Exodu

32 Moises jirkapita mana kutiptinmi+ israelïtakunaqa Aaron kaqman witïkur kënö niyarqan: “Egiptupita pushayämaq Moiseswan ima pasanqantaqa manam musyayätsu, tsëmi pushayämänampaq diosnïkuna ruramunëkita munayä”.+ 2 Tsënö niyaptinnam Aaronqa israelïtakunata nirqan: “Tsëqa warmikikunapa y wamrëkikunapa rinrinkunachö örupita zarcillukunata* apayämuy”.+ 3 Tsënam israelïtakunaqa örupita zarcillunkunata* Aaron kaqman apayarqan. 4 Tsëpitanam Aaronqa israelïtakuna apayanqan öruta tsulluratsirnin, martilluwan y cincelwan mallwa töruta rurarqan.+ Tsënam israelïtakunaqa niyarqan: “Israel nunakuna, këmi Diosnintsik. Pëmi Egiptupita pushamarquntsik”.+

5 Tsëpitanam Aaronqa tsë mallwa törupaq juk altarta rurëkur israelïtakunata nirqan: “Warëmi Teyta Jehoväta alabanapaq fiestata rurashun”. 6 Tsëmi waräninqa tempränulla sharkurnin ushakanqanyaq rupatsina qarëkunata rupatsiyarqan, y Teyta Dioswan amïgu kayanqanta rikätsikurmi qarëkunata rurayarqan. Tsëpitanam llapan israelïtakuna mikuyarqan, upuyarqan y kushikur qallëkuyarqan.+

7 Tsënam Teyta Jehoväqa Moisesta kënö nirqan: “Egiptupita pushamunqëki marka mayikikunaman ëwë. Pëkunaqa mana allikunatam rurëkäyan.+ 8 Mandakunqäkunatam qonqariyashqa,+ juk mallwa töruta rurëkurmi puntanman qonqurikur këkäyan. Y pishtashqa qarëkunata rupatsirmi kënö nikäyan: ‘Israel nunakuna, këmi Diosnintsik. Pëmi Egiptupita pushamarquntsik’”. 9 Y Teyta Jehoväqa kënöpis nirqanmi: “Israelïtakuna mana cäsukoq kayanqantam rikarqö.+ 10 Pëkunawan alläpa cölerashqa karmi llapankunata ushakätsishaq, y qampa tsurikikunatam juk jatun nacionman tikratsishaq”.+

11 Tsënam Moisesqa Teyta Jehoväta kënö rogakurqan:+ “Jehovä Diosllä, qamqa puëdeq kanqëkita rikätsikur y mëtsika milagrukunata rurarmi sirwishoqnikikunata Egiptupita pushamurqunki. Tsëqa, ¿imanirtan alläpa cölerakurnin ushakätsita munanki?+ 12 Sirwishoqnikikunata ushakätsiptikiqa, egipciukunam ‘jirkachö wanutsita munar y llapankuna ushakäyänanta munarmi Diosninkunaqa pushashqa’+ niyanqa. Tsëmi Teyta Diosllä ama cölerakuynatsu, y ama sirwishoqnikikunata pensanqëkinö ushakätsitsu. 13 Sirwishoqniki Abrahanman, Isaacman y Israelman yarpë. Pëkunatam jutikiman yarpëkur kënö änirqëki: ‘Qamkunapa kastëkikunaqa ciëluchö estrëllakunanömi mëtsika kayanqa,+ pëkunatam akranqä markakunata entregashaq, y pëkunapam imëpis kanqa’”.+

14 Tsënöpam Teyta Jehoväqa israelïtakunata ushakätsirqannatsu.*+

15 Tsëpitanam Moisesqa ishkan palta rumikunata aparkur+ jirkapita urarqan.+ Tsë rumikunaqa ishkan lädumpa qellqashqam karqan. 16 Tsë palta rumikunataqa kikin Teyta Diosmi rurashqa karqan, y tsëmanmi mandakunqankunata qellqashqa karqan.+ 17 Jirkapita urëkämurnam Josuëqa israelïtakuna büllayanqanta wiyar, “campamentuchöqa pelyachö këkaqnötaq büllëkäyan” nirqan Moisesta. 18 Tsënam Moisesqa nirqan:

Pëkunaqa jukläya cancionkunatam cantëkäyan”.

