Levïticu

16 Teyta Jehoväta mana respetarnin Aaronpa tsurinkuna wanuyanqampita ichik tiempu pasariptinmi,+ Teyta Jehoväqa Moisesta yapë parlaparqan. 2 Teyta Jehoväqa Moisesta kënömi nirqan: “Noqaqa pukutë rurinchömi Sagrädu Cäjapa tsapanan jananchö+ yurimushaq,+ tsëmi cortïna qepanchö+ sagrädu sitiuman munanqan höra mana yëkunampaq,+ wawqiki Aaronta ninëki, tsënöpa Sagrädu Cäjapa puntanchö karnin mana wanunampaq o wañunampaq.+

3 Sagrädu sitiuman yëkurqa, këkunatam Aaron apanan: jutsampita* perdonashqa kanampaq mallwa töruta,+ ushakanqanyaq rupatsina qarëpaq carnëruta,+ 4 lïnupita sagrädu largu röpata,+ lïnupita trüsata,+ lïnupita wachukuta+ y lïnupita peqa o uma wankunata.+ Tsë röpakuna sagrädu kaptinmi,+ manaraq vistikurnin bañakunan.+

5 Jutsankunapita* perdonashqa kayänampaq qarëpaqmi israelïtakunaqa ishkë mallwa chïvuta* apayämunan, y ushakanqanyaq rupatsina qarëpaqnam juk carnëruta apayämunan.+

6 Aaronqa jutsampita* perdonashqa kanampaq apamunqan törutam rupatsinan, tsënöpa pë+ y familiankuna jutsata rurayanqampita perdonashqa kayänampaq.

7 Tsëpitanam ishkan mallwa chïvuta,* noqa Jehoväpa rikënïchö carpa* wayi yëkunanman apamunan. 8 Tsëchömi, mëqan chïvu* noqa Jehoväpaq kanqanta y mëqan chïvu Azazelpaq* kanqanta musyanampaq Aaron sortianan. 9 Tsëpitanam, noqa Jehoväpaq kaq chïvuta,*+ jutsampita* perdonashqa kanampaq Aaron rupatsimunan. 10 Peru Azazelpaq kaq chïvutaqa,* kawëkaqtam noqa Jehoväpa rikënïman apamunan. Tsëpitanam tsunyaq sitiuman Azazelpaq apatsinan.+ Aaron tsëta ruraptinmi, israelïtakuna jutsata* rurayanqampita perdonashqa kayanqa.

11 Tsëpitanam Aaronqa jutsampita* perdonashqa kanampaq töruta altarman apamunan, tsënöpa kikin jutsata ruranqampita y familian jutsata ruranqampita perdonashqa kayänampaq. Tsëpitanam tsë töruta pishtanan.+

12 Noqa Jehoväpa rikënïchö këkaq altarpitam, ninayoq+ sartenta,+ y ishkë aptë alli aqashqa inciensuta+ cortïnapa qepanman Aaron apanan.+ 13 Tsëpitanam, noqa Jehoväpa rikënïchö ninaman inciensuta jichanan.+ Y Aaron mana wanunampaqmi o wañunampaqmi, inciensu rupanqan Sagrädu Cäjapa+ tsapananta tsaparinqa.+

14 Tsë törupa yawarninman dëdunta tullpurkurmi, inti o rupay yarqamunan lädupa Sagrädu Cäjapa tsapananta pillchitsinan.*+ Tsënöllam tsë törupa yawarninman dëdunta tullpurkur, sagrädu cäjapa tsapanampa frentinman qanchis kuti pillchitsinan.+

15 Tsëpitanam israelïtakuna jutsankunapita* perdonashqa kayänampaq apayanqan chïvuta* pishtanan.+ Tsë chïvupa yawarnintam cortïnapa qepanman apanan,+ y törupa yawarninta+ Sagrädu Cäjapa tsapanampa frentinman pillchitsinqannöllam,* tsë chïvupa yawarnintapis pillchitsinan.

16 Tsëta rurarmi, israelïtakuna mana limpiu këkar imatapis rurayanqampita, pantayanqampita y jutsata* rurayanqampita,+ sagrädu sitiuta limpiuyätsinqa. Tsënöllam carpa* wayitapis limpiuyätsinan. Tsë carpaqa, rikënïpaq mana allikunata rurar këkäyanqan sitiuchömi këkan.

