1 Samuel

13 Saulqa […]* watayoq këkarmi gobernanti tikrarqan,+ y ishkë watapam Israelchö mandakurqan. 2 Saulqa tres mil israelïtakunatam akrarqan yanapanampaq. Dos milmi Micmash sitiuchö y Betel markapa jirkankunachö Saulwan këkäyarqan, y milnam Benjaminpa Guibeä+ markanchö Jonatanwan+ këkäyarqan. Y wakinkunatanam Saul nirqan wayinkunata* kutikuyänampaq. 3 Tsëpitanam Jonatanqa Guëba+ markachö këkaq filisteu+ soldädukunata ushakätsirqan, y tsëtam wakin filisteu soldädukunaqa musyariyarqan. Tsënam Saulqa nirqan: “Llapan hebreu nunakunam këtaqa musyayänan”. Tsënö nirmi willakoqkunata entëru Israelpa mandarqan waqrapita trompëtata tocarnin+ willakuyänampaq. 4 Willakoqkunaqa llapan israelïtakunatam, “Saulmi filisteukunapa soldädunkunata ushakätsishqa, tsëmi filisteu nunakunaqa israelïtakunata alläpa chikiyan” nir willakuyarqan. Tsënö nirmi llapankunata qayatsiyarqan Guilgal+ markaman ëwar Saulta yanapayänampaq.

5 Filisteu soldädukunapis israelïtakunawan pelyayänampaqmi alistakuyarqan. Pëkunapaqa karqan treinta mil guërrapaq carrëtankuna y seis mil guërrapaq cawallunkunam. Y soldädunkunapis lamar kuchunchö arënanöran mana yupëtapis puëdipaq mëtsika kayarqan.+ Tsëpitanam, Bet-Även+ markapa lädunchö* këkaq Micmash sitiuman witsarkur campamentunkuna rurayarqan. 6 Tsëmi israelïtakunaqa chikeqninkunata rikëkur mantsakar imanö këtapis puëdiyarqantsu. Tsëmi qaqakuna waqtankunaman, machëkunaman,+ uchkukunaman, uchkuyanqan patsa rurinkunaman y tsaki pözukunaman ratakuyarqan o tsinkakuyarqan.* 7 Wakin hebreu nunakunanam Jordan mayuta* tsimpayarqan Gadman y Galaadman+ qeshpiyänampaq. Saulqa Guilgal markachömi quedakurqan, y pëwan quedaqkunaqa alläpa mantsakashqam këkäyarqan. 8 Samuel ninqannömi Saulqa qanchis junaqpa Guilgal markachö shuyararqan, peru Samuelqa manam charqantsu. Y Saulwan këkaqkunaqa ëwakurmi qallëkuyarqan. 9 Tsënam Saulqa nirqan: “Apayämuy Teyta Dioswan amïgu kanqantsikta rikätsikur rupatsinapaq animalkunata y rupatsinapaq wakin pishtashqa animalkunatapis”. Tsënö nirmi pishtashqa animalkunata Diospaq rupatsir qallëkurqan.+

10 Animalkunata rupatsir usharinqanchömi Samuelqa chärirqan. Tsënam Saulqa saludaqnin ëwarqan. 11 Y Samuelnam nirqan: “¿Imatataq rurarqunki?”. Saulnam nirqan: “Noqawan këkaqkunam ëwakur qallëkuyarqan,+ y qamqa manam ninqëki junaq chämurqëkitsu, y filisteu soldädukunaqa Micmash+ sitiuchömi juntakar qallëkuyarqan. 12 Tsënam kënö pensarqä: ‘Filisteu soldädukunaqa Guilgal markaman shamuykurchi ushakätsiyämanqa, y noqaqa manam mañakurqötsu Jehovä Diosman yanapamänampaq’. Tsëmi imanö këtapis mana puëdir pishtashqa animalkunata Diospaq rupatsir qallëkurqä”.

13 Samuelnam Saulta kënö nirqan: “¿Juiciunnaqku kanki tsëta rurëkunëkipaq? Manam Jehovä Diosnintsik+ mandashunqëkita cäsukurqunkitsu. Cäsukushqa kaptikiqa Israelchö imëyaqpis mandakunëkipaqmi Jehovä permitishunkiman karqan. 14 Kananqa, ichik tiempullanam gobernanki+ Jehovä Dios mandashunqëkita mana wiyakunqëkipita.+ Teyta Jehoväqa pë munanqanta ruraq nunatam akranqa,+ y Jehoväqa pëtam churanqa sirweqninkunata gobernanampaq”.+

15 Tsëpitanam Samuelqa Guilgal markapita yarqurir Benjaminchö këkaq Guibeä markaman witsarqan. Saulnam tsëchö këkaq ollqukunata yuparqan y seiscientusnömi kayarqan.+ 16 Saul, tsurin Jonatan y pëkunawan këkaqkunam Benjaminchö këkaq Guëba+ markachö quedakuyarqan. Y filisteu soldädukunanam Micmash+ sitiuchö campamentunkuna rurashqa kayarqan. 17 Filisteukunapa campamentunkunapitaqa, mas allin kaq soldädukunam kima grüpuman rakikëkur israelïtakunata atacayänampaq ëwar qallëkuyarqan. Juk kaq grüpum ëwarqan Ofrä nänipa, Sual sitiuman ëwaq nänipa. 18 Juk kaq grüpunam ëwarqan Bet-Horon+ markaman ëwaq nänipa, y juk kaq grüpunam tsunyaq sitiupa ëwarqan, tsëpitam Zeboim pampapis rikakoq.

19 Filisteukunaqa kënömi nishqa kayarqan: “Ama dejashuntsu ni juk espädallatapis ni juk lanzallatapis hebreu nunakuna rurayänanta”. Tsëmi Israelchöqa ni jukllëllapis herrëru karqantsu. 20 Israelïtakunaqa hächakunata y ösikunata afilatsiyänampaq, pïcukunata y takllaman churana puntakunata* templatsiyänampaq o aguzatsiyänampaqqa filisteukunamanmi ëwayaq. 21 Pïcukunata, takllaman churana puntakunata, kima puntayoq herramientakunata y yapyarnin* töruta qatiyänan garrutipa* puntanchö këkaq fiërruta templatsir y hächakunata afilatsirqa, cada ünupitam öchu grämu* pläta qellëta pagayaq. 22 Pelyayänan junaqqa, Saulwan y Jonatanwan këkaq nunakunapaqa manam espädankuna ni lanzankuna+ karqantsu. Saulpawan Jonatanllapam espädankuna y lanzankuna karqan.

23 Juk grüpu filisteu soldädukunaqa Micmash+ sitiuchö crücimanmi churanakuyarqan.