¿Jas kqabʼan che kitoʼik ri estudiantes rech kkichaʼ upatanixik ri Jehová?

1, 2. a) ¿Jasche jujun estudiantes kkixiʼj kibʼ keʼux testigos rech Jehová? b) ¿Jas kqil na pa wajun kʼutunem riʼ?

¿LA KʼO xbʼanow chawe che xaxiʼj awibʼ are chiʼ xachomaj upatanixik ri Jehová? Weneʼ xachomaj che kpe koyowal ri a familia, ri awamigos y ri awachiʼl pa chak. O weneʼ xachomaj che katkun ta che ubʼanik ri kutaʼ ri Jehová chawe. We xakʼulmaj wariʼ, kachʼobʼ riʼ jasche jujun estudiantes kkixiʼj kibʼ kkichaʼ upatanixik ri Jehová.

² Ri Jesús retaʼm che ri xibʼin ibʼ kuqʼatej jun winaq rech kupatanij ta ri Jehová (Mat. 13:20-22). Rumal laʼ ri areʼ xuya ta kan kitoʼik ri xkixiʼj kibʼ keʼux u discípulos. Y we kqabʼan qe jachaʼ ri xubʼan ri Jesús, kojkun riʼ keqatoʼ ri estudiantes rech 1) kkilo jas tajin keqʼaten che upatanexik ri Jehová, 2) kkiloqʼoqʼej más ri Jehová, 3) kkiya más ki tiempo che upatanexik y 4) rech ketaʼm jas kkibʼano are chiʼ kkiriq kʼax. Cheqatoʼo ri estudiantes junam rukʼ ri xubʼan ri Jesús rech kkipatanij ri Jehová y chqakojoʼ ri wuj Kʼaslemal kʼo ta ukʼisik.

CHEQATOʼ RI ESTUDIANTES CHE RILIK JAS TAJIN KEQʼATEN CHE UPATANIXIK RI JEHOVÁ

3. ¿Jas weneʼ xqʼaten ri Nicodemo rech xux u discípulo ri Jesús?

³ Ri Nicodemo are jun kʼamal bʼe ke ri judíos ojer. Paneʼ ri Jesús kʼateʼ seis meses umajim utzijoxik ri utzij ri Dios, ri Nicodemo ya retaʼm chik che ri Jesús are ri Mesías, pero xkun taj xux u discípulo ri Jesús (Juan 3:1, 2). Paneʼ je wariʼ are kʼu xtzijon rukʼ ri Jesús utukel rumal che kuxiʼj ribʼ chkiwach ri judíos (Juan 7:13; 12:42). Weneʼ xuchomaj che kesax ri eqeleʼn che rumal che kux u discípulo ri Jesús.a

4. ¿Jas xubʼan ri Jesús che utoʼik ri Nicodemo rech kuchʼobʼo che kkunik kupatanij ri Dios?

⁴ Ri Nicodemo kuchʼobʼ ri Ley che xyaʼ che ri Moisés, pero xajwataj tobʼanik che rech kuchʼobʼo che kkunik kupatanij ri Jehová. Rumal laʼ ri Jesús xuya ri u tiempo che utoʼik. Paneʼ taneʼ chaqʼabʼ chik. Xubʼij che che rajawaxik kubʼan arrepentir ribʼ che ri umak, kkojon chrij ri Ukʼojol ri Dios y kubʼan u bautismo rech kkunik kux u discípulo ri Jesús (Juan 3:5, 14-21).

5. ¿Jas kqabʼan che utoʼik jun estudiante rech krilo jasche uchaʼom ta upatanexik ri Jehová?

⁵ Weneʼ jun estudiante uchaʼom ta upatanixik ri Jehová paneʼ kʼo chi nim retaʼmabʼal chrij ri Biblia. Rumal laʼ rajawaxik kqatoʼo rech kuchʼobʼo jas tajin kqʼaten che upatanexik ri Jehová. Weneʼ rumal ri uchak, o rumal ri u familia rumal che kkaj taj kux Testigo. Kojkunik kqatoʼ ri estudiante junam rukʼ ri xubʼan ri Jesús. Weneʼ kqabʼan invitar rech kutij jun uwa qukʼ o rech kojbʼe pa waʼkatem. Y rumal che xaq qatukel oj kʼo rukʼ weneʼ kubʼij chqe jas ri tajin kukʼulmaj. Y rukʼ wariʼ kojkunik kqakʼut chuwach jas ri rajawaxik kubʼano rech kkunik kupatanij ri Jehová y jeriʼ kukʼutu che qas kuloqʼoqʼej y che kubʼan ta wariʼ xa rumal che oj xojbʼin che.

