Juëces

17 Efrainpa+ jirkankunachömi Miquëas kawakurqan. 2 Pëmi mamanta nirqan: “¿Mil cien yuraq pläta qellënikita suwayanqanta, y wiyëkaptï tsë suwakoqta maldicinqëkita yarpankiku? Noqam tsë qellënikita katsï. Noqam suwarqä”. Tsënö niptinmi mamäninqa, “wamräta Jehovä Dios bendicïkutsun” nirqan. 3 Tsë mil cien pläta qellëtaqa mamänintam kutitsirqan. Tsënam mamäninqa nirqan: “Jehovä Diospaqmi mana qonqëta qellënïta dispunishaq. Tsëwan ishkë santukunata+ ruratsinëkitam munä. Tsë qellëqa qampaqna katsun”.

4 Qellëta kutïkatsiptinnam mamäninqa, pläta metalwan trabajaqman doscientus pläta qellëta aparqan. Pënam ishkë santukunata rurapurqan. Tsë santukunatam Miquëaspa wayinman churayarqan. 5 Miquëaspaqa santunkunata churanan wayinmi kapurqan. Pëqa juk sagrädu mandilta*+ y mas santukunatam*+ rurarqan y juk tsurintam sacerdöti kanampaq churarqan.+ 6 Tsë witsanqa manam Israelchö gobernaq karqantsu.+ Cada ünum kikinkunapaq alli kanqanmannö imatapis rurayaq.+

7 Tsë witsankunam Judäpa kastampita,* Judächö këkaq Belen+ markachö juk jövin täkurqan.* Pëqa juk tiempullapa tsëchö täkoq levïtam+ karqan. 8 Pëqa kawakunampaq juk sitiuta ashirmi, Judächö këkaq Belen markapita ëwakurqan. Tsënö viajarninmi Efrainpa jirkankunaman charqan Miquëaspa+ wayinman. 9 Tsënam Miquëasqa, “¿mëpitataq shamuykanki?” nir tapurqan. Pënam nirqan: “Judächö këkaq Belen markapitam shamuykä, y levïtam kä. Täkunäpaq* juk sitiuta ashirmi purikä”. 10 Miquëasnam nirqan: “Consejamaqnï* y sacerdötï kanëkipaq noqawan këchö quedakuy. Cada watam chunka pläta yuraq qellëta pagashqëki, y sacerdötikuna utilizäyanqan röpatam alistamushaq y mikuytapis qarashqëkim”. Tsënö niptinmi levïtaqa wayinman yëkurqan. 11 Tsënömi levïta jövinqa Miquëaswan quedakurqan, y wamran cuentam täkurqan.* 12 Y Miquëasqa tsë jövintam sacerdötin kanampaq churarqan,+ y pëqa Miquëaspa wayinchömi täkurqan.* 13 Tsënam Miquëasqa nirqan: “Juk levïtam sacerdötï kanqa, kananqa musyämi Jehovä Dios bendicimänampaq kaqta”.