¿Jas nubʼanik chuwach ri Jehová?
1. ¿Jasche kjunamataj ri Biblia rukʼ jun espejo?
1 ¿Chjampaʼ tiempo kawil awibʼ pa jun espejo? Kʼi chqe kqil qibʼ ronojel qʼij pa jun espejo, rumal che kojutoʼ rech kqasukʼumaj qibʼ. Ri Biblia kuya kjunamax rukʼ jun espejo. Chiʼ kqasikʼij uwach kojutoʼ rech kqil ri qas kʼo pa ri qanimaʼ, ri kril ri Jehová (1 Sam. 16:7; Sant. 1:22-24). Ri Utzij ri Dios kutoʼ ri winaq rech rilik ri kʼo pa ri uchomanik xuqujeʼ ri kʼo pa ri ranimaʼ (Heb. 4:12). Chiʼ kqasikʼij uwach xuqujeʼ kojchoman chrij ri kubʼij ri Biblia ronojel qʼij, kojutoʼ che rilik ri kqabʼano rech más utz kqabʼan che utzijoxik ri utzij ri Dios. ¿Jasche kqabʼij wariʼ? (Sal. 1:1-3.)
2. ¿Jas kubʼan ri Biblia che qatoʼik rech kqil ri qabʼantjik?
2 Chakojoʼ ri Biblia junam rukʼ jun espejo. Ri bʼantajik che kʼo pa ri Utzij ri Dios che kchʼaw chrij kikʼaslemal ri sukʼ taq rajpataninelabʼ ri Jehová kojutoʼ che rilik ri bʼantajik che sibʼalaj utz chuwach ri Dios. Jun kʼutbʼal, ri ajawinel David xukʼutu che sibʼalaj nim kril wi ri ubʼiʼ ri Dios (1 Sam. 17:45, 46). Ri qʼaxal tzij Isaías rukʼ ukowil ranimaʼ xraj xbʼe che utzijoxik ri utzij ri Dios pa jun kʼaxalaj lugar (Is. 6:8, 9). Ri nimalaj uloqʼoqʼenik ri Jesús che ri Utat xubʼano che utz xril utzijoxik ri utzij, xuya kikotemal che, chuwach areʼ xa ta jun eqaʼn che kubʼan kʼax che (Juan 4:34). Ri cristianos rech ri nabʼe siglo qas xkikoj kichuqʼabʼ che utzijoxik ri utzij ri Dios, xkikubʼsaj kikʼuʼx chrij ri Jehová xuqujeʼ xkiya ta kan ubʼanik wajun chak riʼ (Hech. 5:41, 42; 2 Cor. 4:1; 2 Tim. 4:17). Chiʼ kojchoman chrij ri e winaq riʼ kojutoʼ rech kqil ri rajawaxik kqabʼano, rech kqabʼan más utz che ri loqʼalaj qachak.
3. ¿Jasche rajawaxik kojbʼeyetaj ta che ukʼexik ri rajawaxik kqakʼex pa ri qakʼaslemal?
3 Chasukʼumaj ri utz ta pa ri akʼaslemal. Qastzij wi, che kʼo ta upatan kqil qibʼ pa jun espejo we kqasukʼumaj ta ri xqilo che utz taj. Utz kqataʼ che ri Jehová che kojutoʼ che rilik ri qas qabʼantajik, xuqujeʼ rech kqakʼex ri rajawaxik kqakʼexo (Sal. 139:23, 24; Luc. 11:13). Rumal che nim ta chi ri tiempo kʼolik xuqujeʼ rech kekam ta ri winaq, rajawaxik che chanim kqasukʼumaj qibʼ (1 Cor. 7:29; 1 Tim. 4:16).
4. ¿Jas kiriq ri winaq che kril ribʼ rukʼ ri Utzij ri Dios xuqujeʼ kukʼex ri utz taj che krilo?
4 Ri qas kʼo pa ri qanimaʼ —ri kril ri Jehová— are nim ubʼanik chuwach ri qabʼaqil (1 Ped. 3:3, 4). ¿Jas kuriq jun winaq che kril ribʼ rukʼ ri Utzij ri Dios xuqujeʼ kusukʼumaj ri utz taj che xrilo? Kux jun winaq che «xuwi ta kuto xuqujeʼ kusach ta ri utom, xaneʼ kubʼano jas kubʼij ri pixabʼ, utz kʼu re waʼ pa ri chak ri kubʼano» (Sant. 1:25). Qastzij wi, kojkikot más pa ri qachak xuqujeʼ utz kqabʼan che rumal che «kaqaqʼalajisaj ri ujuluwem» ri Jehová (2 Cor. 3:18).