2 Samuel
23 Ultimu kaq cancionninchömi Davidqa kënö nirqan:+
“Teyta Dios respetatsinqan nuna,
Jacobpa+ Diosnin akranqan+ gobernanti,+
y Israelchö shumaq cancionkunata cantaq*+
Jesëpa tsurin David.
2 Teyta Jehovämi, poderninwan yanapamarqan ninqanta willakunäpaq,+
willakunäpaq kaqkunaqa shimïllachömi këkarqan.+
‘Juk gobernanti allita ruraptin+
y Teyta Diosta respetar*+ mandakuptinqa,
4 patsa warämur atsikyaqnömi;
inti o rupay yarqamur atsikyaqnö,+
y tamya pasariptin
llapan cläsi plantakunata jeqatsimunampaq inti atsikyaqnömi’.+
5 Tsënömi familiäpis Teyta Diospa rikëninchö këkan.
Pëmi imëpis mana ushakaq acuerduta
noqawan rurashqa.+
Tsë acuerdum salvaman y kushishqa kanäpaq yanapaman.
Tsëmi Teyta Diosqa familiäta alli kanampaq yanapan.+
6 Peru mana allita ruraqkunaqa+ kashanö jitarishqa kayänanllapaqmi këkäyan,
tukshikuptinmi ni yatëtapis puëdintsiktsu.
7 Pillapis yatëta munarqa,
katsinan fiërrupita herramientataran o lanzapa chakintaran,
tsëpitanam jinanllachö ninawan rupatsinan”.
8 Davidpa+ mas valienti kaq soldädunkunaqa kimam kayarqan. Punta kaqqa tahkemonïta Joseb-Basëbetmi karqan, y kimanchöqa pëmi mandakoq karqan.+ Juk kutim lanzawan ochocientus nunakunata wanutsirqan. 9 Juk kaqnam Dodöpa+ tsurin Eleazar+ karqan. Dodöpa papäninqa Ahohïmi karqan. Eleazarpis Davidpa mas valienti soldädunmi karqan, y pëkunam filisteukunata dominayarqan. Juk kutim filisteukunaqa israelïtakunawan pelyayänampaq juntakäyarqan, tsënam israelïtakunaqa mantsakar ëwakuyarqan. 10 Peru Eleazarqa jinanllachö quedëkurmi, makimpis espädachö+ yachakanqanyaq filisteukunata wanutsirqan. Tsënam israelïta soldädukunaqa wanushqa filisteukunapa väleq cösasninkunata apakuyänampaq qepanta ëwayarqan. Tsë junaqmi Jehovä Diosqa, filisteukunata venciyänampaq israelïtakunata yanaparqan.+
11 Juk kaqnam hararïta Aguëpa tsurin Samä karqan. Juk kutim filisteukunaqa Lehï sitiuchö juntakëkur lentëjas chakra kaqchö israelïtakunata atacayarqan. Tsënam israelïta soldädukunaqa mantsar ëwakuyarqan. 12 Peru Samäqa mana mantsashpam tsë chakra chowpinchö* shëkur* filisteukunata wanutsirqan. Tsënömi Jehovä Diosqa filisteukunata venciyänampaq israelïtakunata yanaparqan.+
13 Cosëcha witsanmi treinta mandakoqkunapita kimaq ëwayarqan David këkanqan Adulam machëman.+ Filisteukunaqa Refaim pampachömi*+ campamentunkuna rurashqa kayarqan. 14 Y juk grüpu filisteu soldädukunaqa Belen markachömi këkäyarqan. Davidnam fäcil-lla mana chäna sitiuchö këkarqan.+ 15 Tsëchö këkarmi Davidqa kënö nirqan: “¡Imanöllaraq Belen markapa punkunchö këkaq pözupita yakuta upurkamüman!”. 16 Tsënö niptinmi kiman valienti soldädunkunaqa filisteukunapa campamentunkunaman amälas yëkuyarqan. Y Belen markapa punkunchö këkaq pözupitam Davidpaq yakuta apayarqan. Peru chäratsiyaptinqa manam David upurqantsu, Teyta Jehoväpa rikëninmanmi jichëkurqan.+ 17 Kënömi nirqan: “¡Teyta Jehovä, manachi tsëtaqa rurëkümantsu! Kë yakuta upurqa, kawëninkunata peligruman churar apamoqkunapa yawarninta upoq+ cuentachi këkäman”. Tsënö nirmi yakuta upurqantsu. Tsëkunatam Davidpa kiman valienti soldädunkunaqa rurayarqan.
