Qas xqilo che kʼo ri kajwataj pa ri Ja rech Ajawbʼal rech kqachajij qibʼ chuwach ri COVID-19

Pa nabʼe re marzo pa jw.org xyaʼ ubʼixik wariʼ: «Rukʼ kikotemal kqabʼij chiwe che ri Jupuq Ajkʼamal bʼe cho ronojel uwach Ulew xubʼij che we ri e qʼatal taq tzij kʼo ta kkibʼij, konojel ri congregaciones kekun chik kkimulij kibʼ pa ri nabʼe semana re abril». ¡Qonojel ri oj testigos rech Jehová sibʼalaj xojkikotik are chiʼ xqata wariʼ! Are kʼu ri pandemia kʼa kʼo na.a Rech kechajix ri keʼopan pa ri riqbʼal ibʼ xsukʼumax jujun taq jastaq. ¿Jas rajawaxik xbʼanik rech ri testigos rech Jehová xekunik xkimulij kibʼ pa ri Ja rech Ajawbʼal paneʼ qʼaxinaq chi kebʼ junabʼ che e bʼenaq taj?

Ri e qachalal kʼi taq ikʼ chik tajin kkisukʼumaj ri Ja rech Ajawbʼal rech kemajix chi jumul ri e riqbʼal ibʼ chupam.

Xqil ri kajwataj chke ri congregaciones chkijujunal

Kʼateʼ jun ikʼ qʼaxinaq are chiʼ xbʼixik che kqamulij ta chi qibʼ pa ri Ja rech Ajawbʼal pa ri junabʼ 2020, ri Departamento Mundial de Diseño y Construcción pa Warwick (Nueva York) xrilo jas rajawaxik ksukʼumax pa ri Ja rech Ajawbʼal rech keyawaj ta ri qachalal che keʼopan chilaʼ.

Pa jujun taq tinamit jalajoj ri kajwataj chke ri qachalal pa ri Ja rech Ajawbʼal. Jun qachalal ubʼiʼ Matthew De Sanctis, che kchakun pa ri Departamento Mundial de Diseño y Construcción, xubʼij wariʼ: «Pa jujun taq lugares kʼo ta jaʼ rech ri qachalal kkichʼaj ri kiqʼabʼ. We pa jun Ja rech Ajawbʼal kʼo ta jaʼ ri e qachalal kkiloqʼo, kekikʼamaʼ pa jun nimaʼ o pa jun kʼwaʼ». Pa jujun chi lugares ri e qʼatal taq tzij xkibʼij che kkoj aire acondicionado y kkoj letreros jawiʼ kubʼij wi ri rajawaxik kqabʼano rech kqachajij qibʼ chuwach ri yabʼil.

¿Jas xkibʼan ri qachalal rech xkitzukuj ri kajwataj che ri Ja rech Ajawbʼal? Ri qachalal Matthew xubʼij che pa jujun taq Ja rech Ajawbʼal «kʼi ta jastaq xajwataj chupam y qas xeʼutoʼ ri e qachalal». Jun kʼutbʼal, ri e qachalal pa ri Papúa Nueva Guinea, xkikoj nimaʼq taq galones che kuchʼij 20 litros jaʼ (5,3 galones) y xkikoj chorro chke. Je wariʼ xkiya ri kajwataj pa jun Ja rech Ajawbʼal y xa 40 dólares xsachik. Xuqujeʼ, xeloqʼ 6,000 chʼajbʼal qʼabʼaj portátiles che jun ajkʼay re Asia y xekʼam bʼi pa taq ri congregaciones re África.

Pa jujun chi Ja rech Ajawbʼal xekoj ventiladores o xebʼan kibʼanik rech kʼo kaqiqʼ chilaʼ. Y pa jujun congregaciones xkiloqʼ raqan ri micrófonos rech ri e qachalal che kkiya ri kicomentarios kkichap ta ri micrófonos. Xuqujeʼ konojel xkikoj kichuqʼabʼ rech amaqʼel kkisuʼ ri puerta y nikʼaj chik rech kkichajij kibʼ chuwach ri yabʼil. Pa nikʼaj chi congregaciones xbʼan kibʼanik ri baños rech utukel ri jaʼ kel loq jeriʼ ri qachalal rajawaxik taj kʼo kkichapo. Pa Chile xsach 1,400 dólares rech xesukʼumax ri Ja rech Ajawbʼal.

