Jeremïas
16 Tsëpitanam Teyta Jehoväqa yapë parlapämar kënö nimarqan: 2 “Ama kë sitiuchöqa warmiki ashitsu, y ama warmipis ni ollqupis tsurikikuna katsuntsu. 3 Kë nacionchö warmi y ollqu wamrakunapaq, wamrayoq tikraq warmikunapaq y tsurikunayoq tikraq ollqukunapaqmi Teyta Jehovä këta nin: 4 ‘Wanutsikoq qeshyakunawanmi ushakäyanqa,+ y manam pillapis pëkunapaq waqanqatsu ni pëkunata pampanqatsu.+ Tsëpa rantinqa, animalkunapa ismaninnömi wakchö këchö jitaräyanqa. Espädawan wanutsiyanqankunata y mallaqëpita wanoqkunatanam,+ ëtsa mikoq pishqukuna y ëtsa mikoq animalkuna mikuyanqa’.
5 Teyta Jehovämi këta nin: ‘Sirwimaqnïkunatam yamë kayänampaq yanaparqä,
peru kananqa manam pëkunata kuyashaqnatsu ni llakipäshaqnatsu,*+
y manam yamë kayänampaq yanapashaqnatsu’.
Teyta Jehoväqa këtapis ninmi: ‘Tsëmi ama wanupakushqa nunapa wayinman yëkuytsu,
y ama tsëchö waqëtsu ni wanupakushqakunata llakipëtsu.+
6 Ichikpis jatumpis kë kinrë markakunachömi wanuyanqa o wañuyanqa,
y manam ni pï pëkunata pampanqatsu ni pëkunapaq waqanqatsu.
Y manam ni pï pëkunapaq llakikur
qaranta roqukunqatsu ni aqtsanta rutukunqatsu.*
7 Manam pillapis wanupakushqakunata
shoqar mikuynin qaranqatsu,
y manam papäninta o mamäninta
wanupakushqata shoqarpis vïnuta qarayanqatsu.
8 Fiestata rurëkäyanqan wayimanqa ama yëkuytsu
y ama tsëchö këkaq nunakunawan mikunëkipaq ni upunëkipaq jamakuytsu’.
9 Noqa Israelpa Diosnin angelkunata mandaq Jehovämi këta nï: ‘Qamkuna kawëkäyaptiki y qamkuna rikëkäyaptikim, kë kinrëchöqa kushikur büllayanqanatsu, y noviuwan novia parlayanqampis manam wiyakanqanatsu’.+
10 Tsë llapan ninqäkunata willaptikinam, sirwimaqnïkunaqa kënö tapuyäshunki: ‘¿Imanirtan Teyta Jehovä nishqa tsë imëka mana allikunata noqantsikman chätsimunampaq? ¿Ima mana allita o ima jutsatataq* Jehovä Diosnintsikpa rikëninchö rurarquntsik?’.+ 11 Tsënam qamqa kënö contestanëki: ‘“Tsënöqa kanqa, unë kastëkikuna noqata dejaramar+ imëkata rurar santukunata adorashqa kayaptin, y pëkunapa puntanman qonqurikushqa kayaptinmi.+ Awmi, pëkunaqa noqatam dejayämarqan, y manam mandakunqäkunata cäsukuyarqantsu,+ ninmi Teyta Jehovä. 12 Y qamkunaqa unë kastëkikunapita mas peormi portakuyarqunki,+ y noqata cäsuyämänëkipa rantinmi, kutin kutin mana alli shonquykikuna munanqanta rurayanki.+ 13 Tsëmi kë kawëkäyanqëki markakunapita, qamkuna ni unë kastëkikuna mana reqiyanqan markakunaman apayäshunki.+ Y noqa qamkunata mana yanapaptïmi,* paqasta junaqta santukunata adorayanki”’.+
14 ‘Teyta Jehoväqa kënöpis ninmi: “¡Ichikllachönam israelïtakunata Egiptu nacionpita salvamoq Teyta Jehovä imëpis kawanqannöllam!”+ nir parlayanqanatsu. 15 Tsëpa rantinqa, “¡norti lädupita y mëtsëman apayanqampita israelïtakunata kutitsimoq Teyta Jehovä imëpis kawanqannöllam!” nirnam parlayanqa. Awmi, unë kastankunata entreganqä markakunamanmi pëkunata kutitsimushaq’.+
16 Teyta Jehovämi këta nin: ‘Qamkunamanmi mëtsika nunakunata mandamushaq,
y pëkunaqa pescädu tsareqnömi* qamkunata tsariyäshunki.
Tsëpitanam yapë mëtsika nunakunata qamkunaman mandamushaq,
y pëkunaqa chukaru animalta tsareqnömi,
jirkakunachö, taksha jirkakunachö, qaqakuna rurinchö y mëchöpis këkäyanqëkichö ashiyäshunki.
17 Noqaqa llapan rurayanqantam rikëkä.
Manam noqapitaqa pakakuyta puëdiyantsu, y mana allikunata rurarpis
manam rikënïpita pakëta puëdiyantsu.
18 Pëkunaqa herenciä cuenta markakunatam imëka melanëpaq santukunawan juntatsiyashqa.+
Y akranqä markakunatam, kawëninnaq melanëpaq santukunawan mana limpiuta tikratsiyashqa.
Tsëmi puntataqa mana allikunata rurayanqampita y jutsata* rurayanqampita pëkunata feyupa castigashaq’”.+
19 Teyta Jehovä, qammi kallpa kanki y qammi kallpayoqta tikratsimanki.
Llakikunqä tiempupis, qammi qeshpir ëwanäpaq següru sitiunö kanki.+
Qamman shamurmi mëtsë nacionpita nunakuna kënö niyanqa:
“Unë kastäkunaqa mana imapaqpis väleq, mana imapaqpis sirweq
y mana imachöpis yanapakoq santukunatam adorayarqan”.+
20 ¿Nunakunaqa puëdiyanmantsuraq diosninkuna rurëta?
Tsënö kaptimpis, manam rurayanqankunaqa rasumpa diostsu kayan.+
21 “Tsëmi kananqa, kallpayoq
y puëdeq kanqäta musyatsishaq,
y jutï Jehovä kanqantam musyayanqa”.