¿Jas kqetaʼmaj chrij ri xubʼij kan ri Jacob chke ri ocho ukʼojol are chiʼ ya mer kkamik?

1. ¿Jas kqil na pa wajun kʼutunem riʼ?

E JUNTIR ri ukʼojol ri Jacob kimulim kibʼ y tajin kkitatabʼej ri kubʼij chke chkijujunal. Pa ri nabʼe kʼutunem, xqilo ri xubʼij ri Jacob chke ri Rubén, ri Simeón, ri Leví y ri Judá y weneʼ ri nikʼaj chi kachalal xkimay ri xbʼix chke. ¿Jas kubʼij na riʼ ri Jacob chke ri ocho ukʼojol? Ri Zabulón, ri Isacar, ri Dan, ri Gad, ri Aser, ri Neftalí, ri José y ri Benjamín.a Chqilampeʼ jas kqetaʼmaj chrij ri xubʼij chke.

RI ZABULÓN

2. ¿Jas xubʼij ri Jacob che ri Zabulón, y jas xbʼan che utzʼaqatisaxik? (Génesis 49:13; xuqujeʼ chawilaʼ ri recuadro).

² (Chasikʼij Génesis 49:13). Ri Jacob xubʼij che ri Zabulón che kyaʼ na ri rulew chuchiʼ ri mar. Qʼaxinaq chi más che 200 junabʼ y ri tribu re Zabulón xrechbʼej ri rulew chuxoʼl ri mar re Galilea y ri mar Mediterráneo, junam rukʼ ri xubʼij kan ri Jacob. Y ri Moisés xubʼij wariʼ chrij ri Zabulón: «Chatkikotoq, Zabulón, kumal taq ri awelik bʼik» (Deut. 33:18). ¿Jasche xubʼij ri Moisés che kkikot na ri Zabulón? Xubʼij wariʼ rumal che ri rulew ri Zabulón kʼo chuxoʼl ri kebʼ mar y wariʼ kubʼano che kʼax ta kubʼan che uriqik ri pwaq.

3. ¿Jas kojtoʼwik rech amaqʼel kojkikotik?

³ Ri kqetaʼmaj: Kojkunik kojkikotik apastaneʼ ri lugar che kojel wi o kkʼextaj ri qakʼaslemal. Y ri kojtoʼwik are che kojkikot rukʼ ri kʼo qukʼ (Sal. 16:6; 24:5). Weneʼ jujun taq mul kojkikot taj y kqil ta ri kʼo qukʼ rumal che are más tajin kojchoman chrij ri kqarayij y kojkun ta che uriqik. Rumal laʼ are chqilaʼ ri kʼo qukʼ y chojkikot rukʼ (Gál. 6:4).

RI ISACAR

4. ¿Jas xubʼij ri Jacob che ri Isacar y jas xbʼan che utzʼaqatisaxik? (Génesis 49:14, 15; xuqujeʼ chawilaʼ ri recuadro).

⁴ (Chasikʼij Génesis 49:14, 15). Ri Jacob xubʼij utzalaj taq tzij che ri Isacar rumal che sibʼalaj kchakunik y qas knaw che ubʼanik ri uchak y xujunamaj rukʼ jun awaj (chikop) che krukʼaʼj alalaj taq eqaʼn. Y xubʼij che ri Isacar che kyaʼ na jun utzalaj ulew che. Y wariʼ xtzʼaqatik are chiʼ xrechbʼej ri rulew chunaqaj ri jaʼ Jordán (Jos. 19:22). Jun ulew che qas utz kel ri tikoʼn chilaʼ, qas xkikoj kichuqʼabʼ che uchakuxik ri ulew y xekitoʼ ri nikʼaj chik (1 Rey. 4:7, 17). Y ri tribu re Isacar xkiya ri kitobʼanik che ri juez Barac y ri profetisa Débora are chiʼ xechʼojin rukʼ Sísara (Juec. 5:15).

5. ¿Jasche rajawaxik kqakoj qachuqʼabʼ che upatanixik ri Jehová?

