Jesús xeʼuchaʼ ri e 12 apóstoles

Are chiʼ Jesús weneʼ jun junabʼ rukʼ nikʼaj tajin chi kutzijoj ri utzij ri Dios, rajawaxik xuchaʼ ubʼanik jun jastaq che nim ubʼanik. ¿E jachin keʼuchaʼ rech kebʼe rukʼ areʼ xuqujeʼ kkikʼam ubʼe ri congregación cristiana? Are chiʼ majaʼ kubʼan waʼ, Jesús xutaʼ ri utobʼanik Jehová. Rumal laʼ xbʼe pa jun juyubʼ utukel rech ronojel ri chaqʼabʼ xubʼan uchʼawem. Chukabʼ qʼij, Jesús xeʼumulij jujun chke ri rajtijoxelabʼ chkixoʼl xeʼuchaʼ ri 12 apóstoles. ¿La awetaʼm kibʼiʼ jujun chke? Ri kibʼiʼ Pedro, Andrés, Santiago, Juan, Felipe, Bartolomé, Tomás, Mateo, Santiago ukʼojol Alfeo, Tadeo, Simón xuqujeʼ Judas Iscariote.

Ri e 12 xebʼin rukʼ Jesús. Areʼ xukʼut chkiwach ri kkibʼan che utzijoxik ri utzij ri Dios, kʼisbʼal re xeʼutaq bʼik kitukel. Xuqujeʼ, Jehová xuya kuʼinem chke rech kekesaj itzel taq uxlabʼal xuqujeʼ kekikunaj yawabʼibʼ.

Chuwach Jesús, ri e 12 apóstoles are e rachiʼl, xuqujeʼ xukubʼsaj ukʼuʼx chkij. Ri e fariseos kkichomaj che ri apóstoles e achijabʼ che kʼo ta kipatan xuqujeʼ kʼo ta ketaʼm. Are kʼu Jesús jeʼ ta xuchomaj. Areʼ e utijon chik rech qas utz kkibʼan che ri kichak. E areʼ kekʼojiʼ rukʼ Jesús pa taq ri qʼij che nim kibʼanik pa ri ukʼaslemal. Jun kʼutbʼal, kekʼojiʼ rukʼ are chiʼ majaʼ kkamisaxik xuqujeʼ are chiʼ kʼastajisam chik. Kʼi chke ajGalilea, junam rukʼ Jesús. Jujun chke e kʼulan chik.

Ri e apóstoles e ajmakibʼ, rumal laʼ jujun mul xesachik. Jujun mul xkichomaj ta na ri xkibʼij, jujun mul chik utz ta ri xkichaʼ ubʼanik. Amaqʼel taj xkʼojiʼ kipaciencia. Kʼo jujun mul xechʼojin chrij jachin chke ri más nim ubʼanik. Are kʼu e utz taq winaq che kkiloqʼoqʼej Jehová. E areʼ ri xemajin ri congregación cristiana are chiʼ kʼo Jesús pa ri uwach Ulew.