¿Jas tajin kbʼan che utzijoxik ri utzalaj taq tzij?

Xa jubʼiqʼ chi kraj ri Jehová kukoj ri uQʼatbʼal tzij che usachisaxik uwach ronojel ri kubʼan kʼax chke ri winaq. ¡Rumal laʼ kqatzijoj ri utzalaj taq tzij riʼ chke ri winaq! Ri Jesús xraj che ri utijoxelabʼ kkitzijoj ri e tzij riʼ chke konojel ri winaq cho ronojel ri uwach Ulew (Mateo 28:19, 20). ¿Jas kibʼanom ri testigos rech Jehová che unimaxik wajun taqanik riʼ?

1. ¿Jas tajin kbʼan che utzʼaqatisaxik ri kubʼij Mateo 24:14?

Ri Jesús xubʼij: «We utzalaj taq tzij riʼ re ri Rajawbʼal ri Dios ktzijox na pa ronojel ri uwach Ulew» (Mateo 24:14). Ri oj testigos rech Jehová rukʼ kikotemal kqabʼan wajun chak riʼ che sibʼalaj nim ubʼanik. Pa más che 1.000 chʼabʼal kqatzijoj ri utzalaj taq tzij cho ronojel ri uwach Ulew. Kajwataj chuqʼabʼ y cholajil rech kbʼan wajun chak riʼ. Rukʼ ri utobʼanik ri Jehová oj kunaq che ubʼanik.

2. ¿Jas tajin kqabʼano rech kojkunik kqatzijoj ri utzij ri Dios chke ri winaq?

Kqatzijoj ri utzij ri Dios chke ri winaq pa apachike lugar. Junam rukʼ ri xkibʼan ri cristianos re ri nabʼe siglo, ri oj kojbʼe «cho taq ja» che utzijoxik ri utzij ri Dios (Hechos 5:42). Wariʼ kubʼano che kojopan kukʼ e kʼi winaq chi junabʼ. Are kʼu, rumal che ri winaq qas ta kekʼojiʼ cho kachoch, xuqujeʼ kqatzijoj ri utzij ri Dios pa taq ri lugar ri keriqitaj wi kʼi winaq. Amaqʼel kqatzukuj ri kqabʼano rech kojkunik kqatzijoj chke ri winaq chrij ri Jehová y ri kubʼan na.

3. ¿E jachin taq ri rajawaxik kkitzijoj ri utzalaj taq tzij?

Konojel ri qastzij cristianos rajawaxik kkitzijoj ri utzalaj taq tzij. Ri oj nim kqil wajun chak riʼ. Rumal laʼ kqabʼan ri kojkun che ubʼanik rumal che qetaʼm che e kʼi winaq kajwataj chke (chasikʼij 1 Timoteo 4:16). Oj tojom ta che ubʼanik wajun chak riʼ, rumal che ri Biblia kubʼij: «Man kʼo ta xiya che ri xikʼamo; chiyaʼ kʼu chke ri winaq, man kʼo ta jas kitoqij chke» (Mateo 10:7, 8). Y, paneʼ e kʼi winaq kojkitatabʼej taj, kqaya ta kan utzijoxik rumal che je wariʼ kqaya uqʼij y kqaya kikotemal che ri Jehová.

CHANIMARISAJ RI AWETAʼMANIK

4. Kqakoj qachuqʼabʼ che kiriqik konojel ri winaq

VIDEO: «Kqatzijoj utzij ri Dios ‹pa taq ri tinimit ri sibʼalaj naj e kʼo wi cho ronojel ri uwach Ulew›» (7:33)

• ¿Jas más utz kawil che ri kqabʼan che ri utzijoxik ri utzij ri Dios?

Chisikʼij Mateo 22:39 y Romanos 10:13-15, y chixtzijon chrij wariʼ:

• ¿Jas kubʼan ri utzijoxik ri utzij ri Dios che ukʼutik che keqaloqʼoqʼej ri winaq?

• ¿Jas kubʼan ri Jehová che kilik ri kkitzijoj ri utzalaj taq tzij? (Chiwilaʼ ri versículo 15).