⁵ Ri kqetaʼmaj: Ri Jehová nim xril wi ri chak che xubʼan ri tribu re Isacar y je kubʼan kamik, nim kril wi ri chuqʼabʼ che kqakoj che upatanixik (Ecl. 2:24). Chojchoman chkij ri qachalal che kkikoj kichuqʼabʼ che kitoʼik ri nikʼaj chik pa ri congregación (1 Tim. 3:1). Ri e areʼ kekitoʼ pa ri kikojonik rech kuriq ta kʼax ri kachilanik rukʼ ri Jehová (1 Cor. 5:1, 5; Jud. 17-23). Y kkiya chʼabʼal che kuya kichuqʼabʼ ri qachalal pa ri congregación (1 Tim. 5:17).

RI DAN

6. ¿Jas eqeleʼn xyaʼ che ri Dan? (Génesis 49:17, 18; xuqujeʼ chawilaʼ ri recuadro).

⁶ (Chasikʼij Génesis 49:17, 18). Ri Jacob xubʼij che ri Dan che kjunamataj rukʼ jun kumatz che kkunik kutoʼ ribʼ chkiwach chikop che más e nimaʼq chuwach ri areʼ junam rukʼ jun kej. Ri tribu re Dan kkunik kutoʼ ri tinamit Israel chkiwach ri ukʼulel. Y wariʼ xilitajik are chiʼ ri Israel xok pa ri Tzujum Ulew, ri tribu re Dan are ri teren chkij rech keʼuchajij (Núm. 10:25). Paneʼ ri israelitas kkil ta ri tajin kubʼan ri tribu re Dan, pero nim ubʼanik ri chak che tajin kubʼano rumal che tajin keʼuchajij ri israelitas.

7. ¿Jas rajawaxik knaʼtaj chqe are chiʼ kqabʼan jujun taq chak pa ri utinamit ri Jehová?

⁷ Ri kqetaʼmaj: Kʼo jujun taq chak che kqabʼan pa ri utinamit ri Jehová che weneʼ ri nikʼaj kkil taj, junam rukʼ uchʼajchʼobʼisaxik ri Ja rech Ajawbʼal, tobʼanik pa ri e nim riqbʼal ibʼ y nikʼaj chik. We tajin kaya ri atobʼanik pa jujun chke ri e chak riʼ kqabʼij chawe che utz ri tajin kabʼano. Y masach pa ajolom che ri Jehová nim kril ri kabʼano. Y más na rumal che kabʼan ri chak riʼ rumal che kaloqʼoqʼej y kabʼan taj xa rumal che kawaj nim katil wi (Mat. 6:1-4).

RI GAD

8. ¿Jasche ri tribu re Gad xbʼan kʼax che kumal ri ukʼulel are chiʼ kʼo chi pa ri Tzujum Ulew? (Génesis 49:19; xuqujeʼ chawilaʼ ri recuadro).

⁸ (Chasikʼij Génesis 49:19). Ri Jacob xubʼij che kbʼan na kʼax che ri tribu re Gad kumal elaqʼomabʼ. Y wariʼ xtzʼaqatik are chiʼ qʼaxinaq chi 200 junabʼ are chiʼ ri tribu re Gad xyaʼ ri rulew pa ri relebʼal qʼij (este) re ri jaʼ Jordán y naqaj che e kʼo itzel taq winaq y weneʼ are ri winaq riʼ ri xebʼanow kʼax che. Pero ri e areʼ xkaj xekanaj chilaʼ rumal che kʼo kkitij ri kawaj chilaʼ (Núm. 32:1, 5). ¡Ri tribu re Gad xkixeʼj ta kibʼ chkiwach ri itzel taq winaq! Y xkikubʼsaj kikʼuʼx che ri Jehová keʼutoʼ na rech ktoqix ta ri kulew che xuya chke. Y ri tribu re Gad xeʼutaq bʼi ri rajchʼojabʼ che kitoʼik nikʼaj chi tribus rech kkichʼak más ulew che kʼo pa ri uqajibʼal qʼij (oeste) re ri jaʼ Jordán (Núm. 32:16-19). Xkikubʼsaj kikʼuʼx che ri Jehová keʼuchajij kan ri kixoqil y ri kalkʼwal. Y ri Jehová xeʼutewchij rumal che xekitoʼ e nikʼaj chik (Jos. 22:1-4).