Ri e qachalal utz xkibʼan che ukojik ri e kuchuj are chiʼ xkiloqʼ ri kajwataj pa taq ri Ja rech Ajawbʼal. Jun kʼutbʼal, pa jujun taq tinamit ri e qachalal xkikoj ri tobʼanik che xkiya ri e qʼatal taq tzij rech xkiloqʼ ri chʼajbʼal qʼabʼaj y ri kaqan ri micrófonos. Xuqujeʼ, ri sucursales xkitoʼ kibʼ che uloqʼik ri jastaq rech jeriʼ más kʼi xkiloqʼo y rech kʼi ta pwaq xsachik. Ri sucursales y ri Departamento Mundial de Compras xetzijon kukʼ ri winaq che kebʼanow ri jastaq rech paqal ta rajil kyaʼ wi chke y aninaq kyaʼik.

«Ronojel ri xbʼanik xubʼano che xinxeʼj ta wibʼ»

Ronojel ri xsukʼumax pa ri Ja rech Ajawbʼal xeʼuchajij ri keʼopan pa ri riqbʼal ibʼ y xeʼutoʼ rech kkixeʼj ta kibʼ. Pa Perú jun qachalal ixoq ubʼiʼ Dulcine xubʼij che xuxeʼj ribʼ are chiʼ xuto che kojtzalij chi pa ri Ja rech Ajawbʼal. Ri areʼ kubʼij: «Are chiʼ xmajtaj ri pandemia xuya COVID-19 chwe, rumal laʼ kinxeʼj wibʼ kinbʼe pa ri Ja rech Ajawbʼal rumal che weneʼ kinriq chi jumul ri yabʼil. Are kʼu are chiʼ xinopan pa ri Ja rech Ajawbʼal xwilo che ri e kʼamal bʼe kisukʼumam chi ronojel ri kajwatajik. Kʼo chi gel rech kqakoj che ri qaqʼabʼ y xeloqʼ kaqan ri micrófonos. Xuqujeʼ ri e qachalal amaqʼel xkikoj kichuqʼabʼ rech xkisuʼ ri Ja rech Ajawbʼal are chiʼ majaʼ kmajix ri riqbʼal ibʼ y are chiʼ kkʼisik. Ronojel ri xbʼanik xubʼano che xinxeʼj ta wibʼ».b

Are kʼu ri qachalal Sara, re Zambia, xukʼulmaj wariʼ. Ri areʼ kubʼij: «Jujun ikʼ kanoq ri wachajil xkam rumal ri COVID-19. Xinchoman chrij jas kinaʼ riʼ are chiʼ kinopan pa ri e riqbʼal ibʼ y che kʼo ta chi ri wachajil». ¿Jas kunaʼ chi kimik ri qachalal are chiʼ xbʼe chi jumul pa ri Ja rech Ajawbʼal? Ri areʼ kubʼij: «Ri riqbʼal ibʼ pa ri Ja rech Ajawbʼal kukʼut chnuwach che ri Jehová kʼo qukʼ pa ri kʼisbʼal taq qʼij riʼ. Rumal ri e riqbʼal ibʼ kwilo che ri e kʼamal taq bʼe xuqujeʼ ri e qachalal sibʼalaj kinkiloqʼoqʼej y wariʼ xubʼano che xuya nuchuqʼabʼ».

Pa ronojel ri uwach Ulew konojel ri e qachalal sibʼalaj kekikotik y kemaltyoxinik rumal che kekunik kebʼe chi jumul pa ri Ja rech Ajawbʼal. Kqamaltyoxij chiwe rumal che tajin kiya ri ikuchuj pa donate.jw.org. Rumal ri kuchuj che kiyaʼo oj kunaq che uyaʼik ronojel ri kajwataj chke ri e qachalal pa ri e Ja rech Ajawbʼal.