1 Rëyes
14 Tsë witsanmi Jeroboanpa tsurin Abïas qeshyarqan. 2 Tsënam Jeroboanqa warminta kënö nirqan: “Warmï kanqëkita cuentata mana qokuyänampaq jukläya röpata vistikurkur Silö markachö Teyta Diospa willakoqnin Ahïya jutiyoq nunaman ëwë. Pëmi nimarqan israelïtakunapa gobernaqnin kanäpaq.+ 3 Pëpaq chunka tantata, tortillakunata y juk frascu mielta apakurkur ëwë. Tsëkunata qarëkur tapunki wamrantsik alliyänampaq o mana alliyänampaq kaqta”.
4 Tsëmi Jeroboan yachatsinqannölla warminqa Silö markaman+ ëwar Diospa willakoqnin Ahïyapa wayinman charqan. Ahïyaqa alläpa awkinna karmi reqikurqannatsu.
5 Peru Jehovä Diosmi Ahïyata kënö nir willashqa karqan: “Jeroboanpa warminmi qeshyëkaq wamrampaq tapukoq shamuykan. Noqam willashqëki imata ninëkipaq kaqtapis. Mana reqiyänampaqmi jukläya röpata vistikurkur shamuykan”.
6 Jeroboanpa warmin punkuta yëkuykaqta cuentata qokurirmi Ahïyaqa kënö nirqan: “Jeroboanpa warmin pasakamuy. ¿Imanirtan mana reqiyäshunëkipaq jukläya röpata vistikurkur shamurqunki? Desgracia pasashunëkipaq kaqtam niyämashqa, tsëtam kanan willashqëki. 7 Ëwë Jeroboanta willë Israelpa Diosnin Jehovä nimanqanta, kënömi nimashqa: ‘Noqam Jeroboanta akrarqä israelïtakunata gobernanampaq.+ 8 Davidpa kastankuna israelïtakunata gobernanantaqa manam permitirqänatsu, tsëmi Jeroboanta churarqä gobernanampaq.+ Peru pëqa manam sirwimaqnï Davidnötsu mandakunqäkunata cäsumashqa ni llapan shonqunwantsu allikunata rurashqa.+ 9 Noqata despreciamarmi+ metalpita rurashqa santukunata adorar cöleratsimashqa.+ Tsëta rurarmi punta gobernaqkunapitapis mas jutsata* rurashqa. 10 ¡Tsëkunata ruranqampitam kananqa Jeroboanpa familian desgraciapa pasanqa! ¡Llapan ollqu kastankunata, defendikuyta mana puëdeqkunata y mana väleqkunatam ushakätsishaq! ¡Wanuta pitsaqnömi, Jeroboanpa+ familianta ushakätsishaq! 11 Markachö wanoq o wañoq kastëkikunataqa allqukunam mikuyanqa y juk lädukunachö wanoq kaqkunatanam wiskurkuna mikuyanqa’. Tsënö pasakunampaqmi Jehovä nishqa.
12 Kananqa wayikita kutikuy, markëkiman chäriptikillanam wamrëkiqa wanunqa. 13 Y llapan israelïtakunam alläpa waqar pampayanqa. Jeroboanpa familiampitaqa pëllam Israelpa Diosnin Jehoväpaq kuyë kashqa. Tsëmi Jeroboanpa familiampitaqa pëllata shumaq pampayanqa. 14 Kananqa juk gobernantitam Jehovä Dios churanqa israelïtakunapa mandaqnin kanampaq. Pëmi Jeroboanpa+ llapan familiankunata ushakätsinqa. Y kë ninqäkunaqa kanampitanam cumplikar qallëkunqa. 15 Israelïtakunaqa Aserä santupa postinkunata* adorarmi Jehovä Diosta cöleratsiyashqa.+ Tsëmi Pëqa unë kastankunata entreganqan markakunapita+ Eufratis mayu* tsimpanman,* llapan israelïtakunata qarqunqa.+ Jehovä Dios castigaptinmi pëkunaqa, yaku kuyutsiptin pakishqa shoqush wakman këman kuyukoqnö kayanqa. 16 Llapan israelïtakunata Jeroboan jutsata* ruratsinqampitam, llapan israelïtakunata Teyta Dios dejarinqa”.+
17 Tsënam Jeroboanpa warminqa jinan höra kutikurnin Tirzä markaman chärirqan. Y wayin punkuman chäriptinmi wamranqa wanurirqan. 18 Y Jehovä Dios ninqanta Ahïya willakunqannömi llapan israelïtakuna waqarnin wamrata pampayarqan.
19 Jeroboan gobernanqampita y guërrakunata ruranqankunapitaqa+ Israelchö gobernaqkunapaq willakoq librum masllata willakun. 20 Jeroboanqa veintidos watapam gobernarqan. Y wanuriptinnam+ Nadab jutiyoq tsurin gobernar qallëkurqan.+
21 Judäpa kastankunapa gobernaqninqa Salomonpa tsurin Rehoboammi karqan. Pëqa cuarenta y ünu watayoq këkarmi mandakur qallëkurqan y diecisiëti watapam Jerusalen markachö mandakurqan. Tsë markatam Jehovä Diosqa akrarqan+ jutimpa reqishqa kanampaq.+ Rehoboampa mamanqa Naamä jutiyoq ammonïta warmim karqan.+ 22 Judäpa kastankunaqa Jehovä Diosta mana cäsukurmi,+ imëka mana allikunata rurar unë kastankunapitapis mas cöleratsiyarqan.+ 23 Pëkunaqa jirkakunachö y atska rämayoq jatun montikuna o jatun qerukuna chakinchömi,+ altarkunata, sagrädu postikunata+ y rumipita sagrädu columnakunata+ adorayänampaq rurayarqan. 24 Entëru markachö këkaq templukunachömi ollqupura kakoqkuna kayarqan.+ Y Jehovä Dios qarqunqan unë nunakunanömi, israelïtakunaqa, melanëpaq imëka mana allikunata rurayarqan.
25 Rehoboam pitsqa watapa gobernëkaptinmi, Egiptuchö mandakoq Sisacqa+ Jerusalen markata atacarqan.+ 26 Y Jehoväpa templumpita y palaciu wayipitam llapan väleq cösaskunata apakurqan,+ hasta Salomon ruratsinqan örupita escüdukunatapis.+ 27 Tsënam Rehoboamqa apakuyanqan escüdukunapa rantin cobrillapitana escüdukunata ruratsirqan. Y palaciu punkuchö cuidakoq soldädukunapa mandaqninkunatam cuidayänampaq mandarqan. 28 Jehovä Diospa templunman gobernanti Rehoboam ëwaptinmi soldädukunaqa escüdunkunawan ëwayaq, y palaciuman kutiptinnam churaränan cuartuman escüdukunata kutitsiyaq.
29 Rehoboam ruranqankunapitaqa Judächö gobernaqkunapaq willakoq librum masllata willakun.+ 30 Rehoboamwan Jeroboanqa imëpis guërrachömi kayarqan.+ 31 Rehoboam wanuriptinnam, unë kastankuna pamparäyanqan David Markachö pampayarqan.+ Rehoboampa mamanqa Naamä jutiyoq ammonïta warmin karqan.+ Tsëpitanam Abiyam* jutiyoq tsurin+ gobernar qallëkurqan.