9. ¿Jas kqabʼan riʼ we kqakubʼsaj qakʼuʼx chrij ri Jehová?

⁹ Ri kqetaʼmaj: Rech kqaya ta kan upatanixik ri Jehová, rajawaxik kqakubʼsaj qakʼuʼx chrij are chiʼ kqariq kʼax (Sal. 37:3). Kamik, e kʼi qachalal tajin kkikoj kichuqʼabʼ y tajin ketobʼan che uyakik Ja rech Ajawbʼal, kebʼe pa jun chi lugar jawiʼ kajwataj wi más tobʼanik che utzijoxik ri utzij ri Dios y kkiya ri kitobʼanik pa ri congregación. Kkibʼan wariʼ rumal che kkikubʼsaj kikʼuʼx che ri Jehová keʼuchajij na (Sal. 23:1).

RI ASER

10. ¿Jas ri utz ta xubʼan ri tribu re Aser? (Génesis 49:20; xuqujeʼ chawilaʼ ri recuadro).

¹⁰ (Chasikʼij Génesis 49:20). Ri Jacob xubʼij che ri tribu re Aser kuriq na qʼinomal. Y qas jeʼ xbʼantajik are chiʼ xrechbʼej jujun chke ri ulew che qas kuya ri uwachinik (Deut. 33:24). Ri rulew ri tribu re Aser kopan chuchiʼ ri mar Mediterráneo y kokʼow pa ri tinamit fenicia re Sidón, jawiʼ keʼopan wi ri barcos che kukʼam bʼi kʼi jastaq ri kpe pa jun chi tinamit. Pero ri tribu re Aser xekesaj ta bʼi ri cananeos chilaʼ rumal laʼ xkibʼan ke ri itzel taq jastaq che kkibʼano (Juec. 1:31, 32). Weneʼ wariʼ y ri kiqʼinomal xubʼano che xkipatanij ta chi ri Jehová rukʼ kikotemal. Y are chiʼ ri Barac xutaʼ ri kitobʼanik rech kechʼojin kukʼ ri cananeos, ri areʼ xkiya ta ri kitobʼanik. Y rumal laʼ xkil taj are chiʼ ri Jehová xeʼutoʼ ri israelitas pa kiqʼabʼ ri kikʼulel (Juec. 5:19-21). Y qas xekʼix riʼ are chiʼ ri Jehová xubʼano che ri Barac y ri Débora xkibʼij pa ri kibʼixonem che ri Aser xaq xetʼuyiʼ kan chuchiʼ ri mar y xetobʼan ta pa ri chʼoj (Juec. 5:17).

11. ¿Jasche utz taj che are más nim kqil wi ri qʼinomal?

¹¹ Ri kqetaʼmaj: Rech kqapatanij ri Jehová rukʼ ronojel qanimaʼ utz taj che kqabʼan qe junam rukʼ ri kkibʼan ri winaq che más kbʼe kanimaʼ che utzukuxik pwaq (Prov. 18:11). Qastzij wiʼ che kajwataj pwaq chqe, pero kqaj taj che más nim ubʼanik chuwach uqʼijilaxik ri Jehová (Ecl. 7:12; Heb. 13:5). Kqaya ta qa tiempo che utzukuxik jastaq che rajawaxik ta chqe, xaneʼ are más kqapatanij ri Jehová y kqakubʼsaj qakʼuʼx che ri areʼ kojutewchij na pa ri kʼakʼ uwach Ulew (Sal. 4:8).

RI NEFTALÍ

12. ¿Jampaʼ xtzʼaqat ri xubʼij kan ri Jacob chrij ri Neftalí che kubʼij na jeʼlalaj taq tzij? (Génesis 49:21; xuqujeʼ chawilaʼ ri recuadro).