5. Kojtobʼan rukʼ ri Dios

Kʼo kʼi taq kʼutbʼal che kukʼutu che ri Jehová are kkʼamow qabʼe che utzijoxik ri utzij. Chqilaʼ ri xkʼulmataj pa Nueva Zelanda. Jun qʼij, jun Testigo ubʼiʼ Paul xbʼe che utzijoxik ri utzij ri Dios chuchiʼ taq ja y xuriq jun ixoq. Pa wajun qʼij riʼ aqʼabʼil, ri ixoq xubʼij che ri Jehová che kraj kretaʼmaj uwach. Paul xubʼij: «Chiʼ qʼaxinaq chi oxibʼ horas xinchʼaw chuchiʼ ri rachoch».

Chisikʼij 1 Corintios 3:9 y chixtzijon chrij wariʼ:

• ¿Jas kubʼan wajun kʼutbʼal riʼ che ukʼutik che are ri Jehová tajin kkʼamow ubʼe ri utzijoxik ri utzij?

Chisikʼij Hechos 1:8 y chixtzijon chrij wariʼ:

• ¿Jasche rajawaxik ri utobʼanik ri Jehová rech kojkunik kqatzijoj ri utzij?

¿La awetaʼm?

Pa ri riqbʼal ibʼ che kbʼan xoʼl taq qʼij kkʼut chqawach jas kqabʼan che utzijoxik ri utzij ri Dios. We at opanaq pa wajun riqbʼal ibʼ riʼ, ¿jas kachomaj chrij ri kbʼan che qatijoxik?

6. Kqanimaj ri utaqanik ri Dios chiʼ kqatzijoj ri utzij

Pa ri nabʼe siglo, ri ukʼulel ri Jesús xkitzukuj ri xkibʼano rech ri cristianos xkitzijoj ta chi ri utzij ri Dios. Are kʼu ri cristianos riʼ xkikoj kichuqʼabʼ che utzijoxik ri utzij ri Dios y xkiqʼalajisaj ri qastzij chkiwach ri winaq (Filipenses 1:7). Kimik, ri oj testigos rech Jehová je tajin kqabʼano.a

VIDEO: Tajin kqatoʼ uwiʼ ri utzalaj taq tzij pa taq ri qʼatbʼal tzij (2:28)

Chisikʼij Hechos 5:27-42 y chixtzijon chrij wariʼ:

• ¿Jasche kqaya ta kan utzijoxik ri utzij ri Dios? (Chiwilaʼ ri versículos 29, 38 y 39).

RI XQETAʼMAJ

Ri Jesús xeʼutaq ri utijoxelabʼ che utzijoxik ri utzalaj taq tzij chke konojel ri winaq. Ri Jehová tajin kutoʼ ri utinamit rech kkun che ubʼanik wajun chak riʼ.

¿La knaʼtaj chawe?

• ¿Jas tajin kbʼan che utzijoxik ri utzalaj taq tzij cho ronojel ri uwach Ulew?

• ¿Jas kqabʼan che ukʼutik che keqaj ri winaq are chiʼ kqatzijoj ri utzij ri Dios?

• ¿Jas kachomaj at, la kuya kikotemal chqe are chiʼ kqatzijoj ri utzij ri Dios? ¿Jasche?

CHAWILAʼ CHI NIKʼAJ

Chawilaʼ ri kkibʼan ri testigos rech Jehová che utzijoxik ri utzij ri Dios pa nimaʼq taq tinamit.

Predicación pública pa taq áreas metropolitanas pa París (5:11)

¿Jas kibʼanom ri Testigos rech e opanaq kukʼ ri winaq re nikʼaj chi tinamit?

Keqatoʼ ri winaq che retaʼmaxik uwach ri Dios (5:59)

Chawilaʼ ri utzilal che uriqom jun ixoq che kutzijoj ri utzij ri Dios.

Utzijoxik ri utzij ri Dios sibʼalaj kuya kikotemal chwe (6:29)

Chawilaʼ ri kibʼanom ri testigos rech Jehová chkiwach ri qʼatbʼal tzij rech kkitzijoj ri utzalaj taq tzij.

«Ri kkitzijoj ri uQʼatbʼal tzij ri Dios ketoʼ kumal ri tribunales» (El Reino de Dios ya está gobernando, capítulo 13)