6. ¿Jas kqabʼan che utoʼik jun estudiante rech kubʼan pa ri ukʼaslemal ri tajin kretaʼmaj? (1 Corintios 16:13).

⁶ Rech jun estudiante kubʼan pa ri ukʼaslemal ri tajin kretaʼmaj, rajawaxik kuchʼobʼo che ktoʼ na rumal ri Jehová (chasikʼij 1 Corintios 16:13). ¿Y jas kabʼan at che utoʼik? Chatchoman chrij are chiʼ xatbʼe pa ri escuela. ¿La mat qastzij che are más utz xawil ri maestro che xukʼut paciencia awukʼ y xatutoʼo? Chakojoʼ achuqʼabʼ rech ri at je kabʼan rukʼ ri estudiante. Xaq xiw ta kabʼij che che rajawaxik kubʼan ri kraj ri Dios che kubʼano. Xaneʼ rajawaxik kabʼij che che ktoʼ na rumal ri Jehová rech kukʼex ri ukʼaslemal y kkunik kupatanij. ¿Jas más kabʼan che utoʼik?

CHEQATOʼO RI ESTUDIANTES RECH MÁS KKILOQʼOQʼEJ RI JEHOVÁ

7. ¿Jas xubʼan ri Jesús che kitoʼik ri winaq rech kkiloqʼoqʼej más ri Jehová?

⁷ Ri Jesús retaʼm che ri u discípulos tajin kkibʼan pa ri kikʼaslemal ri kubʼij ri Dios rumal che kkiloqʼoqʼej. Rumal laʼ ri Jesús xeʼutoʼo rech más kkiloqʼoqʼej ri Jehová. Y xujunamaj ri Jehová rukʼ jun tat che kuya utz taq jastaq chke ri ralkʼwal (Mat. 7:9-11). Weneʼ jujun chke ri winaq che tajin kkitatabʼej ri Jesús xkʼut ta loqʼoqʼebʼal chke rumal ri kitat. ¿Jas xkinaʼ riʼ are chiʼ ri Jesús xchʼaw chrij ri tat che kukuy umak ri ukʼojol che xubʼan itzel taq jastaq? Qas xkichʼobʼ riʼ che e loqʼ ri winaq chuwach ri Jehová (Luc. 15:20-24).

8. ¿Jas kqabʼan che utoʼik jun estudiante rech kuloqʼoqʼej más ri Jehová?

⁸ Are chiʼ kakʼut chuwach ri estudiante ri utz taq ubʼantajik ri Jehová tajin katoʼo rech kuchʼobʼ más uwach y kuloqʼoqʼej. Are chiʼ tajin kibʼan estudiar ri Biblia chakʼutuʼ chuwach che ri tajin kretaʼmaj kukʼutu che ri Jehová sibʼalaj kuloqʼoqʼej. Y are chiʼ kixchʼaw chrij ri ukamikal ri Jesús, chatoʼo rech kuchʼobʼo che are jun sipanik che xuya ri Jehová che (Rom. 5:8; 1 Juan 4:10). Ri estudiante más kuloqʼoqʼej riʼ ri Jehová are chiʼ kuchʼobʼo che sibʼalaj kloqʼoqʼex rumal (Gál. 2:20).

9. ¿Jas xtoʼw ri qachalal Michael rech xkunik xukʼex ri ukʼaslemal?

⁹ Chqilaʼ ri xukʼulmaj ri qachalal Michael, che kel pa Indonesia. Are chiʼ nitzʼ na, xretaʼmaj chrij ri Jehová pero xubʼan ta u bautismo. Xuriq uchak pa jun chi tinamit are chiʼ 18 ujunabʼ. Tekʼuriʼ xtzalij chi pa Indonesia, xkʼuliʼk y xkʼojiʼ jun umiʼal, pero jumul chik xuya chi kan ri utinamit rumal ri uchak. Xqʼax ri tiempo, ri rixoqil y ri umiʼal xkimaj jun etaʼmanik re ri Biblia y xkibʼan pa ri kikʼaslemal ri tajin kketaʼmaj. Ri qachalal Michael xtzalij pa ri utinamit are chiʼ xkam ri unan, rech kuchajij ri utat y xraj xyaʼ jun etaʼmanik re ri Biblia che. Qas xopan pa ranimaʼ ri xretaʼmaj pa ri sección «Chanimarisaj ri awetaʼmanik» re ri kʼutunem 27 re ri wuj Kʼaslemal kʼo ta ukʼisik. Xutzoqopij oqʼej are chiʼ xchoman chrij ri bʼis che xunaʼ ri Jehová are chiʼ xkamisax ri Jesús. Wariʼ xutoʼo rech kubʼan pa ri ukʼaslemal ri tajin kretaʼmaj y xubʼan ri u bautismo.