¹² (Chasikʼij Génesis 49:21). Ri Jacob xubʼij che ri Neftalí che kubʼij na jeʼlalaj taq tzij. Ri xubʼij kan ri Jacob weneʼ xtzʼaqatik rukʼ ri xubʼan ri Jesús che utzijoxik ri utzij ri Dios chke ri winaq (Juan 7:46). Ri areʼ naj tiempo xkʼojiʼ pa Capernaúm, che are u territorio ri Neftalí, y rumal laʼ ri Biblia kubʼij che are ri utinamit (Mat. 4:13; 9:1). Y ri Isaías xubʼij che ri Jesús kux na jun luz chke ri winaq re Zabulón y Neftalí (Is. 9:1, 2). Ri Jesús are «ri qas luz ri ktunun pa kiwiʼ konojel kiwach winaq» rumal ri xukʼut chkiwach (Juan 1:9).

13. ¿Jas rajawaxik kqabʼano rech kkikot ri Jehová qukʼ?

¹³ Ri kqetaʼmaj: Ri Jehová krilo ri kqabʼij y jas kqabʼan che ubʼixik. Rumal laʼ we kqaj che kkikot qumal, qas kqachomaj na ri kqabʼij y kqabʼij ta molom taq tzij (Sal. 15:1, 2). Xuqujeʼ kqabʼij utz taq tzij chke nikʼaj chik, kqabʼij ri utz che tajin kkibʼano, xaq ta kojchʼachʼat chkij y kqabʼilaʼ ta chke nikʼaj chik ri kesach wi (Efes. 4:29). Xuqujeʼ rajawaxik kqatijoj qibʼ rech kʼax ta kqabʼano kojtzijon kukʼ ri winaq y we kuya bʼe kojkunik kqatzijoj ri utzij ri Dios chke.

RI JOSÉ

14. ¿Jampaʼ xtzʼaqat ri xubʼij ri Jacob chrij ri José? (Génesis 49:22, 26; xuqujeʼ chawilaʼ ri recuadro).

¹⁴ (Chasikʼij Génesis 49:22, 26). Qas xkikot riʼ ri Jacob rumal che ri José xchaʼ rumal ri Jehová. Ri Jacob xubʼij che ri José che are utux jun cheʼ. Ri Jacob are ri cheʼ y ri José are ri utux re wajun cheʼ riʼ. Ri José are ri nabʼe ralkʼwal ri Jacob che xkʼojiʼ rukʼ ri Raquel, ri rixoqil che más loqʼ chuwach. Ri Jacob xubʼij che ri José che krechbʼej na ri tewchibʼal che xyaʼ ta che ri Rubén, ri nabʼeʼal ukʼojol che xkʼojiʼ rukʼ Lea, ri jun chi rixoqil (Gén. 48:5, 6; 1 Crón. 5:1, 2). Wajun profecía riʼ xtzʼaqatik are chiʼ ri kebʼ ukʼojol ri José, ri Efraín y Manasés xeʼux tribus rech Israel y chkijujunal xyaʼ kulew (Gén. 49:25; Jos. 14:4).

15. ¿Jas xubʼan ri José are chiʼ xbʼan kʼax che?

¹⁵ Ri Jacob xubʼij che itzel kil na wi ri José y kkʼaq flechas chrij (Gén. 49:23). Ri xebʼanow kʼax che are ri e rachalal che itzel xkil wi y che xkibʼan kʼax che paneʼ kʼo ta umak. Pero ri José xukʼol ta oyowal chkij ri rachalal y xpe ta royowal chrij ri Jehová. Y junam rukʼ ri xubʼij ri Jacob: «E kʼo kʼu kowilaj taq uqʼabʼ [...] amaqʼel ko utanim ri ukʼiʼaqbʼal chʼabʼ» (Gén. 49:24). Xukubʼsaj ukʼuʼx chrij ri Jehová, xukuy kimak ri e rachalal y xutzalij ta ukʼaxel ri kʼax chke (Gén. 47:11, 12). Ri kʼax che xbʼan che xutoʼo rech xukʼut utz taq bʼantajik (Sal. 105:17-19). Rumal laʼ ri Jehová xukojo rech xutoʼ ri utinamit.

