Josuë
18 Israelïtakunaqa Silö markapa duëñunnam kayarqan,+ y tsëchö juntakaskirmi,+ juntakäyänan Teyta Diospa carpa* wayinta armayarqan.+ 2 Peru Israelchö qanchis kastakunaqa, manam herenciankuna chaskishqaraqtsu kayarqan. 3 Tsënam Josuëqa pëkunata kënö nirqan: “¿Imëyaqtan shuyaräyanki unë awiluykikunapa Jehovä Diosnin entregayäshunqëki markakunachö kawakuyänëkipaq?+ 4 Cada kastapita kima nunakunata akrayämuy, markakunaman rikapakoq mandanäpaq y mäpakunata rurayämunampaq. Tsëpitanam noqaman kutiyämunan. 5 Y qanchis kastakunapaqmi llapan markakunata rakiyämunan.+ Judäpa kastanqa, sur lädumampa chaskinqan herenciachömi quedakunqa,+ y Josëpa tsurinkunapa familiankunapis, norti läduchö chaskiyanqan herenciachömi quedakuyanqa.+ 6 Y qamkuna ëwayänëkipaq kaqkunaqa, llapan markakunatam qanchisman rakiyämunëki y mäpakunatam rurayämunëki. Tsë mäpakunatam apayämunëki, y noqanam Jehovä Diosnintsikpa rikëninchö tsë markakunata sortiarirnin qamkunata rakipäyashqëki.+ 7 Peru Levïpa kastankunaqa,+ manam herenciata chaskiyanqatsu. Pëkunataqa Jehovä Diosmi akrashqa carpa* wayinchö sirwiyänampaq.+ Y Gadpa kastankunata, Rubenpa kastankunata y Manasespa pullan kastankunataqa,+ Jehoväpa sirweqnin Moisesnam Jordan mayupa* wak tsimpanchö* herenciankuna entregashqa”.
8 Mäpakunata rurayänampaq akrashqa nunakunaqa, ëwayänampaqmi alistakuyarqan. Tsënam Josuëqa pëkunata kënö mandarqan: “Markakunapa ëwarnin mäpakunata rurayämuy. Tsëpita kë Silö markaman kutiyämunki. Noqanam Jehovä Diospa rikëninchö tsë markakunata sortiarirnin rakipäyashqëki”.+ 9 Tsënam tsë nunakunaqa, llapan markakunapa ëwarnin tsë markakunata qanchisman rakiyarqan. Tsëpitanam mäpakunata rurayarqan. Y tsë llapan rurayanqantam juk libruman apuntayarqan. Tsëpitanam Josuë këkanqan Silöchö campamentuman kutiyarqan. 10 Tsënam Josuëqa, Jehovä Diospa rikëninchö israelïtakunata sorteupa herenciankuna entregarqan.+ Tsëtaqa Silö markachömi rurarqan.+
11 Sorteuchöqa Benjaminpa kastankunatam cada familiapa herenciankuna tocarqan. Y lindërunqa, Judäpa y Josëpa familiankunapa+ herencianwanmi colindaq.+ 12 Norti lädupa lindërunqa, Jordan mayupita* hasta Jericö markapa+ norti läduchö ladërayaqmi witsaq. Tsëpitanam inti o rupay jeqanan läduchö jirkakunapa witsaq, hasta Bet-Aven+ markapa tsunyaq sitiunkunayaq. 13 Tsëpitanam Luz markapa o Betel markapa+ sur läduchö ladërakunayaq ëwaq. Y Bet-Horon Bäjapa+ sur lädu jirkapam hasta Atarot-Addar+ markayaq uraq. 14 Tsëpitanam inti o rupay jeqanan lädupa ëwaq, y Bet-Horon markapa sur kaq lädu jirkapa* tumamoq. Y Judäpa kastankunata tocanqan Quiryat-Baal markachömi ushaq, tsëtaqa Quiryat-Jearim+ nirpis reqiyaqmi. Tsëmi inti o rupay jeqanan lädupa lindërun karqan.
15 Sur kaq lädupa lindërunqa, Quiryat-Jearim markapa kuchumpitam qallaq. Y inti o rupay jeqanan lädupam ëwaq hasta Neftöah+ pukyuyaq. 16 Tsëpitanam Hinon pampapa*+ lädunchö jirka kuchunyaq uraq. Hinon pampaqa Refaim+ pampa* lädunchömi* karqan. Tsëpitanam jebuseu nunakuna+ täkuyanqan* markapa* lädunchö ladërayaq o Hinon* pampayaq uraq, y En-Roguel+ pukyuyaqmi uraq. 17 Norti kaq lädupanam En-Sëmes pukyuyaq ëwaq, y Adumim+ subïdapa frentinchö Guelilot sitiuyaq pasaq. Tsëpitanam Bohan nir reqiyanqan rumiyaq+ uraq. Bohanqa+ Rubenpa tsurinmi karqan. 18 Tsëpitanam Arabäpa frentin* ladërayaq ëwaq, y Arabäyaqmi uraq. 19 Tsëpitanam Bet-Hoglä+ markapa norti lädunchö ladërayaq ëwaq y Kachi lamarpa+ norti kaq lädun kuchunchömi ushaq, Jordan mayupa* sur lädunchö. Tsëmi karqan sur kaq lädumpa lindërun. 20 Inti o rupay yarqamunan läduchö lindërunqa, Jordan mayum* karqan. Tsëmi karqan Benjaminpa kastankunapa herenciankuna y llapan lindërunkuna.
21 Benjaminpa kastankuna chaskiyanqan markakunaqa, këkunam karqan: Jericö, Bet-Hoglä, Ëmec-Queziz, 22 Bet-Arabä,+ Zemaräim, Betel,+ 23 Avim, Parä, Ofrä, 24 Kefar-Amonï, Ofnï y Guëba.+ Llapanqa döci markakunam karqan y ichik markankunapis karqanmi.
25 Gabaon,+ Ramä, Beerot, 26 Mizpë, Kefirä, Mozä, 27 Rëquem, Irpeel, Taralä, 28 Zelä,+ Hä-Ëlef, Jebusï o Jerusalen,+ Guibeä+ y Quiryat. Llapanqa catorci markakunam karqan y ichik markankunapis karqanmi.
Tsëmi Benjaminpa kastankunapa herenciankuna karqan.