Bʼantajik 44

Rahab xeʼukʼol kebʼ achijabʼ

WA KEBʼ achijabʼ e kʼo pa kʼäx. Rajawaxik keʼanmajik, rech kekamisax täj. Wa israelitas riʼ xa xekilaʼ ri tinamit, xuqujeʼ ri ixoq che tijan keʼutoʼ ubʼiʼ Rahab. Ri rachoch ri Rahab kʼo puwiʼ ri tapya rech ri tinamit Jericó. Chqilampeʼ suche xbʼantaj wariʼ.

Naj ta chik kraj che ri täq israelitas kkeqʼaxej ri nimalaj jaʼ ubʼiʼ Jordán rech keʼok bʼi pa Canaán. Tekʼuriʼ nabʼe che wariʼ, Josué xeʼutaq bʼi kebʼ achijabʼ rech kekilaʼ ri ulew. Are xubʼij wariʼ chike: ‹Chiwilaʼ ri ulew xuqujeʼ ri tinamit rech Jericó›.

Chiʼ ri achijabʼ riʼ xeʼok bʼi pa ri Jericó xebʼe che rachoch ri Rahab. Tekʼuriʼ jun winaq xubʼij wariʼ che ri ajawinel rech Jericó: ‹Chaqʼabʼ xepe kebʼ achijabʼ israelitas rech kekilaʼ ri ulew›. Chiʼ xuta wariʼ ri ajawinel xutaq bʼi nikʼaj achijabʼ pa rachoch ri Rahab che kkebʼij wariʼ che: ‹¡Chawesaj lo ri achijabʼ e kʼo pa awachoch!› Tekʼuriʼ ri Rahab xeʼukʼol ri täq achijabʼ puwiʼ rachoch. Rumal laʼ xubʼij: ‹Nikʼaj achijabʼ xepe pa wachoch, wetaʼm täj jachiʼ (ni) kepe wi. Xebʼek chiʼ xok ri qʼequʼm, chiʼ majaʼ ktzʼapix ri uchiʼja rech ri tinamit. ¡We kixbʼe chanim, keriqa na!› Xchaʼ. Tekʼuriʼ ri täq achijabʼ xebʼe chanim che kitzukuxik.

Chiʼ xebʼek, Rahab xbʼe che kichʼabʼexik. ‹In wetaʼm che Jehová kuya ri ulew chiwe›, xchaʼ chike ri achijabʼ. ‹Xqato che areʼ xubʼano che xujach ribʼ ri nimalaj jaʼ pa nikʼaj ubʼiʼ mar Rojo, xuqujeʼ che ix xikamsaj ri täq ajawinel Sehón rukʼ Og. Rumal che xinbʼan jun utzil chiwe, mibʼan ta kʼäx chwe. Chikʼolo ri nutat xuqujeʼ ri nunan rukʼ ri wachalal›, xchaʼ ri Rahab.

Ri täq achijabʼ xketzujuj che kkebʼan wariʼ, tekʼuriʼ rajawaxik kʼo kubʼan na ri Rahab. ‹Chakʼamaʼ lo jun käq kolobʼ tekʼuriʼ chaximaʼ che ri ventana›, xechaʼ ri achijabʼ, ‹xuqujeʼ cheʼamolij konojel ri afamilia pa awachoch. Chiʼ kqamaj ri tinamit Jericó tekʼuriʼ chiʼ kqil wajun kolobʼ riʼ, kʼot nijun chike ri e kʼo pa awachoch kqakamsaj›. Chiʼ wa täq achijabʼ xetzalij rukʼ Josué, xkebʼij che ronojel ri xbʼantajik.

Josué 2:1-24; Hebreos 11:31.