18 Davidpaqa kima masran valienti soldädunkuna karqan, y pëkunapa mandaqninqa Zeruyäpa+ wamran Abisaimi+ karqan. Abisaiqa Joabpa wawqinmi karqan. Abisaiqa trescientus soldädukunatam lanzanwan wanutsirqan. Tsëmi pëtaqa kiman valienti soldädukunatanö respetayaq.+ 19 Tsë kiman valienti soldädukunapaqa, Abisaimi mandaqnin karqan y allim pelyëta yachëkoq. Tsënö karpis mas allin kaq kiman valienti soldädukunawanqa manam igualarqantsu.
20 Jehoiadäpa tsurin Benäyapis+ valienti* soldädum karqan y Cabzeel+ markachömi imëkata rurarqan. Pëmi Moabpita Arielpa ishkë tsurinkunata wanutsirqan. Juk junaqmi rashtëkaptin,* pözuman yëkuskir juk leontapis wanuratsirqan.+ 21 Tsënöllam Egiptupita juk jatun nunatapis wanutsirqan. Tsë nuna lanzanwan këkaptimpis, Benäyaqa pelyar pelyarmi juk garrutillawan lanzanta sutarapurnin, tsë lanzallawan wanuskatsirqan. 22 Tsëkunatam Jehoiadäpa tsurin Benäya rurarqan. Y kiman valienti soldädukunatanömi respetayaq. 23 Peru treinta valienti soldädukunapita mas puëdeq karpis, manam kima valienti soldädukunawanqa igualarqantsu. Tsënö kaptimpis, Davidqa cuidaqnin soldädukunapa mandaqnin kanampaqmi Benäyata churarqan.
24 Treinta valienti soldädukunapitaqa kayarqan Joabpa wawqin Asahel,+ Belen markapita Dodöpa+ tsurin Elhanan, 25 harodïta Samä, harodïta Elicä, 26 paltïta Hëlez,+ tecoïta Iquespa tsurin Irä,+ 27 anatotïta+ Abi-Ëzer,+ husatïta Mebunäi, 28 ahohïta Zalmon, netofatïta Maharäi,+ 29 netofatïta Baanäpa tsurin Hëleb, Ribäipa tsurin Ittäi, pëqa karqan Guibeä markapita (Guibeäqa Benjaminpa kastankunapam karqan), 30 piratonïta Benäya,+ Gaas+ mayukuna* lädumpita Hidäi, 31 arbatïta Abï-Albon, bar-humïta Azmävet, 32 saalbonïta Eliahbä, Jonatan, Jasenpa tsurinkuna, 33 hararïta Samä, hararïta Sararpa tsurin Ahiam, 34 Ahasbäipa tsurin Elifëlet (Ahasbäipa papäninqa maacatïta nunam karqan), guilonïta Ahitofelpa+ tsurin Eliam, 35 Carmëlu markapita Hezrö, arbïta Paaräi, 36 Zobä sitiupita Natanpa tsurin Igal, gadïta Banï, 37 ammonïta Zëlec, beerotïta Naharäi, pëmi Zeruyäpa wamran Joabta armankunata puritsir yanapaq soldädu, 38 itrïta Irä, itrïta+ Gareb, 39 y hitïta Urïas.+ Llapankunaqa treinta y siëtim kayarqan.