¡AMAQʼEL CHIXKʼASKʼATOQ!

Ri tajin kkibʼan ri e kojonem pa ri chʼoj pa Ucrania | ¿Jas kubʼij ri Biblia chrij wariʼ?

Chawilaʼ ri kʼateʼ xqʼalajisax chrij ri kibʼim ri e kʼamal taq bʼe re taq ri kojonem chrij ri chʼoj che tajin kbʼan pa Ucrania.

«Ri patriarca Kirill, kʼamal bʼe re ri Iglesia ortodoxa rusa, kʼo ta ubʼim chrij ri kʼax che tajin kubʼan ri qʼatbʼal tzij re Rusia […]. Ri jastaq che ubʼanom y ubʼim ri Iglesia ortodoxa chrij Ucrania, ukojom ri Putin rech kubʼan ri chʼoj» (EUobserver, 7 re marzo 2022).
«Ri patriarca Kirill […] ubʼim che ri chʼoj tajin kbʼan pa Ucrania are jun jastaq che ktobʼan che resaxik ri makaj. Sibʼalaj mayibʼal y kʼax ukojik che wajun achi jewaʼ ubʼim chrij ri rumal che ri utinamit tajin kubʼan kʼax che Ucrania» (AP News, 8 re marzo 2022).
«Ri metropolitano Epifanio I re Kiev, kʼamal bʼe re ri Iglesia ortodoxa re Ucrania, xutewchij ri tinamit wajun lunes riʼ y xubʼij chke che kechʼojin kukʼ ri ajchʼojabʼ re Rusia. Xuqujeʼ xubʼij che awas taj che kekamisax ri ajchʼojabʼ re Rusia» (The Jerusalem Post, 16 re marzo 2022).
«Kqaya ri qatobʼanik chke konojel ri ajchʼojabʼ re Ucrania y chke konojel ri kkaj kojkitoʼo. Kqataʼ che ri Dios che kutewchij ri chuqʼabʼ che tajin kkikojo rech kkichajij ri tinamit Ucrania chkiwach ri e bʼanal taq kʼax, kqabʼan qachʼawem pa kiwiʼ» (Ri xuya ubʼixik ri Consejo re Iglesias y Organizaciones Religiosas re Ucrania,a 24 re febrero 2022).

¿Jas kachomaj? ¿La utz che ri Iglesias che kkibʼij che e teren chrij ri Cristo kekitaq bʼi pa chʼoj ri e winaq re ri kikojonem? ¿Jas kubʼij ri Biblia chrij wariʼ?

¿Jas kibʼanom ri e kojonem pa taq ri chʼoj che e bʼantajinaq ojer?

Ronojel ri kʼulmatajinaq ukʼutum che e kʼi Iglesias che kkibʼij che kkaj ri jamaril, kiyaʼom ri kitobʼanik che ri e chʼoj y kitaqom bʼi ri e kiwinaq y kibʼim che utz kbʼanik. Pa kʼi taq junabʼ ri testigos rech Jehová kiqʼalajisam che utz ta ri kibʼanom ri qastzij taj kojonem rumal che xa kebʼ kipalaj. Chawilaʼ ri bʼim pa e jujun chke ri e qawuj:

Ri kʼutunem «Las cruzadas: ‹trágica ilusión’›» kuya ubʼixik che ri Iglesia católica romana xuya ri utobʼanik che kikamisaxik e kʼiʼalaj winaq che xbʼan pa ri ubʼiʼ ri Dios y ri Cristo.
Ri kʼutunem «La Iglesia Católica y África» kukʼutu che ri e kojonem xekun ta che uqʼatexik ri e chʼoj chkixoʼl ri e tinamit y ri xbʼan che kikamisaxik e kʼiʼalaj winaq che kʼo ta kimak.
Ri e kʼutunem «¿Tiene la culpa la religión?», «El papel de la religión en las guerras» y «La religión toma partido» kkiqʼalajisaj che e kʼo kʼamal taq bʼe católicos, ortodoxos y protestantes chkixoʼl e kebʼ jupuq winaq pa kʼi taq chʼoj che bʼanom.

¿La utz che ri Iglesias cristianas kkiya ri kitobʼanik pa taq ri chʼoj?

Ri xukʼut kan ri Jesús: «Chaloqʼoqʼej ri awajil atzʼaqat je jas ri uloqʼoqʼexik awibʼ chbʼil awibʼ» (Mateo 22:39). «Cheʼiloqʼoqʼej ri kibʼanom kikʼulel chiwe» (Mateo 5:44-47).

Chatchoman chrij wariʼ: We jun Iglesia kubʼij che kkinimaj ri taqanik re ri Jesús che rajawaxik kqaloqʼoqʼej ri qajil qatzʼaqat, ¿la utz riʼ we keʼutaq bʼi ri uwinaq pa taq ri chʼoj? Rech kariq ri urespuesta, chasikʼij kiwach ri e kʼutunem «Los cristianos verdaderos y la guerra» y «¿Es posible amar a un enemigo?».

