Hëchus
5 Tsë witsanmi, Ananïas jutiyoq nuna warmin Safïrawan chakrankunata rantikuyarqan. 2 Tsënö kaptimpis, pëqa wakin chaskinqan qellëtam quedatsikurqan, tsëtaqa manam pitapis willarqantsu sinöqa warminllatam. Tsëpitanam wakin qellëta apar apostolkunata entregarqan.+ 3 Peru Pëdruqa kënömi nirqan: “Ananïas, ¿imanöpatan santu espïrituta engañanëkipaq+ y chakrëkita rantikur chaskinqëki wakin qellëta pakëllapa quedatsikunëkipaq Satanas valuratsishurqunki?+ 4 Manaraq rantikuptikiqa, ¿manaku qampa karqan? Y rantikurpis, ¿manaku chaskinqëki qellëwanqa munanqëkita rurëta puëdirqëki? ¿Imanirtan tsë mana allita ruranëkipaq shonquykichö pensarqunki? Manam nunakunatatsu engañarqunki, sinöqa Teyta Diostam”. 5 Tsëta wiyëkurllam Ananïasqa patsaman ishkir wanurqan o wañurqan. Tsë pasanqanta wiyaqkunaqa alläpam mantsakäyarqan. 6 Tsënam mas jövin ollqukunaqa tëlakunawan wankurkur apar pampayarqan.
7 Tsëpita kima höratanönam warmin yëkurqan y pëqa manam musyarqantsu ima pasashqa kanqanta. 8 Tsënam Pëdruqa, “nimë, ¿tsëllachöku chakrëkikunata rantikuyarqunki?” nir tapurqan. Pënam, “awmi, tsëllachömi rantikuyarqö” nirqan. 9 Tsënam Pëdruqa nirqan: “¿Imanirtan ishkëki yachatsinakuyarqunki Teyta Jehoväpa* santu espïritunta engañëta munayänëkipaq? ¡Rikë! Qowëkita o runëkita* pampaqkunam punkuchö këkäyan y qamtawanmi këpita jipiyäshunki”. 10 Tsë höram Pëdrupa chakin kaqman ishkir wanurqan. Yëkur wanushqata tarirnam, jövinkunaqa apakur qowampa o runampa* lädunman pampayarqan. 11 Tsëmi Jerusalenchö Jesuspa qateqninkuna y tsë pasanqanta wiyaqkunaqa, alläpa mantsakäyarqan.
12 Apostolkunaqa mëtsika milagrukunata y imëka espantëpaqkunata nunakunachö rurarmi këkäyarqan,+ y pëkunaqa Salomonpa Pasadïzunchömi juntakäyaq.+ 13 Rasunmi, wakinkunaqa manam mëqampis pëkunawan juntakëta valurayarqantsu, tsënö kaptimpis llapan nunakunam pëkunapaq allita parlayaq. 14 Manam tsëllatsu, mëtsika mas ollqukuna y warmikunam Señorman creikur, Jesuspa qateqnin tikrayarqan.+ 15 Pëdru tsëpa pasaptin wäninllapis o llantunllapis pëkunaman char wakinllatapis alliyätsinampaqmi, nunakunaqa reqishqa cällikunamampis qeshyëkaqkunata apar ichikllam cämakunaman y kirmakunaman churayaq.+ 16 Tsënöllam Jerusalenpa amänun markakunapita mëtsikaq nunakunapis, qeshyëkaqkunata y mana alli espïritukuna sufritsiyanqan nunakunata aparkur ëwayaq, y llapankunatam alliyätsiyarqan.
17 Peru mas mandakoq sacerdöti y saduceukunapa sectampita pëwan këkaqkunaqa, alläpa cölerarmi pëkunapa contran sharkuyarqan. 18 Tsëmi apostolkunata prësur tsë markachö carcelatsiyarqan.+ 19 Peru Teyta Jehoväpa* angelninmi paqaspa ëwëkur carcelpa punkunkunata kicharqan,+ y llapankunata jipirmi kënö nirqan: 20 “Templuman ëwar kë vïdapaq willakuykunata nunakunata yachatsir sïguiyë”. 21 Tsëta wiyëkurnam, patsa warëlla templuman yëkur yachatsikur qallëkuyarqan.
