Hebrëus

13 Familiachönö llapan shonquykikunawan kuyanakur sïguiyë.+ 2 Ama qonqayëtsu imëpis alli nuna këta,*+ tsënö karmi wakinkunaqa mana musyëkarpis angelkunata shumaq chaskiyarqan.+ 3 Pëkunawan carcelashqa këkaqnö*+ carcelchö këkaqkunata yarpäyë.+ Tsënölla qamkunapis sufrikaqnö mana alli tratashqakunata yarpäyë. 4 Llapantsikmi casädu vïdata respetanantsik, y casädukunaqa manam traicionanakuyänantsu.*+ Oqllanakur melanëpaqkunata ruraqkunata,* y mana majanwan oqllanakoqkunataqa, Teyta Diosmi juzganqa.+ 5 Ama vïdëkikunachö qellëta ashirlla kakuyëtsu,*+ sinöqa kapuyäshunqëkillawan kushishqa kayë.+ Teyta Diosqa kënömi nin: “Manam imëpis dejashqëkitsu ni qonqashqëkitsu”.+ 6 Tsëmi confiakur kënö nita puëdintsik: “Teyta Jehovämi* yanapamaqnï. Manam imatapis mantsashaqtsu. Nunaqa manam imanamanqatsu”.+

7 Dirigiyäshoqnikikunata yarpäyë,+ pëkunaqa Teyta Diospa palabrampitam parlapäyäshurqunki, y imanö portakuyanqan allipaq kanqanta rikëkur, pëkunanö markäkoq o yärakoq kayë.+

8 Jesucristuqa manam qanyan, kanan y imëpis cambiantsu.

9 Ama dejayëtsu mana rasumpa kaq imëka yachatsikuykunawan mana alliman chätsiyäshunëkita. Ima mikuyta* mikur kushishqa kanqantsikpitapis, Teyta Dios alläpa alli kanqanwan shonquntsik fuertiyätsishqa kanqanmi mas alliqa. Mikuyllaman yarpachakoqkunaqa manam tsëta provechayantsu.+

10 Juk altarmi kapamantsik, y carpa* wayichö sirweqkunapaqa manam derëchunkuna kantsu tsë altarpita mikuyänampaq.+ 11 Mandakoq sacerdötiqa jutsapita* qarëpaqmi pishtashqa animalkunapa yawarninta sagrädu sitiuman apan, peru tsë animalkunapa ayantaqa carpa* wayipita karuman apëkurmi ninawan ushakätsiyan.+ 12 Tsëmi Jesuspis kikimpa yawarninwan nunakunata limpiuyätsinampaq,+ markapa punkun lädunchö sufrirqan.+ 13 Tsëqa noqantsikpis pë këkanqanman carpa* wayipa lädunman ëwar, pënö insultashqa këta aguantashun.+ 14 Këchöqa manam imëpis mana ushakaq marka kapamantsiktsu, sinöqa shamoqpaq kaqtam llapan shonquntsikwan ashintsik.+ 15 Jesusrëkurmi Teyta Diosta imëpis alabantsik,+ tsëmi pëpaq qarënintsik. Tsëqa shimintsikwan+ jutimpita musyatsikushun.+ 16 Manam tsëllatsu, ama qonqayëtsu alli kaqta rurëta y kapuyäshunqëkita wakinkunata rakipëta.+ Tsënö rurayanqëki qarëkunawanqa Teyta Dios alläpam kushikun.+

17 Dirigiyäshoqnikikunata wiyakuyë+ y respetar cäsukuyë.+ Pëkunaqa qamkunatam imëpis cuidëkäyäshunki, y tsëta imanö cumpliyanqampitam Teyta Dios cuentata mañanqa.+ Tsëmi pëkunaqa llakikurtsu, sinöqa kushishqa yanapayäshunki, mana tsënö kaptinqa, qamkunapaqmi mana alli kanman.

18 Alli concienciayoq kayanqätam següru këkäyä, y llapanchöpis alli portakuytam munayä. Tsëmi noqakunapaq Teyta Diosman mañakur sïguiyë.+ 19 Peru masqa rogayaq,* wallka tiempullachö kutimunäpaq Teyta Diosman mañakuyänëkitam.

20 Kananqa, üshakunapa alli mitseqnin+ y imëyaqpis acuerdu yawarta katseq Señornintsik Jesusta wanushqampita kawaritsimoq, yamë këta katseq Teyta Dios, 21 munanqanta rurayänëkipaq llapan wanayanqëkiwan* yanapëkuyäshuy, y Jesucristurëkur rikënimpaq alli kaqta noqantsikwan ruratsun. Teyta Dios imëyaqpis alabashqa katsun. Tsënö kallätsun.*

22 Kananqa wawqikuna y panikuna, kë cartachö wallkallata qamkunapaq qellqamunqä animakoq palabrakunata, pacienciawan wiyayänëkipaqmi rogayaq. 23 Wawqintsik Timoteu librina kanqantam musyayänëkita munä. Ichikllachöna pë shamuptinqa, pëwan juntum qamkunaman shamushaq.

24 Llapan dirigiyäshoqnikikunata y llapan creikoq mayintsikkunata saludëkuyë. Italiachö wawqikuna y panikunam salüdunkunata apatsikayämun.+

25 Teyta Dios llapëkiwan alläpa alli këkutsun.