Zacarïas

5 Tsëpitanam volëkaq* rölluta rikarqä. 2 Tsënam pëqa, “¿imatataq rikëkanki?” nir tapumarqan.

Noqanam nirqä: “Volëkaq röllutam rikëkä, largunqa isqun metrunömi,* y anchunnam chusku metru y mediunö”.*

3 Tsëpitanam nimarqan: “Tsë röllupa juk kaq lädunchöqa llapan suwakoqkuna castïgunnaq quedayanqantam willakun,+ y juk kaq lädunchönam mana cumpliyänampaq imatapis änikoqkuna castïgunnaq quedayanqanta willakun.+ Tsëmi tsë rölluchö qellqarëkaq maldicionqa entëru patsaman chanqa. 4 ‘Tsë maldicionqa, suwakoqkunapa y mana cumpliyänampaq jutïchö änikoqkunapa wayinkunamanmi chanqa, tsëchö quedakurmi kikin wayita, qerunkunata y ruminkunatapis ushakätsinqa’ ninmi angelkunata mandaq Teyta Jehovä”.

5 Tsëpitanam noqawan parlaq angelqa witimur, “taqë yurikämoqta rikë” nimarqan.

6 Tsënam, “¿imatan tsëqa?” nir tapurqä.

Pënam, “tsë yurikämoqqa efä niyanqan tupunam”* nimarqan. Tsëpitanam, “tsënömi entëru patsachö mana allita ruraq nunakuna rikakuyan” nimarqan. 7 Tsëpitanam plömupita redondu tsapananta kichayanqanta rikarqä, y tsë rurinchömi juk warmi tëkarqan. 8 Tsënam pëqa, “tsë warmipa jutinqa Mana Alli Rurëmi” nimarqan. Tsënö nimarmi, tupunapita yarqëkämoq warmita kutirkatsir, plömupita tsapananwan alli tsaparkurqan.

9 Tsëpitanam ishkë warmikuna shamuykaqta rikarqä, tsë warmikunataqa vientum apëkämurqan, y älankunaqa cigüëñapanömi karqan. Tsë warmikunaqa, tsë tupunata altupam volar* apakuyarqan. 10 Tsënam noqawan parlaq angelta, “¿mëtataq tsë tupunataqa apëkäyan?” nir tapurqä.

11 Tsënam pëqa nimarqan: “Tsëtaqa Sinarmanmi*+ apëkäyan, tsëchömi tsë warmipa wayinta rurayanqa, tsë wayita rurar ushaskirnam pëpaq kaq sitiuman churayanqa”.