19 Campamentuman chëkarnam Moisesqa israelïtakuna rurayanqan mallwa töruta+ y tushuykäyanqanta rikarqan, y alläpa cölerarmi apëkanqan palta rumikunata ushakaqpaq jitaskirqan.+ 20 Tsëpitanam israelïtakuna rurayanqan mallwa töruta ninawan rupatsir ushakätsirqan, y quedanqantanam polvuman tikratsirqan.+ Y tsë polvuta yakuman jichëkurmi israelïtakunata upuyänampaq mandarqan.+ 21 Tsëpitanam Moisesqa Aaronta nirqan: “¿Imata niyäshuptikitaq israelïta mayintsikkunata kë alläpa jutsaman* chätsirqunki?”. 22 Tsënam Aaronqa kënö nirqan: “Ama noqawan cölerakuytsu teytallë, musyanqëkinöpis israelïta mayintsikkunaqa imëpis mana allillatam rurayan.+ 23 Pëkunaqa kënömi niyämarqan: ‘Egiptupita pushayämaq Moiseswan ima pasanqantaqa manam musyayätsu, tsëmi pushayämänampaq diosnïkuna ruramunëkita munayä’.+ 24 Tsënam, ‘tsëqa rinrikikunachö örupita zarcillukunata* apayämuy’ nirqä. Y apayämunqan öruta tsulluratsiptïmi kë mallwa töruman tikrashqa”.

25 Aaron permitishqa kaptin israelïtakuna mana allikunata rurëkäyanqantam Moisesqa rikarqan. Y tsëta rikarmi chikeqninkunapis israelïtakunapita burlakuyarqan. 26 Tsënam Moisesqa campamentupa yëkunanman ëwëkur, “llapëki Teyta Jehoväta mana dejëta munaqkuna noqaman shayämuy” nirqan.+ Y Levïpa llapan kastankunam Moises kaqman witiyarqan. 27 Tsënam Moisesqa nirqan: “Jehovä Diosnintsikmi këta nin: ‘Llapankuna espädankunata aptarkur wawqinkuna, vecïnunkuna o amïgunkuna kayaptimpis, entëru campamentuchö llapan jutsata* rurashqa kaqkunata wanutsiyätsun’”.+ 28 Levïpa kastankunaqa Moises ninqannölla rurarmi tres miltanö ollqukunata wanutsiyarqan. 29 Tsënam Moisesqa pëkunata nirqan: “Qamkunaqa jutsata* ruraq tsurikikunata y wawqikikunata wanutsiyänëkipaqmi listu këkäyarqunki,+ y kanampitaqa rikätsikuyänëki Teyta Jehoväta sirwiyänëkipaq akrashqa kayanqëkitam. Y kanan junaqmi pëqa bendiciyäshunki”.+

30 Waränin junaqnam Moisesqa israelïtakunata nirqan: “Qamkunaqa alläpa jutsatam* rurayarqunki. Tsëmi Teyta Jehoväta rogakoq jirkata yapë witsäshaq, capaz tsënöpa jutsëkikunapita perdonashqa kayankiman”.+ 31 Tsëpitanam Moisesqa jirkaman witsärir Teyta Jehoväta nirqan: “Sirwishoqnikikunaqa alläpa jutsatam* rurëkuyashqa, y örupita santunkunam rurayashqa.+ 32 Peru qam munarninqa jutsankunapita* perdonëkullë,+ sinöqa qellqanqëki librupita jutïta borrëkullë”.+ 33 Tsënam Teyta Jehoväqa Moisesta kënö nirqan: “Jutsata* ruraqkunapa jutintam qellqanqä librupitaqa borrashaq. 34 Kananqa, noqa ninqaq sitiuman sirwimaqnïkunata pushë, y noqapa angelnïmi puntëkita ëwanqa.+ Jutsata* ruraq kaqkunataqa cuentata mañanqä junaqmi castigashaq”. 35 Tsëpitanam Teyta Jehoväqa, Aaronwan mallwa töruta ruratseq israelïtakunata castigarqan.