Exodu
1 Israel, tsurinkuna y llapan familiankunaqa Egiptumanmi chäyarqan, y tsurinkunaqa kayarqan:+ 2 Ruben, Simeon, Levï, Judä;+ 3 Isacar, Zabulon, Benjamin; 4 Dan, Neftalï; Gad y Asermi.+ 5 Jacobpa llapan kastankunaqa setentam kayarqan. Y Josëqa Egiptuchönam këkarqan.+ 6 Tsëpitanam Josëqa wanukurqan o wañukurqan,+ tsënöllam wawqinkuna y tsë witsan nunakunapis ushakäyarqan. 7 Tsëpitanam israelïtakunapa wamrankuna mirar qallëkuyarqan, y mëtsikaqmi tikrayarqan. Y kawayanqan sitiukunamanmi juntariyarqan.+ Mëtsikaq kayaptinmi egipciukunaqa israelïtakunata mantsayarqanna.
8 Tiempu pasariptinqa juknam Egiptuchö gobernarqan, y pëqa manam Josëta reqishqatsu karqan. 9 Tsëmi gobernanqan marka mayinkunata nirqan: “Rikäyanqëkinöpis, israelïtakunaqa noqantsikpitapis masnam kayan, y mëtsikaq karmi mantsëpaqna kayan.+ 10 Tsëmi manana atskaq tikrayänampaq alli pensëkur imatapis ruranantsik. Mana imatapis rurashqaqa, chikimaqnintsikkuna noqantsikwan guërrata rurayaptinmi pëkunata yanapayanqa, y vencïkamarnintsikmi nacionnintsikpita ëwakuyanqa”.
11 Tsëmi lïsu mandakoqkunata churëkurnin alläpa trabajatsir sufritsiyarqan.+ Egiptuchö gobernaqpa gränu mikuyninkunata y cösasninkunata churayänampaqmi Pitom y Raamses markakunata ruratsiyarqan.+ 12 Israelïtakunaqa sufrikätsiyaptimpis mas atska tikrarmi mëtsëman juntayarqan. Tsënöpam egipciukunaqa masraq israelïtakunata mantsayarqan.+ 13 Tsëmi egipciukunaqa esclävunkunaman tikratsirnin ashnutanö trabajatsiyarqan.+ 14 Tsënö trabajatsirmi israelïtakunataqa alläpa sufritsiyarqan. Mituta y adöbitam ruratsiyarqan, y chakrakunachömi trabajatsiyarqan. Tsënö imëkata ruratsirmi alläpa sufritsiyarqan.+
15 Tsëpitanam gobernaqqa, hebrëa warmikunapa wamrankuna yuriptin yanapaq warmikunata parlaparqan. Tsë warmikunapa jutinkunaqa Sifrä y Puam karqan. 16 Tsë warmikunatam nirqan: “Hebrëa warmikunapa llullunkuna yuriptin yanapaq ëwarqa,+ llullunkunata rikëkurnin* këta rurayanki: wamrankuna ollqu kaptinqa wanutsiyanki, peru warmi kaptinqa ama wanutsiyankitsu”. 17 Tsënö niptimpis, tsë yanapakoq warmikunaqa, Dios Yayata llapan shonqunkunawan respetarmi gobernaq mandakunqanta rurayarqantsu, y manam ollqu wamrakunata wanutsiyarqantsu.+ 18 Tsëpitanam gobernaqqa, tsë yanapakoq warmikunata qayëkatsir, “¿imanirtaq ollqu wamrakunata wanutsiyarqunkitsu?” nirqan. 19 Tsënam tsë warmikunaqa gobernaqta contestayarqan: “Hebrëa warmikunaqa manam egipcia warmikunanötsu kayan. Pëkunaqa mas fuertim kayan, y manaraqpis chäyaptïmi llullunkuna yuririn”.
20 Tsëmi Teyta Diosqa tsë yanapakoq warmikunata bendicirqan, y israelïtakunaqa mirarmi sïguiyarqan, y tsënö mëtsika kayaptinmi egipciukunaqa masraq mantsayarqan. 21 Tsëpitanam Teyta Diosqa tsë yanapakoq warmikuna llapan shonqunkunawan respetashqa kayaptin, wamrayoq kayänanta permitirqan. 22 Tsëpitanam gobernaqqa marka mayinkunata, “tsëllaraq yurishqa hebreu ollqu wamrakunata Nïlu mayuman* jitarkuyë, peru warmi wamrakunataqa ama”+ nir mandarqan.