17 Carpa* wayiman qarëta rupatseq Aaron yëkunqampita yarqunqanyaqqa, manam pï nunapis carpa wayiman yëkunantsu. Tsëtaqa ruranan kikin jutsata* ruranqampita, familiankuna jutsata ruranqampita+ y israelïtakuna jutsata rurayanqampitam.+

18 Tsëpitanam Aaronqa altar kaqman yarqaramur,+ noqa Jehoväpa rikënïchö këkaq altarta limpiuyätsinan. Y pishtanqan törupa y cabrapa wakin yawarninwanmi, altarpa waqrankunata llushinan. 19 Y israelïtakuna jutsata* rurayanqampita altar limpiu quedanampaq y rikënïpaq sagrädu kanampaqmi, dëdunta yawarman tullpurkur qanchis kuti altarman pillchitsinan.*

20 Sagrädu sitiuta, carpa* wayita y altarta+ limpiuyäratsirmi,+ kawëkaq chïvuta* apamunan.+ 21 Y Aaronqa tsë kawëkaq chïvupa* peqanmanmi o umanmanmi ishkan makinta churanan,+ y israelïtakuna pantayanqanta, mana allikunata rurayanqanta y llapan jutsankunatam* willakunan. Tsënö rurarmi, israelïtakunapa llapan jutsanta tsë chïvupa jananman churaq cuenta kanqa. Tsëpitanam puntallapitana akrashqa nunata mandanan, tsë chïvuta tsunyaq sitiuman wajanampaq. 22 Tsënöpam tsë wajayanqan chïvuqa,* israelïtakunapa llapan jutsankunata*+ tsunyaq sitiuman apakunqa.+

23 Tsëpitanam Aaronqa carpa* wayiman yëkunan, y tsëchömi sagrädu sitiuman yëkunampaq vistikunqan röpata dejanan. 24 Carpa* wayipa patiunchö bañakurmi+ vistikunan.+ Tsëpita yarqaskamurmi ushakanqanyaq rupatsina qarëpaq apanqan animalta,+ y israelïtakuna apayanqan animalta pishtar rupatsinan.+ Tsënöpa pë y llapan israelïtakuna jutsankunapita* perdonashqa kayänampaq.+ 25 Tsëpitanam jutsata* rurayanqampita apayanqan animalkunapa wiranta altarchö rupatsinan.

26 Azazelpaq chïvuta* wajaq nunaqa,+ campamentuman manaraq yëkurmi, röpanta taqshanan y bañakunan.

27 Jutsankunapita* perdonashqa kayänampaq apayanqan törupa y chïvupa* qaranta, ëtsanta y panzantaqa,+ campamentupita karuchö ushakanqanyaq rupatsishqa kanampaqmi mandakunan. Peru tsë animalkunapa yawarnintaqa, sagrädu sitiumanmi Aaron apanan. 28 Campamentupita karuchö tsëkunata rupatseq nunaqa, campamentuman manaraq yëkurmi, röpanta taqshanan y bañakunan.

29 Watapa qanchis killampa chunka junaqninmi jutsata* rurayanqëkipita llakikuyänëki,* y manam qamkuna ni qamkunawan kawaq forastërukunapis trabajayänantsu.+ Kë mandakunqätaqa imëpis cumpliyänëkim. 30 Tsë junaqmi, jutsata* rurayanqëkipita apayämunqëki qarëkunata sacerdöti rupatsinqa,+ tsënöpa rikënïpaq limpiu kayänëkipaq. Tsënömi llapan jutsëkikunapita noqa Jehoväpa rikënïchö limpiu kayanki.+ 31 Tsë säbaduqa manam trabajayänëkitsu, jutsata* rurayanqëkipitam llakikuyänëki.+ Kë mandakunqätaqa imëpis cumpliyänëkim.

32 Papänimpa rantin+ mandakoq sacerdöti kanampaq+ sagrädu aceitiwan akrashqa sacerdötiqa,+ jutsata* rurayanqampita apayanqan qarëkunatam rupatsinan, y lïnupita rurashqa röpawan+ y wakin sagrädu röpakunawanmi vistikunan.+ 33 Sagrädu cuartuta,+ carpa* wayita+ y altartam+ limpiuyätsinan. Tsënöllam sacerdötikuna y llapan israelïtakuna jutsata* rurayanqampita perdonashqa kayänampaq qarëkunata rupatsinan.+ 34 Israelïtakuna jutsata* rurayanqampita perdonashqa kayänampaqmi, watachö juk kuti tsë llapanta rurayänëki.+ Kë mandakunqätaqa imëpis cumpliyänëkim”.+

Aaronqa Teyta Jehovä Moisesta mandanqannöllam llapanta rurarqan.