CHEQATOʼO RI ESTUDIANTES RECH KKIYA MÁS KI TIEMPO CHE UPATANIXIK RI JEHOVÁ

10. ¿Jas xubʼan ri Jesús che kitoʼik ri nabʼe taq u discípulos rech kkipatanij más ri Jehová? (Lucas 5:5-11; xuqujeʼ chawilaʼ ri wachbʼal).

¹⁰ Ri nabʼe taq discípulos ketaʼm chik che ri Jesús are ri Mesías, pero rajawaxik kkichʼobʼo che ri utzijoxik ri utzij ri Dios are ri más nim ubʼanik pa ri kikʼaslemal. Ri Pedro y ri Andrés weneʼ más che seis meses chik e u discípulos ri Jesús are chiʼ xubʼij chke che keteriʼ chrij y kkipatanij ri Jehová pa tiempo completo (Mat. 4:18, 19). Ri Pedro, ri Andrés, ri Santiago y ri Juan, kʼo jun ki negocio che are uchapik y ukʼayixik kar (Mar. 1:16-20). Are chiʼ ri Pedro y ri Andrés xeteriʼ chrij ri Jesús pa tiempo completo, xkilo ri xkibʼano rech kʼo ri kajwataj che ri ki familia. ¿Jas xetoʼw che uchʼobʼik che ri upatanixik ri Jehová are ri más nim ubʼanik? Ri Lucas kubʼij che are chiʼ ri Jesús xubʼan jun milagro, ri Pedro y ri Andrés xkichʼobʼo che ri Jehová kuya na ri kajwataj chke (chasikʼij Lucas 5:5-11).

11. ¿Jas kojkunik kqabʼano rech ri estudiante kukubʼsaj más ukʼuʼx chrij ri Jehová?

¹¹ Paneʼ kojkun taj kqabʼan milagros junam rukʼ ri Jesús, pero kojkunik kqabʼij che ri estudiante ri kubʼan ri Jehová che kitoʼik ri kkikoj kichuqʼabʼ che upatanixik. Rumal laʼ, chabʼij che ri xubʼan ri Jehová che atoʼik are chiʼ xamajij bʼenam pa ri e riqbʼal ibʼ. Xuqujeʼ chabʼij che ri xubʼan ri Jehová che atoʼik are chiʼ xabʼij che ri a patrón che kawaj taj matam katel bʼik pa ri qʼij re ri riqbʼal ibʼ. Y chabʼij che che are chiʼ xabʼan wariʼ, xatkunik xawilo che ri Jehová amaqʼel katutoʼo y wariʼ xubʼano che más xakubʼsaj akʼuʼx chrij.

12. a) ¿Jasche utz jalajoj qachalal keqakʼam bʼik are chiʼ kojbʼe rukʼ ri estudiante? b) Chabʼij rukʼ jun ejemplo ¿jas más kabʼan che utoʼik ri estudiante?

¹² Nim ktobʼan riʼ che ri estudiante are chiʼ kuto jas ubʼanom ri Jehová che kitoʼik nikʼaj chi qachalal. Rumal laʼ utz keʼabʼan invitar e nikʼaj chi qachalal rech kebʼe awukʼ y kkibʼij che ri estudiante ri xkibʼan che retaʼmaxik uwach ri Jehová y ri xkibʼano rech kkipatanij más. Y utz che keʼiwil ri videos che e kʼo pa ri secciones «Chanimarisaj ri awetaʼmanik» o «Chawilaʼ chi nikʼaj», re ri wuj Kʼaslemal kʼo ta ukʼisik. Jun chke ri videos riʼ are Jehová kuya na ri kajwataj chqe, che kʼo pa ri kʼutunem 37.

CHEQATOʼ RI ESTUDIANTES RECH KETAʼM JAS KKIBʼANO ARE CHIʼ KKIRIQ KʼAX

13. ¿Jas xubʼan ri Jesús che kitoʼik ri u discípulos rech kkichʼij ri kʼax che kkiriq na?

