Sibʼalaj kʼi kʼax xkʼulmataj pa ri junabʼ 2023 | ¿Jas kubʼij ri Biblia chrij wariʼ?

Ri xkʼulmataj pa ronojel ri uwach Ulew pa ri junabʼ 2023, kukʼutu che oj kʼo «chi pa ri kʼisbʼal taq qʼijol» (2 Timoteo 3:1). Ri tajin kkʼulmataj kimik kukʼutu che tajin ktzʼaqat ri tzʼibʼatal pa ri Biblia. Chqilampeʼ jujun kʼutbʼal.

Ri kubʼij ri Biblia y ri tajin kkʼulmataj kimik

«Kitaʼ na chi e kʼo taq chʼoj. Kitaʼ na utzijol taq chʼoj» (Mateo 24:6).

• «Ri chʼoj tajin knimataj más pa ronojel ri uwach Ulew».a

«Kubʼan na kabʼraqan pa jalajoj taq kʼolbʼal» (Marcos 13:8).

• «Are chiʼ xmajtaj lo ri junabʼ 2023 kʼa kimik, ubʼanom chi 13 nimaʼq taq kabʼraqan cho ri uwach Ulew, magnitud 7 o más. Sibʼalaj nimaʼq taq ri kabʼraqan xubʼan pa wajun junabʼ riʼ».b

«Kekʼojiʼ na jastaq xibʼibʼal» (Lucas 21:11).

• «Kamik xaq xiw ta chi kʼatan ri qʼij xaneʼ sibʼalaj kaporon chik» (António Guterres, secretario general re ri Naciones Unidas).c

«Kepe na wiʼjal» (Mateo 24:7).

• «Pa ri junabʼ 2023 e kʼi winaq kʼax xkiriq che uyaʼik ri kajwataj chke ri kifamilia».d

«Kepe na kʼaxalaj taq qʼij» (2 Timoteo 3:1).

• «Pa ronojel ri uwach Ulew, jun chke ocho winaq sibʼalaj kbʼisonik o kuriq taj jas kubʼan pa ri ukʼaslemal».e

¿Jas kqakʼulmaj na pa ri junabʼ 2024?

Kʼo ta nijun retaʼm ri kkʼulmataj na pa ri jun chi junabʼ. Are kʼu, ronojel ri tajin kqil kimik kukʼutu che xa jubʼiqʼ chik kraj ri Uqʼatbʼal tzij ri Dios, jun Qʼatbʼal tzij che kʼo pa ri kaj, keresaj na konojel ri e qʼatbʼal taq tzij cho ri uwach Ulew, kresaj na ronojel ri kʼax xuqujeʼ ronojel ri kbʼanowik che kojbʼisonik (Daniel 2:44; Apocalipsis 21:4).

Are chiʼ kojbʼisonik, kojkunik kqataʼ tobʼanik che ri Dios. Ri Biblia kubʼij wariʼ:

«Are taq kinxeʼj wibʼ, kinkubʼa nukʼuʼx chij la» (Salmo 56:3).

¿Jas kqabʼan che ukʼutik che kqakubʼsaj qakʼuʼx chrij ri Dios? Chawetaʼmaj más chrij ri tzujunik kubʼij ri Biblia, jun jeʼlalaj kʼaslemal jawiʼ kʼo ta chi wi kʼax. Chamaj jun etaʼmanik re ri Biblia rech kawil ri kubʼan ri Biblia che atoʼik at y che kitoʼik ri afamilia.