yarpashganraycu juchaman mana imaypis tunirganchu. Noganchipis shongunchicho decidido caycänanchi imalatapis mana rurananchipaj ichic ichiclapa juchaman mana chayananchipaj.

13. ¿Imamantaj chayachimashwan mana ali yarpaycuna? (Fotucunatapis ricay).

¹³ Ima yarpashganchitapis cuidananchi (Éx. 20:17). Waquincuna nipäcun ‘mana alita yarpashgäcunawan manami juchalicuycächu’ nir, pero chayno yarparga quiquin engañacuycan. Pipis mana alicunaman imaypis yarpararga, más facilmi jatun juchaman tuninga. Chayta rurar quiquilanchi permitiycashwan tentaciunman chayananchipaj. Y mana ali yarpaycuna ilajpita chayamuptenga, jucla calpachacushwan chayman mana yarpar ali cajcunaman yarpänanchipaj. Imanomi mana ali guewata luquir o achur ushacächinchi mana winananpaj, chaynolami mana ali munayninchicunata ushacächir, juchaman mana chayashunchu (Filip. 4:8; Col. 3:2; Sant. 1:13-15).

14. ¿Ima mastataj rurananchi alcäbula caycänapaj tentaciunman mana tuninanchipaj?

¹⁴ ¿Ima mastataj rurananchi riccha ricchala caycänapaj tentaciunman mana tuninanchipaj? Chipyaypa convencido caycänanchi Jehová mandamashganchicunata cäsucur quiquinchi ali cawananchipaj cashganta. Ayvecis manami facilchu yarpayninchicuna y munayninchicuna Jehová munashganno cananpaj, ichanga chayno cananpaj calpachacuptinchi jaucala y cushishgala cawacushun.

15. ¿Imanirtaj calpachacushwan munayninchicuna Jehová munashganno cananpaj?

¹⁵ Calpachacushwanraj munayninchicuna Jehová munashganno cananpaj, chaypäga Amós nishganno rurashwan. Paymi nergan: “Mana alli cajtaga chiquiy. Alli cajtaga cuyay” (Amós 5:15, TDI). Chayta rurarga, yäracuyninchitapis sinchiyächishun y jucha rurayman manami chayashunchu. Y mana chaylachu: tentaciuncuna ilajpita yurimuptinpis ni yarpaylapis yarpäshunchu shongunchi munashganta rurananchipaj.

16. ¿Imanirtaj ocupado caycänanchi Jehovapa voluntaninta rurar? (Fotucunatapis ricay).

¹⁶ ¿Imata rurananchi ali cajman yarpänanchipaj? Ocupado caycänanchi Jehovapa voluntäninta rurar. Reuniuncunacho y predicaciunchopis Jehová munashganno cawananchipaj yachacunchi, chayga yanapämanchi juchaman fácil mana tuninapaj (Mat. 28:19, 20; Heb. 10:24, 25). Diospa Palabrantapis leir y chayman yarpachacur ali cajta cuyashun y mana ali cajta chiquishun (Jos. 1:8; Sal. 1:2, 3; 119:97, 101). Yarpärishun Jesús cayno nishganman: “Tayta Diosta manakäriy Satanásta ichipänaykipaq” (Mat. 26:41). Jehovata mañacunanchipäpis tiempunchita jorgushun, chaynopa paymi yanapämäshun y noganchipis lapan shongunchiwan calpachacushun pay munashganno cawanapaj (Sant. 4:8).

IMAYPIS RICCHA RICCHALA CAYCÄSHUN

17. ¿Imawantaj Pedruga cutin cutin luchargan?

¹⁷ Waquin debilidäninchicunata vencishwanmi, ichanga juchasapa cashganchiraycu waquincunata vencinapaj cutin cutin calpachacunanchirämi. Chayta tantiarinapaj apóstol Pedro ima pasashganta ricärishun. Payshi runacunata manchacoj, chaymi Jesusta quimsa cuti niegargan (Mat. 26:69-75). Tiempuwanga apóstol Pedro mana manchacuypa parlargan autoridäcunapa naupancho (Hech. 5:27-29). Ichanga watacuna pasariptin Judío cristianucuna “jamurpänanta mantsakushpan mana Israel wawqi panikunawan juntakaqnatsu” (Gál. 2:11, 12). Chaymi nishwan Pedruga débil cashganraycu yapay runacunata manchacur galaycurgan. Capazchi wanunancamayaj chaywan luchargan.

18. Pipis ‘chay tentaciunta vencishcänami’ niptinpis, ¿imaraj pasanman?

¹⁸ Noganchipis capaz chayno luchaycashwan, ‘unayna chay tentaciunta vencishcänami’ nirpis, capazchi yapay ilajpita chayman yarpar galaycushwan. Juc cristiano wilacun: “Chunca watana pornografía nishgan ganra rurayta mana ricargänachu, ‘chayta jaguishcänami’ nir yarpargä. Ichanga, mana shuyarashgä hora ilajpita yapay mana alicunaman yarpar galaycurgä”. Pay ichanga mana yamacäcurganchu, cuentata gocurgan cay munducho cawashgancamayaj jinala luchaycänanpaj cashganta. Ancianucunapis warminwan payta yanapashga pornografiata manana ricananpaj.

19. ¿Imataraj rurashwan ima debilidäninchi captinpis?

¹⁹ Ima debilidäninchi captinpis, ¿imataraj rurashwan chayga juchaman mana chayachimänanchipaj? Jesús apostulnincunata “rikchapäkuy” nishganman yarpäshun, chaynopa alcäbula caycänanchipaj. Jina ‘alina, fuertina sienticö’ nirpis, tentaciuncunapita cuidacunquiman (1 Cor. 10:12). Yanapämashganchi cajcunatapis rurar siguishun. Proverbios 28:14 nin tantiacoj “runaqa kushishqami kawan” (2 Ped. 3:14).

IMA BENDICIUNCUNATA CHASQUISHUN RICCHA RICCHALA CAYCAPTINCHI

20, 21. 1) ¿Ima bendiciuncunatataj tarishun riccha ricchala caycaptinchi? 2) Tentaciunman mana ishquinapaj calpachacuptinchi, ¿imanotaj Jehová yanapämäshun? (2 Corintios 4:7).

²⁰ Tentaciunman mana tuninapaj riccha ricchala caycaptinchi shumaj bendiciuncunata tarishun. Juchacunaman ishquerga ratulapämi cushicushwan, Jehová mandamashganchicunata rurarga ichanga imaycamapis cushishga cawacushun (Heb. 11:25; Sal. 19:8). Aumi, Jehovaga camamashcanchi pay munashganno cawacunanchipaj (Gén. 1:27). Pay munashganno cawaptinchi jauca jaucala imaycamayajpis cawashun (1 Tim. 6:12; 2 Tim. 1:3; Jud. 20, 21).

²¹ Juchayoj captinchi imaylapis tentaciunman tunishwan. Ichanga ama laquicäriychu, Jehovaga calpata gomäshun juchaman mana ishquinapaj (leiriy 2 Corintios 4:7). Tayta Diospa poderninwanmi ima tentaciuncunatapis vencishwan. Chayno captinpis quiquinchi waran waran calpachacunanchirämi juchaman mana ishquinapaj. Calpachacuptinchi y Jehovata mañacuptinchi paymi yanapämäshun y calpatapis gomäshun (1 Cor. 10:13). Aumi, Jehová yanapämaptinchiraj riccha ricchala caycäshun y ima tentaciuncunamanpis mana tunishunchu.