¹³ Ri Jesús kʼi mul xubʼij chke ri u discípulos che itzel keʼil na kumal ri ki familia (Mat. 5:11; 10:22, 36). Are chiʼ majaʼ kkamisaxik, ri Jesús xubʼij chke ri u discípulos che weneʼ kekamisax na (Mat. 24:9; Juan 15:20; 16:2). Rech kekunik kkitzijoj ri utzij ri Dios, xubʼij chke che utz taj kechʼojin kukʼ ri winaq ri kbʼanow kʼax chke.

14. ¿Jas kqabʼan che kitoʼik ri estudiantes rech ketaʼm ri kkibʼan chuwach jun kʼax? (2 Timoteo 3:12).

¹⁴ Junam rukʼ ri Jesús, ri oj xuqujeʼ kojkunik keqatoʼ ri estudiantes rech ketaʼm ri kkibʼano o ri kkibʼij are chiʼ ri kamigos, ri ki familia o ri kachiʼl pa chak kkibʼij chke che utz ta ri tajin kkibʼano (chasikʼij 2 Timoteo 3:12). Weneʼ ktzeʼx kiwach rumal che tajin kkibʼan ri kubʼij ri Biblia. Utz keqatoʼo rech ketaʼm ri kkibʼano are chiʼ kbʼan kʼax chke. Kʼateʼ ta keqatoʼo are chiʼ e kʼo chi chuwach ri kʼax.

15. ¿Jas kqabʼan che utoʼik ri estudiante are chiʼ ri u familia kpe koyowal chrij?

¹⁵ We petinaq koyowal ri u familia ri estudiante chrij, chatoʼo che rilik jasche petinaq koyowal. ¿La kkichomaj che xa tajin kbʼan engañar? ¿La xa itzel kekil wi ri Testigos? Ri Jesús je xukʼulmaj rumal che jujun chke ri u familias xkibʼij che xa xmoxirik (xkonirik) (Mar. 3:21; Juan 7:5). Rumal laʼ ri estudiante rajawaxik kukʼut paciencia y kpe ta royowal are chiʼ ktzijon kukʼ ri u familias.

16. ¿Jas kqabʼan che utoʼik ri estudiante are chiʼ kchʼaw chrij ri Biblia kukʼ ri u familia?

¹⁶ Are chiʼ jun u familiar jun estudiante kraj kretaʼmaj chrij ri Biblia, utz che kubʼij ta ronojel che rech kkʼis taj ta ukʼuʼx y jeriʼ kretaʼmaj más. Rumal laʼ chabʼij che che utz kubʼan che uqʼalajisaxik y kukoj ta tzij che kʼax uchʼobʼik (Col. 4:6). Xuqujeʼ chabʼij che che kkunik kukʼut ri qakʼolbʼal re internet chkiwach ri u familia rech jeriʼ kkiriq más información chkij ri testigos rech Jehová.

17. ¿Jas kabʼan che utoʼik ri estudiante che uchʼobʼik jawiʼ kuriq wi u respuestas ri preguntas che weneʼ kbʼan che? (Xuqujeʼ chawilaʼ ri wachbʼal).

¹⁷ Katkunik kakʼut ri sección «Preguntas che kbʼan chkij ri testigos rech Jehová» re jw.org chuwach ri estudiante rech kuriq ri u respuestas ri preguntas che weneʼ kkibʼan ri u familiares che o ri rachiʼl pa ri chak (2 Tim. 2:24, 25). Y masach chawe ri recuadro ubʼiʼ «Ri kkichomaj jujun winaq» re ri wuj Kʼaslemal kʼo ta ukʼisik. Chabʼanaʼ ensayar rukʼ jas kubʼan che utzalixik uwach ri preguntas che weneʼ kbʼan che. Y je wariʼ kutoʼ uwiʼ ri tajin kretaʼmaj pa ri Biblia.

18. ¿Jas kabʼan che utoʼik ri estudiante rech kraj kutzijoj ri utzij ri Dios rukʼ ri congregación? (Mateo 10:27).

