Exodu
15 Tsë kutichömi Moiseswan israelïtakunaqa Teyta Jehoväpaq kë cancionta cantayarqan:+
“Alläpa puëdeq kanqanta rikätsikushqa kaptinmi Teyta Jehoväpaq cantashaq.+
Pëqa cawallukunatawan soldädukunatam lamarchö ushakätsishqa.+
2 Teyta Jehovämi* kallpä y podernï kanampaq yanapaman, pëmi salvamashqa.+
Teyta Diosnï kaptin y papänïpa Diosnin kaptinmi+ imëpis alabashaq.+
3 Pëpa jutinqa Jehovämi,+ Teyta Jehoväqa pelyëta yachanmi.+
4 Egiptuchö gobernaqpa llapan soldädunkunata y guërrapaq carrëtankunatam lamarchö ushakätsishqa,+
y mas alli kaq soldädunkunam Puka lamarchö ushakäyashqa.+
5 Laqcheqyëkaq lamar yakum llapankunata tsaparkushqa, y ruminömi lamar rurinman jeqayashqa.+
6 Jehovä Dios, derëcha makikiqa alläpa puëdeqmi.+
Jehovä Dios, puëdeq kanqëkita rikätsikurmi chikishoqnikunata derëcha makikiwan ushakätsinki.
7 Alläpa puëdeq karmi contrëki churakaqkunata ushakätsinki.+
Shonquykita cöleratsiyämuptinmi raströjuta nina ushareqnö ushakätsinki.
8 Qam pükëkuptikillam yakupis sharkurqan,
y imëka perqa cuentam quedarqan.
Laqcheqyëkaq lamar yakupis këkanqanchömi quedarirqan.
9 Chikikoqkunaqa kënömi niyarqan: ‘¡Aku taripanqantsikyaq qatipar ëwashun!
¡Llapan munanqantsikta apakamushun!
¡Espädantsikwan ushakätsimushun!’+
10 Vientuykatsimuptikim lamarqa llapankunata tsaparkurqan.+
Lamarchömi ruminö illakäyarqan.
11 Jehovä Dios, qamwanqa manam santukuna igualayantsu.+
Qamllam alläpa limpiu Dios kanki.+
Qam ruranqëkitaqa manam ni pï rurëta puëdintsu, tsëmi qamlla derëchuyoq kanki respetashqa y alabashqa kanëkipaq.+
12 Derëcha makikita kamarkuptikim, lamarqa llapankunata tsaparkurqan.+
13 Sirwishoqnikikunata alläpa kuyarmi, pëkunata salvar shumaq pushëkanki.+
Y alläpa puëdeq kanqëkita rikätsikurmi, akranqëki sagrädu sitiuman apëkanki.
14 Qam ruranqëkita musyëkurqa,+ llapan nacionkunam alläpa mantsakäyanqa.
Filistëa kinrëchö nunakunapis llakikurmi imanö këta puëdiyanqatsu.
15 Edom kinrëchö dirigentikunapis kallpannaqmi quedayanqa.
Moab kinrëchö puëdeq mandakoqkunapis alläpam mantsakäyanqa.+
Canaanchö nunakunapis manam ima rurëta puëdiyanqatsu.+
16 Jehovä Dios, alläpa puëdeq kanqëkita rikarmi
llapankuna alläpa mantsakäyanqa.+
17 Jehovä Diosllä kikiki täkunëkipaq
alistanqëki jirkaman pushëkayämë,+
kikiki akranqëki sagrädu sitiuman Teyta Jehovä.
18 Qamllam Jehovä Dios imëyaqpis gobernanki.+
19 Sirwishoqnikikuna tsaki patsapa pasariyaptinmi+
Egiptuchö gobernaqqa cawallun montashqa soldädunkunawan
y guërrapaq carrëtankunawan qepäkunata shamurqan,+
y qamqa Teyta Jehovä, lamarchömi llapankunata ushakätsirqunki”.+
20 Tsëpitanam Teyta Diospa willakoqnin Miriamqa panderëtata tocar qallëkurqan, tsënam llapan warmikunapis tamborta tocar y tushurnin qepanta ëwayarqan. Miriamqa Aaronpa paninmi karqan. 21 Ollqu kaqkuna cantayanqanta contestarmi Miriamqa kënö cantarqan:
“Alläpa puëdeq kanqampita Teyta Jehoväta cantarnin alabayë.+
Pëqa, cawallukunatawan soldädukunatam lamarchö ushakätsishqa”.+
22 Tsëpitanam Moisesqa, Puka lamarpa kuchumpita israelïtakunata pusharkur Sur niyanqan tsunyaq sitiuman ëwakurqan. Kima junaqpam tsunyaq sitiupa puriyarqan, peru manam yakuta tariyarqantsu. 23 Tsëpitanam Marä* niyanqan sitiuman chäyarqan,+ y tsëchö tariyanqan yakuqa alläpam asqarqan,* tsëmi upuyta puëdiyarqantsu. Tsërëkurmi Moisesqa Marä nirnin tsë sitiupa jutin churarqan. 24 Tsënam israelïtakunaqa Moisesman witir “¿imatataq upuyäshaq?” nirnin quejakuyarqan.+ 25 Tsë höram Moisesqa Teyta Jehoväman rogakurqan,+ tsënam Teyta Jehoväqa juk plantata rikätsirqan. Y tsë plantata Moises yakuman jitarkuptinmi yakuqa upuypaqna karqan.
Teyta Diosqa tsëta rurarqan israelïtakuna cäsukoq o mana cäsukoq kayanqanta rikänampaqmi. Y tsë kutichö pasanqanwanmi imanö kawayänampaq kaqta yachatsirqan,+ 26 y kënömi nirqan: “Kikï Jehovämi sänuta katsiyashqëki,+ tsëmi noqa Jehovä ninqäta* cäsukuyänëki y alli kaqta rurayänëki. Tsënöllam mandakunqäkunata y llapan ninqäkunatapis cäsukuyänëki.+ Tsënö rurayaptikiqa manam egipciukunaman apamunqä qeshyakunawan castigayashqëkitsu”.+
27 Tsëpitanam Elim sitiuman chäyarqan, tsëchöqa döci sitiuchömi yaku pashtamoq y setenta palmërakunam karqan. Tsëchömi israelïtakunaqa yaku kuchunchö carpankunata* armayarqan.