Ri xukʼut kan ri Jesús: «Ri wajawibʼal man aj uwach ulew taj. We ta aj uwach ulew ri wajawibʼal, ri e pataninel wech kechʼojin ta riʼ che uqʼatixik chi ma ta kinkiyut ri aj judeyibʼ» (Juan 18:36). «Konojel kʼut ri kkikoj chʼichʼ, che chʼichʼ kekamisax wi» (Mateo 26:47-52).

Chatchoman chrij wariʼ: We ri utijoxelabʼ ri Jesús xkikoj ta chʼayibʼal rech xkito uwiʼ, ¿la utz kkikojo xa rumal jun chi jastaq? Rech kawil ri xkikʼulmaj ri e nabʼe taq cristianos, che qas xkibʼan pa ri kikʼaslemal ri ukʼutbʼal ri Jesús y ri xukʼut kan chkiwach, chasikʼij uwach ri kʼutunem «El cristianismo y la guerra: ¿son compatibles?».

¿Jas kkikʼulmaj na ri e kojonem che kkiya ri kitobʼanik che ubʼanik chʼoj?

Ri Biblia kukʼutu che ri Dios keʼuxutuj konojel ri kojonem che kkibʼij che e teren chrij ri Jesús, are kʼu kkibʼan taj ri xukʼut kanoq (Mateo 7:21-23; Tito 1:16).

Ri wuj re Apocalipsis kukʼutu che ri Dios kubʼij che ri e ajmakibʼ che ri e «kamisam cho ri uwach ulew» are ri qastzij ta kojonem (Apocalipsis 18:21, 24). We kawaj kawetaʼmaj jasche, chawilaʼ ri kʼutunem «¿Qué es Babilonia la Grande?».
Ri Jesús xubʼij che ri Dios kusach na kiwach konojel ri e kojonem che e uxutum rumal che kkibʼan itzel taq jastaq, junam rukʼ jun cheʼ che utz ta ri uwach kuyaʼo «kachoy na bʼik, kkʼiʼaq pa qʼaqʼ» (Mateo 7:15-20). We kawaj kawetaʼmaj jas kbʼan che ubʼanik wariʼ, chasikʼij uwach ri kʼutunem «¡Se acerca el fin de la religión falsa!».

Ri testigos rech Jehová e junam ta kukʼ

Ri testigos rech Jehová re Rusia y Ucrania xuqujeʼ konojel ri e kʼo pa ronojel uwa Ulew kkinimaj ri taqanik re ri Jesús che kkinim ta kibʼ pa chʼoj, pa política y xaq xiw kkiya kitobʼanik che ri uQʼatbʼal tzij ri Dios. Rumal laʼ kojbʼe ta pa wajun chʼoj riʼ ni pa jun chik y kqaya ta ri qatobʼanik che. Y, rumal che kqaj rukʼ ronojel qanimaʼ kqabʼan ronojel ri ktaqan wi ri Biblia, jujun taq Testigos tajin kbʼananex kʼax chke (Juan 15:19, 20; 2 Timoteo 3:12). Jun kʼutbʼal, ri qʼatbʼal tzij re Rusia e utzʼapim e kʼi Testigos pa cárcel xuqujeʼ utaqom kichʼayik y kisokik. Xuqujeʼ xeʼutoqij kan ri e kʼolbʼal ri kqaya wi uqʼij ri Dios. We kawaj kawetaʼmaj más chrij wariʼ, chatok pa ri kʼolbʼal www.jw-russia.org.

We kawaj kawetaʼmaj más chrij ri kʼax che tajin kbʼan chke ri testigos rech Jehová pa Rusia rumal ri kikojonik, chawilaʼ ri video re kajibʼ minutos Los testigos de Jehová de Irkutsk se mantienen fieles a pesar de las violentas redadas.
Ri Testigos ni ta jun mul kinimom kibʼ che ubʼanik taq chʼoj. Jun kʼutbʼal, xkinim ta kibʼ pa chʼoj paneʼ xbʼan kʼax chke pa ri Alemania nazi y pa ri ojer Unión Soviética. We kawaj kawetaʼmaj más, chawilaʼ ri video Firmes ante la oposición.

¿La awetaʼm che ri Biblia kubʼij che pa ri petinaq ksachisax na kiwach ri chʼoj? (Isaías 2:4; Jeremías 29:11). We kawaj kawetaʼmaj más chrij wariʼ o chrij ri qakojonik, chasikʼij más pa wajun kʼolbʼal re internet o chattzijon rukʼ jun Testigo.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Wajun consejo riʼ e kʼo 15 Iglesias chupam, ri ortodoxa, ri Iglesia católica romana, ri Iglesia católica griega, ri protestantes y evangélicas, y jupuq judíos y musulmanes.