16. ¿Jas kqabʼan che resaxik uwach ri José are chiʼ kbʼan kʼax chqe?

¹⁶ Ri kqetaʼmaj: Maqayaʼ bʼe che ri kʼax che kqariqo o kbʼan chqe kubʼano che kqapatanij ta chi ri Jehová y keqachʼabʼej ta chi ri qachalal. Ri Jehová kuyaʼo che kqariq kʼax o kbʼan kʼax chqe rech kojux más utz taq winaq (Heb. 12:7, nota). Je wariʼ kel qakʼuʼx chke ri nikʼaj chik y kqakuy kimak (Heb. 12:11). Y ri Jehová kojutewchij na junam rukʼ ri xubʼan rukʼ ri José.

RI BENJAMÍN

17. ¿Jampaʼ xtzʼaqat ri xubʼij ri Jacob chrij ri Benjamín? (Génesis 49:27; xuqujeʼ chawilaʼ ri recuadro).

¹⁷ (Chasikʼij Génesis 49:27). Nabʼe ri Jacob xubʼij che ri tribu re Benjamín kejunamataj kukʼ lobos, rumal che kkixeʼj ta kibʼ kechʼojin kukʼ ri kikʼulel (Juec. 20:15, 16; 1 Crón. 12:2). Tekʼuriʼ xubʼij chik «aqʼabʼil» y «bʼenaq qʼij». Are chiʼ xubʼij «aqʼabʼil» are tajin kchʼaw chrij are chiʼ ri Saúl che petinaq pa ri tribu re Benjamín, xux ri nabʼe rey pa Israel y xchʼojin kukʼ ri filisteos (1 Sam. 9:15-17, 21). Y are chiʼ xubʼij «bʼenaqʼij», are tajin kubʼij ri kbʼantaj na, are chiʼ kʼo ta chi nijun rey pa Israel, y ri reina Ester y ri Mardoqueo, che e petinaq pa ri tribu rech Benjamín, kekiqʼatej na kiwach ri persas rech kekikamisaj ta ri israelitas (Est. 2:5-7; 8:3; 10:3).

18. ¿Jas kqabʼan che resaxik uwach ri tribu re Benjamín?

¹⁸ Ri kqetaʼmaj: Sibʼalaj xekikot riʼ ri tribu re Benjamín are chiʼ xchaʼ ri Saúl che rey, rumal che tajin ktzʼaqat ri profecía che xubʼij kan ri Jacob. Pero are chiʼ ri Jehová xuchaʼ ri David che rey, che petinaq pa ri tribu re Judá, ri tribu re Benjamín xkiya ri kitobʼanik che (2 Sam. 3:17-19). Y are chiʼ xqʼax ri tiempo, ri nikʼaj chi tribus xkiya ta chi ri kitobʼanik che ri tribu re Judá, pero ri tribu re Benjamín amaqʼel xuya ri utobʼanik che (1 Rey. 11:31, 32; 12:19, 21). Kamik, ri oj kqesaj uwach ri tribu re Benjamín are chiʼ kqaya ri qatobʼanik chke ri achijabʼ che e uchaʼom ri Jehová rech kkikʼam qabʼe (1 Tes. 5:12).

19. ¿Jas kqetaʼmaj chrij juntir ri xubʼij kan ri Jacob are chiʼ ya mer kkamik?

¹⁹ Kʼi xqetaʼmaj chrij ri xubʼij kan ri Jacob. We kqanikʼoj chi jumul, kubʼano che más knimar ri qakojonik chrij ri Jehová y qas kqakojo che qas kutzʼaqatisaj na ri ubʼim. Y we kojchoman chrij ri xubʼan ri Jehová che kitewchixik ri ralkʼwal ri Jacob, kojutoʼ che rilik ri rajawaxik kqabʼano rech kkikot ri Jehová qukʼ.