¹⁸ Ri Jesús xubʼij chke ri u discípulos che rajawaxik kkitzijoj ri utzij ri Dios chke konojel ri winaq (chasikʼij Mateo 10:27). Are chiʼ ri estudiante kumajij utzijoxik ri utzij ri Dios, qas kril riʼ che ktoʼ na rumal ri Jehová. Rumal laʼ are chiʼ kmajix ujachik ri invitaciones re ri ukamikal ri Jesús o rech taq ri nim riqbʼal ibʼ, katkunik kabʼan invitar ri estudiante rech kel rukʼ ri congregación che ujachik ri invitaciones. Katkunik kabʼij che che ktzijon kukʼ ri kʼamal taq bʼe rech kuya asignaciones pa ri e riqbʼal ibʼ re entre semana. Wariʼ nim ktobʼan wi che rech kuxiʼj ta ribʼ kutzijoj ri utzij ri Dios.

CHAKʼUTUʼ CHUWACH RI ESTUDIANTE CHE KAKOJO CHE KKUNIK KUPATANIJ RI JEHOVÁ

19. ¿Jas xubʼan ri Jesús che ukʼutik che kukubʼsaj ukʼuʼx chkij ri u discípulos y jas kqabʼan oj che resaxik uwach?

¹⁹ Are chiʼ ri Jesús majaʼ kbʼe pa ri kaj xubʼij chke ri u discípulos che kekʼojiʼ na rukʼ. Ri discípulos xkichʼobʼ taj jasche xubʼij wariʼ chke. Pero ri Jesús are ta laʼ ri xrilo xaneʼ xrilo che e utz taq winaq (Juan 14:1-5, 8). Ri Jesús xuchʼobʼo che rajawaxik tiempo chke rech kketaʼmaj chrij ri kʼaslemal pa ri kaj (Juan 16:12). Ri oj xuqujeʼ kqakʼut chkiwach ri qa estudiantes che kqakubʼsaj qakʼuʼx che kkipatanij na ri Jehová.

20. ¿Jas xubʼan ri qachalal Marta che ukʼutik che kukubʼsaj ukʼuʼx chrij ri u estudiante?

²⁰ Nim ubʼanik che kqakubʼsaj qakʼuʼx che ri estudiante kraj kupatanij ri Jehová. Ri qachalal Marta che kel pa Malaui xumaj uyaʼik jun etaʼmanik re ri Biblia che jun ali católica ubʼiʼ Patricia.b Are chiʼ xeʼopan pa ri kʼutunem 14 re ri wuj Kʼaslemal kʼo ta ukʼisik, ri qachalal Marta xutaʼ che ri ali jas kuchomaj chrij kikojik tyox. Ri al Patricia xpe royowal y xubʼij: «¡In kinilowik we kenqʼijilaj o kenqʼijilaj taj!». Ri qachalal Marta xuchomaj we kuya na etaʼmanik che o ya no. Pero xuya ta kan uyaʼik ri etaʼmanik che, xaneʼ xukubʼsaj ukʼuʼx che weneʼ ri al Patricia kuya na cuenta che che utz taj keqʼijilax tyox. Qʼaxinaq chi kebʼ oxibʼ ikʼ, ri qachalal Marta xubʼan wajun pregunta che ri al Patricia che kʼo pa ri kʼutunem 34, «¿Jas atutoʼm wi retaʼmaxik chrij ri Biblia y retaʼmaxik más chrij ri Jehová?». Ri qachalal Marta xubʼij: «Ri al Patricia xubʼij che ri oj testigos rech Jehová kqabʼan utz taq jastaq y jun chke ri xubʼij are che kqaxutuj ri kubʼij ri Biblia che utz taj». Are chiʼ xqʼax ri tiempo ri al Patricia xeʼukoj ta chi tyox y xubʼan ri u bautismo.

21. ¿Jas kqabʼan che utoʼik jun estudiante rech kupatanij ri Jehová?

²¹ Paneʼ are ri Dios ri kbʼanowik che ri winaq kuchaʼ upatanixik, pero kojkunik kojtobʼan rukʼ ri Jehová rech ri winaq kuchaʼ ubʼanik wariʼ (1 Cor. 3:7). Xaq xiw ta kqabʼij che ri winaq ri kutaʼ ri Jehová, xaneʼ kqatoʼo rech kuloqʼoqʼej más, rech krilo che ri upatanixik ri Jehová are ri más nim ubʼanik pa ri ukʼaslemal y kqatoʼo rech kukubʼsaj ukʼuʼx che ktoʼ na rumal ri Jehová are chiʼ kuriq kʼax. Are chiʼ ri estudiante krilo che kqakubʼsaj qakʼuʼx chrij, wariʼ kubʼano che qas kukojo che kkunik kupatanij ri Jehová.