Efesius
6 Wamrakuna, papänikikunata cäsukuyë,+ tsëqa allita rurëmi y Teyta Diospa rikënimpaqpis allim. 2 “Papänikikunata y mamänikikunatam kuyar respetayänëki”.+ Këmi bendicionta apamoq punta mandamientu: 3 “Tsënöpa imata ruranqëkipis alli yarqunampaq, y patsachö mëtsika watapa kawakunëkipaq”. 4 Papäkuna,* ama wamrëkikunata cöleratsiyëtsu,+ sinöqa Teyta Jehovä* munanqannö+ shumaq corregiyë y consejayë.*+
5 Sirwipakoqkuna, Cristuta cäsukuyanqëkinölla, patronnikikunatapis respetar y mantsakur llapan shonquykikunawan cäsukuyë.+ 6 Ama rikëkäyäshuptikillaqa nunakunata kushitsiyänëkipaq rurayëtsu,+ sinöqa Teyta Dios munanqanta llapan shonqunkunawan y kallpankunawan ruraq Cristupa sirweqninkunanö rurayë.+ 7 Teyta Jehoväta* sirwikaqnö, sirwipakoq kayanqëkichö alli cumpliyë,+ ama nunakunata sirwikaqnöqa. 8 Qamkunaqa musyayankim pï nunapis alli kaqta ruraptinqa, Teyta Jehoväpis*+ tsënölla kutitsinampaq kaqta, sirwipakoq kaptin o libri nuna kaptimpis. 9 Qamkunapis patronkuna, tsëman yarpar mana mantsakätsishpa pëkunata imëpis shumaq tratayë. Qamkunaqa musyayankim qamkunapa y pëkunapa ciëluchö këkaq Patronnikikunaqa jukllëlla kanqanta,+ y pëqa llapantapis igualpam rikan.
10 Usharinapaqqa, alläpa puëdeq kallpanwan Señornintsik puëdeq kayänëkipaq yanapëkuyäshuy.+ 11 Pelyayänëkipaq Teyta Dios llapan dispunimunqanta churakuyë,+ tsënöpa Diablu churanqan trampakunapita* alli cuidakuyänëkipaq. 12 Manam nuna mayintsikwantsu pelyar* këkantsik,+ sinöqa gobiernukunawan, autoridäkunawan, ampichö o tsakëchö* këkaq munduta gobernaqkunawan y ciëlukunachö mana alli espïritukunawanmi.+ 13 Tsëmi alläpa mana alli junaq chämuptin aguantëta puëdiyänëkipaq y llapan puëdiyanqëkita rurar alli aguantayänëkipaq, pelyayänëkipaq Teyta Dios llapan dispunimunqanta katsiyë.+
14 Tsëmi alli tsarakur sïguiyë rasumpa kaqta tseqllëkikunachö wachakatanö watashqa,+ alli rurëkunata fiërrupita chalëcutanö vistikushqa,+ 15 y yamë kawakuypita alli noticiakunata willakuyänëkipaq llanqikikunata llanqikushqa.+ 16 Tsëpitapis masqa, markäkoq o yärakoq kayanqëkita rikätsikoq jatun escüduta tsaräyë,+ tsëwanmi Diablupa* rawrëkaq o lunyëkaq flëchankunata upitsita puëdiyanki.+ 17 Tsënölla salvacion cascutapis churakuyë,+ y santu espïritupita chaskiyanqëki espädata,* awmi, Diospa palabranta tsaräyë.+ 18 Tsëyaqqa, santu espïritu yanapayäshuptiki+ imë hörapis imëkanöpa mañakur y rogakur kayë.+ Y alkäbu alkäbu y limpiu nunakunapaq imëpis rogakur këkäyë. 19 Noqapaqpis mañakuyë, tsënöpa parlanqä höra, parlanäpaq kaqkuna shimïman chämuptin, alli noticiakunapa pakarëkaq sagrädu noticiampita mana mantsakushpa willakunäpaq,+ 20 y ruranäpaq kaqnölla tsëkunapita mana mantsakushpa parlanäpaq. Tsë alli noticiakunata Teyta Diospa jutinchö willakoq karmi prësu këkä.+
21 Qamkunapis noqapita y imanö këkanqäta musyayänëkipaqmi, kuyë wawqintsik y Señorpa confiakuypaq sirweqnin Tïquicu+ llapanta willayäshunki.+ 22 Kërëkurmi pëta qamkunaman mandëkämü: imanö këkäyanqäta musyayänëkipaq, y shonquykikunata shoqanampaq.
23 Teyta Dios y Señor Jesucristu permitïkuyätsun wawqintsikkuna y panintsikkuna yamë kayänampaq, jukkunata kuyayänampaq y markäkoq o yärakoq kayänampaq. 24 Señornintsik Jesucristuta rasumpa kuyaqkunawan Teyta Diosnintsik imëpis alläpa alli këkutsun.