Isaïas
8 Teyta Jehovämi nimarqan: “‘Maher-Salal-Has-Baz’* nir jatun tablaman+ qellqë.* 2 Y ninqänölla kanampaqmi confiakuypaq sacerdöti Urïas+ y Jeberekïaspa tsurin Zacarïas qellqayanqa”.
3 Tsëpitanam Diospa willakoqnin warmïqa qeshyaq tikraskirqan, y killan cumpliriptinmi ollqu tsurï yurirqan.+ Tsënam Teyta Jehoväqa, “Maher-Salal-Has-Baz nir jutin churë nimarqan. 4 Tsë tsuriki, ‘papä’ o ‘mamä’ nita manaraq yachakuptinmi, Asiriachö+ gobernaqqa Damascu y Samaria markakunata vencir llapan imëkankunata apakunqa”.
5 Teyta Jehoväqa yapëmi kënö nimarqan:
6 “Siloë+ jatun pözuchö yakuta despreciashqa kayaptin,
y gobernaq Rezinwan y Remalïaspa tsurinwan kushishqa kayaptinmi,+
7 Teyta Jehoväqa pëkunata ushakätsinampaqmi
Eufratis mayutanöraq* Asiriapa+ puëdeq gobernaqninta
y soldädunkunata pushanqa.
Pëkunaqa lloqlla yakunöraq shamurmi llapan tarinqanta,
8 y Judä markatapis ushakätsiyanqa.
Y nunata kunkanyaq yaku tsapareqnömi,+
entëru Judä markata ushakätsiyanqa.
9 Teyta Diospa markanta chikeqkuna,
kikin Teyta Diosmi ushakätsiyäshunki.
¡Llapëki karu markapita nunakuna wiyayämë!
¡Pelyayänëkipaq alistakuyaptikipis ushakätsiyäshunkim!+
¡Guërrapaq alistakuyaptikipis pasëpam* venciyäshunki!
10 ¡Imata rurayänëkipaq alistakuyaptikipis,
manam alistakuyanqëkinötsu yarqunqa!
11 Teyta Jehoväqa puëdeq karmi kë markachö nunakuna portakuyanqanta mana ruranäpaq, kënö nimarqan:
12 “Kë markachö pitapis mana allita rurayänampaq niyaptinllaqa,
ama mana alli rurëtam munëkäyan niyankitsu.
Ama pëkuna mantsayanqanta mantsayëtsu ni tsëkunarëkur karkaryäyëtsu.
13 Angelkunata mandaq Teyta Jehovälla limpiu kaptinmi,+
pëllata mantsayänëki
y pëllata respetayänëki”.+
14 Pë sagrädu sitiunö karpis,
Israelchö ishkan gobiernukunapaqmi,
ishkitsikoq ruminö y trompizatsikoq qaqanö kanqa.+
Y Jerusalenchö nunakunapaqpis
trampanö y shawakuna waskanömi kanqa.
15 Mëtsikaqmi trompizar ishkirnin ushakäyanqa.
Trampaman ishkirmi, qeshpir ëwakuytapis puëdiyanqatsu.
16 ¡Kananqa tsë qellqanqëki mandakuyta alli piturkur,
sirwimaqnïkuna rikëkäyaptin següru sitiuman churëkuy!
17 Jacobpa kastankunata manana yanapaptimpis,+ noqaqa Teyta Jehovä ruramunampaq kaqtam alkäbu shuyëkäshaq,+ y pëmanmi imëpis confiakushaq.
18 ¡Rikäyë! Noqawan tsurïkunaqa Teyta Jehoväpita señalkunanö,+ y Sion jirkachö kawaq angelkunata mandaq Teyta Jehovä ruranqan milagrukunanömi kayä.
19 Qamkunata kënö niyäshuptikiqa: “Wanushqakunawan parlayanqanta neqkunaman y suerti qateqkunaman tapukoq ëwayë. Pëkunaqa mana entiendipaqmi shiminkuna rurinllachö imatapis parlayan”. ¿Wanushqa këkaqkunatatsuraq kawëkaqkunapaq rogakuyankiman? ¿Manatsuraq tsëpa rantinqa Teyta Diosta tapukuyankiman?+ 20 Awmi, Teyta Dios mandakunqankunachö y wakin ninqankunachömi yanapakuyta ashiyänëki.
Teyta Dios ninqannö mana yachatsikurqa, manam ninqankunata entiendita puëdiyankitsu.+ 21 Pëkunaqa llakishqa y mallaqëkarmi+ nacionninkunapa pasayanqa. Tsënö mallaqar y cölerarmi gobernaqninkunata culpayanqa, y Teyta Diosninkunatapis ciëluman rikëkurmi maldiciyanqa. 22 Mëtsëpa rikarpis llakikuyllata, mana allikunallata, nunakuna sufreqta, kallpannaq këkaqta y yana pukutëllatam rikäyanqa, y manam ima allitapis rikäyanqatsu.