Ezequiel
39 Nunapa tsurin, kananqa Gogta ima pasanampaq kaqta kënö willakuy: ‘Llapanta Gobernaq Teyta Jehovämi kënö nishunki: “Mesecpa y Tubalpa+ mas mandaqnin Gog,+ kananqa noqam contrëki këkä. 2 Juk lädupa ëwëkaqta tumaratsirnikim, mas karun kaq norti lädupita+ Israel jirkakunaman apamushqëki. 3 Y tsëchömi izquierda kaq makikiwan aptarëkanqëki arcuta juklla qochirishqëki o qechushëki y derëcha kaq makikiwan aptarëkanqëki flëchatam jitaratsishqëki. 4 Israel jirkakunachömi,+ llapan soldäduykikunawan y yanapayäshoqniki llapan nunakunawan juntu ishkinki. Tsëchömi wiskurkuna* y chukaru animalkuna mikuyäshunki”’.+
5 ‘Noqa parlanqänöllam pampachö ishkinki’+ ninmi Llapanta Gobernaq Teyta Jehovä.
6 ‘Magogman y islakunachö següru kawakoqkunamannam, ushakätsinampaq ninata mandëkushaq.+ Y musyariyanqam noqa Jehovä kanqäta. 7 Sirwimaq Israel nunakunachöqa, sagrädu jutïmi reqishqa kanqa y mananam permitishaqnatsu sagrädu jutïpaq mana allikunata parlayänanta. Llapan nacionkunam musyariyanqa Israelpa limpiu+ Diosnin noqa Jehovä kanqäta’.+
8 Këtam Llapanta Gobernaq Teyta Jehovä nin: ‘Awmi, tsë junaqqa chëkämunnam y cumplikanqam. Parlanqäkuna cumplikänan junaqqa chëkämunnam. 9 Israel markakunachö kawaqkunam markankunapita yarqur tukuyläya armakunata, jatusaq y taksha escüdukunata,* arcukunata, flëchakunata, guërrapaq garrötikunata* y lanzakunata juntayanqa y qotuykurmi ninawan rupatsiyanqa. Tsë armakunataqa mëtsika kaptinmi qanchis wataraq rupatsir ushayanqa.+ 10 Ninata prendiyänampaq tsë armakuna mëtsika kaptinmi, yantataqa wanayanqanatsu* ni montikunapita yantapaq qeruta apayanqanatsu’.
‘Kikinkuna puntata rurayanqannöllam pëkunapatapis imëkankunata apakuyanqa’ ninmi Llapanta Gobernaq Teyta Jehovä.
11 ‘Tsë junaqmi Gogtaqa+ Israelchö pampayanqa. Inti o rupay yarqamunan lädupita viajaqkuna puriyanqan lamar kuchun pampamanmi pampayanqa. Tsëpa pureqkunaqa manam pasëta puëdiyanqatsu. Tsë pampachömi Gogtawan llapan yanapaqninkunata pampayanqa. Tsë pampataqa Hamon-Gog nirmi reqiyanqa.+ 12 Israel nunakunaqa qanchis killaran pampar ushayanqa, tsëran patsaqa limpiu quedanqa.+ 13 Poderösu kanqäta musyatsikunqä junaqmi, tsë nacionchö täkoq* llapan nunakuna yanapanakur pampayanqa. Y tsëta rurayanqampitam reqishqa kayanqa’+ ninmi Llapanta Gobernaq Teyta Jehovä.
14 ‘Entëru nacion limpiu quedanampaqmi, nunakunata mandayanqa mëtsëpa ëwarnin jitarëkaq ayakunata ashir ashir pampayänampaq. Qanchis killapam tsënö ashiyanqa. 15 Entëru nacionpam nunapa tullunta ashir ashir ëwayanqa. Y tarirqa, tsë tullupa lädunmanmi juk señalta churayanqa. Y pampayänampaq qepankunata ëwaq kaqkunanam, tsë tullukunata Hamon-Gog pampaman pampayanqa.+ 16 Tsëchömi Hamonä* jutiyoq markapis kanqa y Israel nunakunam patsata limpiayanqa’.+
17 Nunapa tsurin, qamtam Llapanta Gobernaq Teyta Jehovä kënö nishunki: ‘Wiskurkunata y chukaru animalkunata llapanta qayamuy, kënö nï: “Llapëki juntakëkur mëtsëpitapis shayämuy. Qamkunapaqmi Israel jirkakunachö alli mikuyta alistëkä. Alistanqa mikuypa entëru lädunman churakäyämuy.+ Mëtsika ëtsatam mikuyanki y yawartapis upuyankim.+ 18 Puëdeq nunakunapa ëtsantam mikuyanki y mandakoq nunakunapa yawarnintam upuyanki. Basanchö llapan wira* animalkunatam mikuyanki: carnërukunata, malta üshakunata, cabrakunata y törukunata. 19 Qamkunapaqmi mëtsika mikuyta alistëkä y wiratapis melanäyanqëkiyaqmi mikuyanki y yawartapis machayanqëkiyaqmi upuyanki”’.
20 ‘Alistanqä mësachöqa cawallukunata, carrëta manejaqkunata, puëdeq nunakunata y llapan* soldädukunatam pacha junta mikuyanki’+ ninmi Llapanta Gobernaq Teyta Jehovä.
21 ‘Nacionkunam rikäyanqa poderösu kanqäta y llapan nacionkunachö kawaq nunakunam musyayanqa pëkunata juzgar condenanqäta y poderösu kanqäta.+ 22 Tsë junaqpita qallëkurmi Israel nunakunaqa musyayanqa Diosninkuna noqa Jehovä kanqäta. 23 Y llapan nacionkunam musyayanqa, Israel nunakunaqa kikinkuna jutsata* rurayanqampita y noqata dejaramar mana allikunata rurayanqampita+ juk nacionkunaman prësu ëwayanqanta. Mana allita rurayaptinmi, noqaqa rikëtapis munarqänatsu+ y chikeqninkunapa poderninchö kayänanta+ y espädawan wanutsiyänantam permitirqä. 24 Pëkunataqa imëka mana allikunata rurayanqampita, imëka jutsata* rurayanqampitam castigarqä y manam rikëtapis munarqänatsu’.
25 Peru Llapanta Gobernaq Teyta Jehovämi kënö nin: ‘Kananqa Jacobpa kastankunatam mëtsëchö këkäyaqta kutitsimushaq+ y Israel nunakunatam llakipäshaq.*+ Y sagrädu jutïtaqa respetatsishaqmi.+ 26 Noqata dejaramar mana allikunata rurayanqampitam penqakushqa kawayarqan.+ Peru kananqa patsachömi següru kawakuyanqa y manam ni pï mantsatsinqanatsu.+ 27 Mëtsë markakunapita y chikiyäshoqniki nunakunapa markankunapitam kutitsiyämushqëki.+ Qamkunapaq imëkata ruramunqäta rikarmi, mëtsë nacion nunakuna respetayämanqa’.+
28 ‘Mëtsë nacionkunaman prësu mandanqäpitam, ni jukllëllatapis mana dejëpa markankunaman kutitsimushaq, tsëmi musyayanqa noqa Jehovä Diosninkuna kanqäta.+ 29 Kananqa mananam Israel nunakunapita cäräta pakäshaqnatsu.+ Tsëpa rantinqa podernïwanmi yanapashaq’+ ninmi Llapanta Gobernaq Teyta Jehovä”.