Tsënam mas mandakoq sacerdöti y pëwan këkaqkuna chëkur, Judïukunapa Jatun Cortinchö trabajaqkunata y Israelpa tsurinkunata dirigeqkunata qayatsiyarqan. Tsëpitanam carcelchö këkaq apostolkunata puntankunaman apayämunampaq mandakuyarqan. 22 Peru soldädukuna carcelman charqa, manam pëkunata tariyarqantsu. Tsëmi kutir willakuyarqan 23 kënö nir: “Carcelqa wichqashqa y segurashqa këkashqa, y soldädukunapis punkukunachömi shëkäyashqa,* peru kicharqa manam pitapis rurichö tariyarqötsu”. 24 Templuchö soldädukunata mandaq y mandakoq sacerdötikuna tsëta wiyëkurqa, tsë imachö ushanampaq kaqta mana musyarmi, alläpa yarpachakuyarqan. 25 Peru juk nuna chëkurmi pëkunata kënö willarqan: “¡Rikäyë! Carcelatsiyanqëki nunakunaqa templuchömi nunakunata yachatsir këkäyan”. 26 Tsënam templuchö soldädukunata mandaqqa soldädunkunawan ëwëkur apostolkunata apamurqan, peru nunakuna rumiwan tsampiyänanta o saqmayänanta mantsarmi shumaqlla apayarqan.+
27 Tsënömi Judïukunapa Jatun Cortinchö trabajaqkunapa puntanman apayarqan. Tsënam mas mandakoq sacerdötiqa pëkunata parlapar 28 kënö nirqan: “Tsë nunapa jutinchö mana yachatsikuyänëkipaq cläru mandëkäyapteqmi,+ qamkunaqa entëru Jerusalenman yachatsikuyanqëkita chätsiyarqunki. Qamkunaqa imëkata rurarmi tsë nuna wanunqampita culpayoq kayänäta munayanki”.+ 29 Tsënam Pëdruwan wakin apostolkunaqa kënö contestayarqan: “Nunakunata cäsuyänäpa rantinqa, gobernaq Teyta Diostam cäsukuyänä.+ 30 Unë kastantsikkunapa Diosninmi, qeruman warkur wanutsiyanqëki Jesusta kawaritsimushqa.+ 31 Israel nunakuna arrepentikur jutsankunapita* perdonta chaskiyänampaqmi,+ Teyta Diosqa kawëman y salvacionman chätsikoq+ Pushakoq+ kanampaq derëcha lädunman pëta churashqa.+ 32 Noqakunam tsëta rikaq testïgu kayä+ y gobernaqninkunatanö cäsukoqkunata Teyta Dios entreganqan santu espïritupis testïgum”.+
33 Tsëta wiyëkurqa, alläpa cölerarmi ushakätsita munayarqan. 34 Peru Leyta yachatsikoq y nunakuna respetayanqan Gamaliel+ jutiyoq fariseum, Judïukunapa Jatun Cortinchö tëkanqampita sharkur, apostolkunata waqtaman juk rätu apayänampaq mandakurqan. 35 Tsëpitanam wakinkunata kënö nirqan: “Israelpita ollqukuna, cuidädu kayë tsë nunakunata imata rurëta munayanqëkiwan. 36 Këllaman yarpäriyë, juk tiempuchömi Teudas jutiyoq nuna alli dirigeq kanqanta nir yurimurqan, y cuatrocientusnö ollqukunam pëman qaqar yanapayarqan. Peru wanutsiyaptinqa llapan qateqninkunam wakpa këpa ëwakuyarqan y tsëllachömi llapan usharqan. 37 Tsëpitanam censu witsanchö Galilëapita Jüdas jutiyoq nuna yurimurqan, y pëta qateqkunapis mëtsikaqmi kayarqan. Peru tsë nuna wanuriptimpis, llapan qateqninkunam wakpa këpa ëwakuyarqan. 38 Tsëmi pasanqankunaman yarpëkur qamkunata niyaq* tsë nunakunawan mana mëtikuyänëkipaq, sinöqa libri dejayänëkipaq. Pensëkäyanqan o rurëkäyanqan nunakunallapita kaptinqa ushakanqam. 39 Peru Diospita kaptinqa, manam ushakätsita puëdiyankitsu,+ y capaz kikin Diospa contrampis pelyar këkäyankiman”.+ 40 Tsëmi pë ninqanta rurayarqan. Apostolkunata qayëkatsirmi maqar ushayarqan,+ y Jesuspa jutinchö manana yachatsikuyänampaq nïkurmi ëwakuyänanta dejayarqan.
41 Jesuspa jutinrëkur penqakatsishqa kayänanta Teyta Dios permitishqa kaptinmi, pëkunaqa Judïukunapa Jatun Cortinchö trabajaqkunapa puntampita kushishqa ëwakuyarqan.+ 42 Llapan junaqmi templuchö y wayin wayin, Cristu Jesuspita+ alli noticiakunata mana dejëpa yachatsikur y willakur sïguiyarqan.+