Daniel
9 Media nacionpita Asuërupa tsurin Darïu,+ juk watana caldeu nunakunata gobernëkaptinmi,+ 2 noqa Daniel, librukunata* leyirnin cuentata qokurqä, Jerusalen+ markaqa setenta watapa ushakashqa kanampaq kaqta.+ Tsëqa kanan karqan willakoqnin Jeremïasta Jehovä Dios ninqannömi. 3 Tsëmi ayunar Jehovä Diosman rogakur mañakunäpaq+ chukru tëlata churakurqä y uchpata jichakurqä. 4 Jehovä Diosnïman mañakurmi jutsata* rurayanqäta kënö nir willarqä:
“Teyta Jehovä, qamllam rasumpa y puëdeq Diosqa kanki. Ruranqëki acuerdutaqa cumplinkim, y kuyashoqnikikunata y mandakunqëkita cäsukoqkunataqa+ alläpam kuyanki.+ 5 Noqakunam jutsata* rurayarqö y mana allikunata rurayarqö.+ Mana wiyakoq karmi mandakunqëkikunata y leynikikunata cäsukuyarqötsu. 6 Gobernantïkunata, dirigentïkunata, unë kastäkunata y llapankunata willakoqnikikuna parlapëkäyämaptimpis manam cäsukuyarqötsu.+ 7 Teyta Jehovä, qamqa imatapis allillatam ruranki. Noqakunam jutsata* rurashqa kar y niyämanqëkita mana cäsukushqa kar penqakushqa këkäyä. Judä kastapita karpis, Jerusalenchö kawarpis, amänu o karu markakunachö karpis o mëtsë markakunaman ëwashqa karpis llapäkunam* penqakushqa këkäyä.+
8 Teyta Jehovä, penqakushqam këkäyä. Noqakuna, gobernantïkuna, dirigentïkuna y unë kastäkunam mandayämanqëkita mana cäsukur jutsata* rurayarqö. 9 Mana cäsukoq kayaptïpis,+ qamqa llakipäkoq* y perdonakoqmi kanki Teyta Jehovä.+ 10 Noqakunaqa Teyta Jehovä, manam niyämanqëkita ni willakoqnikikunawan musyatsiyämanqëki leynikikunata cäsukuyarqötsu.+ 11 Llapä israelïtakunam Leynikita wiyakuyarqötsu, y parlapäyämanqëkitapis mana kaqpaq churarmi imëka jutsata* rurayarqö. Tsëmi Teyta Dios,+ sirwishoqniki Moises qellqanqan Leychö ninqannö noqakunaman maldicion chämushqa. 12 Ninqëkinömi,+ noqakunata y gobernantïkunatapis* castigayämarqunki. Jerusalen markata pasanqannöqa manam ni mëqan markatapis pasashqatsu.+ 13 Moiseswan qellqatsinqëki Leychö ninqannömi,+ imëka mana allikuna pasayämashqa. Peru noqakunaqa Teyta Jehovä, manam perdonayämänëkipaq mañakayämurqötsu y mana alli rurëkunatapis manam dejayarqötsu.+ Qamqa parlanqëkita cumplinkim, tsëta musyëkarpis upatukurmi kayä.
14 Teyta Jehovä, qamqa llapan rurayanqätam rikëkämurqunki, tsëmi castigayämarqunki. Teyta Jehovä, qamqa imatapis allillatam ruranki, noqakunam niyämanqëkitaqa cäsuyarqötsu.+
15 Teyta Jehovä, qammi poderösu kar,+ sirwishoqnikikunata Egiptupita pushamurqëki, tsëmi jutikita mëtsëchö musyayan.+ Tsëta musyëkarpis imëka mana allikunatam rurayarqö. 16 Teyta Jehovä, qamqa alli ruraqmi kanki,+ amana sagrädu jirkëkichö këkaq Jerusalen markëkita castiguëkullënatsu. Unë kastäkuna y noqakunapis jutsata* rurayanqäpitam, Jerusalen markëkipaq y noqakunapaqpis nunakuna mëtsëchö burlakuyan.+ 17 Dios Yaya kananqa, rogakur mañakamuptï wiyëkallämë. Teyta Jehovä, ushakashqa këkaq+ sagrädu sitiuykipaq+ imëka allikunata rurëkullë, tsënöpam alabayäshunki. 18 ¡Teyta Dios, mañakamuptï wiyëkallämë! Rikanqëkinöpis jutikipa reqishqa markaqa ushakashqam këkan. Llakipäkoq* kanqëkita musyarmi jutsasapa* këkarpis mañakayämü.+ 19 Teyta Jehovä wiyëkayämë, perdonëkayämë Jehovä.+ ¡Mañakayämunqäta rurëkullë Teyta Jehovä! Ama tsënölla kakunanta dejëkullëtsu. Tsë markapis y sirwiyäshoqnikikunapis jutikipa reqishqam kayan, amana jutikipaq mana allita parlayätsunnatsu”.+
20 Tsënömi jutsata* ruranqäpita y israelïtakuna jutsata rurayanqampita perdonta mañakur y sagrädu jirkampaq Jehovä Diosman mañakur këkarqä.+ 21 Tsënö mañakuykaptïmi, imëka suëñuchönö rikanqä+ Gabriel nunaqa+ lädüman shamurqan. Tsë höraqa tardinam karqan, gränupita rurashqa qarëkunata Teyta Diospaq rupatsiyänan hörana, y noqaqa kallpannaqmi këkarqä. 22 Pëmi kënö nimarqan:
“Daniel, noqam shamurqö tsë llapanta shumaq entienditsinaqpaq. 23 Qamtaqa Teyta Dios kuyashunkim, mañakur qallëkuptikillam shamunäpaq mandamashqa, tsëmi shamurqö ima ninan kanqanta entienditsinaqpaq.+ Kananqa suëñuchönö rikanqëkita entiendinëkipaq shumaq wiyamë.
24 Setenta semänaraqmi* pasanqa marka mayikikuna y sagrädu markapis+ mana alli rurëpita y jutsa* rurëpita librina kanampaq.+ Tsë semänakuna pasaptinraqmi jutsankunapita limpiu kayanqa,+ imëyaqpis alli rurëllana kanqa,+ suëñuchönö rikanqëkikuna y Diospa willakoqninkuna willakuyanqan+ cumplikanqa y Alläpa Sagrädu Cuartupis limpiu kanqa. 25 Y allim entiendinëki, Jerusalenta yapë rurayänampaq+ mandakuyanqampita, Dios Akranqan*+ nuna o Mandakoq chämunqanyaqqa,+ qanchis semäna y sesenta y dos semänaran pasanqa.+ Alläpa mana alli tiempuchömi, pläzayoqta y entërumpa zanjayoqta yapë rurayanqa.
26 Sesenta y dos semäna ushariptinmi, Dios Akranqan* nunata wanutsiyanqa+ y imannaqmi quedarinqa.+
Juk mandakoqmi soldädunkunawan shamur, markata y sagrädu sitiuta ushakätsinqa.+ Mëtsika yaku ëwar imëkatapis ushakätseqnömi ushakätsinqa. Ushananyaqmi guërra kanqa, y manam ni imapis kanqanatsu.+
27 Dios Akranqan* nunam, wakin nunakunata yanaparnin ruranqan acuerduta juk semänapa välitsinqa. Y pullan semänachöqa qarëkunata* rupatsiyänanta manam dejanqanatsu.+
Y melanëpaq cösaskunapa älanchömi, ushakätsikoq shamunqa.+ Dios dispuninqannömi, juchushqa* këkaqkunatapis pasëpa* ushakätsinqa”.