1 Rëyes
21 Nabot jutiyoq nunapam Jezreel+ markachö üvas chakran kapurqan, tsë chakraqa këkarqan Israelpa* gobernantin Acabpa palaciun lädunchömi. Tsë chakrarëkurmi problëma qallëkurqan. 2 Nabot-tam Acab kënö nirqan: “Wayï amänunchö këkaq üvas chakrëkitam munä huertata ruranäpaq. ¿Manatsuraq mas alli kaq üvas chakräwan cambiëkushwan? O manaqa rantikëkamë”. 3 Tsënam Nabotqa Acabta nirqan: “Jehovä Diostaqa manam gustanmantsu unë kastäkuna dejapayämanqan herenciata rantikuptïqa”.+ 4 Nabot* tsënö niptinmi, Acabqa llakishqa y cölerar wayinta kutikur mikuytapis munarqantsu y cämanman yëkurirmi cärantapis tsaparkur punukurqan. Nabotmi, “kastäkuna dejapayämanqan herenciataqa manam rantikushqëkitsu” nishqa karqan.
5 Tsënö këkanqanta rikëkurnam warmin Jezabelqa,+ “¿imanirtan llakishqa këkanki? ¿Imanirtan mikuytapis munankitsu? Willamë” nir tapurqan. 6 Acabnam nirqan: “‘Üvas chakrëkita üvas chakräwan cambiëkushun o manaqa rantikëkamë’ niptïmi jezreelïta Nabotqa munamashqatsu”. 7 Tsënam warmin Jezabelqa Acabta kënö nirqan: “Qamqa Israelchö gobernantim kanki. Ama llakikuytsu, sharkur mikuy. Noqam jezreelïta Nabotpa chakrantaqa entregashqëki”.+ 8 Tsënö nirmi Jezabelqa Acabpa jutinchö cartakunata qellqarkur sëllunwan sellarkur+ tsë markachö dirigentikunaman+ y mandakoqkunaman apatsirqan. 9 Tsë cartakunachöqa kënömi nirqan: “Ayunayänëkipaq llapëki juntakäyë, y llapankunapa puntanman Nabot-ta jamatsiyë. 10 Y ulikoq o llullakoq ishkaq nunakunata yachatsiyanki,+ ‘¡kë nunaqa Teyta Diospa y gobernantipa contranmi parlashqa!’+ nir Nabot-ta calumniayänampaq. Tsëpitana markapita juk läduman apëkur rumiwan wanutsiyanki”.+
11 Tsëmi cartakunachö Jezabel ninqannölla dirigentikuna, mandakoqkuna y llapan nunakuna rurayarqan. 12 Ayunayänampaq juntakëkurmi llapankunapa puntanman Nabot-ta jamatsiyarqan. 13 Tsëmannam ulikoq o llullakoq ishkaq nunakuna chäyarqan. Y Nabotpa puntanman jamëkurmi, “¡kë nunaqa Teyta Diospa y gobernantipa contranmi parlashqa!”+ nir acusayarqan. Tsënam markapita juk läduman apëkur llapan nunakuna rumiwan wanutsiyarqan.+ 14 Tsëpitanam Nabot-ta rumiwan wanutsiyanqanta+ Jezabelta willayarqan.
15 Nabot-ta wanutsiyanqanta musyarirnam Jezabelqa Acabta nirqan: “Chakranta rantikushuynikita mana munaq jezreelïta+ Nabotqa wanushqanam. Kananqa jinan höra ëwarnin chakranta duëñutukuy”. 16 Nabot wanushqa kanqanta musyarirmi, Acabqa jinan höra ëwarnin chakrapa duëñun tikrarqan.
17 Tsënam tisbïta Elïasta Jehovä Dios kënö nirqan:+ 18 “Ëwë, Samariachö täkoq*+ Israelpa gobernantin Acabman, pëqa Nabotpa üvas chakranchömi këkan, duëñun tikranampaqmi ëwashqa. 19 Kënö ninki. ‘Teyta Jehovämi nin: “¿Imanirtaq Nabot-ta wanuskatsir chakranta duëñutukurqunki?”’.+ Tsëpita kënö ninki: ‘Teyta Jehovämi nin: “Nabotpa yawarninta allqukuna laqwayanqanchömi qampa yawarnikitapis allqukuna laqwayanqa”’”.+
20 Tsëman chäriptinnam Acabqa Elïasta kënö nirqan: “¡Chikimaq nuna, ruranqäta musyarirku qayäpämaq shamurqunki!”.+ Elïasnam nirqan: “Awmi, Teyta Diosmi kënö nishunki: ‘Noqa Jehoväta mana cäsumar mana allikunata ruranqëkipitam,+ 21 desgraciakunapa pasanki y kastëkipita+ puëdeq llapan ollqukunata y mana puëdeq familiëkikunatapis+ Israelpitam ushakätsishaq. 22 Qamqa imëka mana allikunata rurarninmi cöleratsimarqunki, y israelïtakunatapis jutsatam* ruratsirqunki. Tsëmi Nebatpa tsurin Jeroboanpa+ llapan kastankunata y Ahïyapa tsurin Baasäpa+ llapan kastankunata ushakätsinqänölla, qampa kastëkikunatapis llapanta ushakätsishaq’. 23 Jehovä Diosqa warmikipaqpis kënömi nishqa: ‘Jezabelpa ayantaqa Jezreel chakrachömi+ allqukuna mikuyanqa. 24 Acabpa kastankuna markachö wanuyaptinqa, allqukunam mikuyanqa y juk lädukunachö wanuyaptinqa wiskurkunam mikuyanqa.+ 25 Acabnöqa+ manam ni pillapis warmin ninqankunata cäsukurnin Jehovä Diosta cöleratsishqatsu.+ 26 Pëqa amorreu nunakuna adorayanqan melanëpaq santukunata adorarmi alläpa jutsata* rurashqa. Tsë santukunata adorayanqampitam amorreu nunakunatapis Jehovä Diosqa qarqurqan’”.+
27 Teyta Dios ninqanta Elïas willariptinmi, Acabqa röpantapis rachirqan. Y chukru tëlakunata churakurkurmi ayunarqan, chukru tëlakunachö punurqan y llakishqallam purirqampis. 28 Tsëpitanam tisbïta Elïasta Jehovä Dios kënö nirqan: 29 “Acabqa humildi nunanam tikrashqa.+ Tsënö humildi kaptinmi, pëtaqa castigashaqnatsu. Wanuskiptinran tsurinkunata castigashaq”.+