Hëchus
6 Mas nunakuna Jesuspa qateqnin tikrëkäyanqan junaqkunanam, griëgu idiömata parlaq viudakunata cada junaq qarakuyanqan mikuyta mana rakipäyaptin, griëgu idiömata parlaq judïukuna, hebreu idiömata parlaq judïukunapita quejakur qallëkuyarqan.+ 2 Tsëmi döci apostolkunaqa, Jesuspa llapan qateqninkunata qayëkatsir kënö niyarqan: “Manam allitsu kanqa Diospa palabrampita yachatsikuyta dejëkur mësakunaman mikuyta rakikur kayänä.+ 3 Tsëmi wawqikuna, kë asuntuta rikaq churayänäpaq,+ santu espïrituta katseq y alli yachaq+ qanchis respetashqa ollqukunata qamkunapita akrayämuy.+ 4 Noqakunaqa Teyta Diosman mañakur y Diospa palabrampita yachatsikurmi ocupädu kayäshaq”. 5 Pëkuna niyanqanqa Jesuspa llapan qateqninkunapaqmi allinö karqan, tsëmi alli markäkoq o yärakoq y santu espïrituwan junta këkaq Estëbanta akrayarqan, tsënöllam Felïpita,+ Pröcoruta, Nicanorta, Timonta, Parmenasta y judaismu religionman yëkoq Antioquïapita Nicolastapis akrayarqan. 6 Tsëpitanam apostolkunaman apayarqan y apostolkunanam Teyta Diosman mañakurir pëkunaman makinkunata churar carguman churayarqan.+
7 Tsënöpam Teyta Diospa palabranqa mas nunakunaman charqan,+ y Jerusalenchöqa masmi Jesuspa qateqnin tikrayarqan+ y mëtsika sacerdötikunapis creikurmi qallëkuyarqan.+
8 Tsë witsanmi Teyta Diospa rikëninchö alli këkaq Estëban Teyta Diospa podernin yanapaptin, nunakunapa rikëninchö alläpa espantëpaqkunata y milagrukunata ruraq. 9 Peru Libri Tikrashqa niyanqan grüpupita nunakuna, Cirënipita y Alejandrïapita wakin nunakuna, y Ciliciapita y Asiapita wakin nunakunam, Estëbanta discutipaq ëwayarqan. 10 Peru alli yachëwan y parlanqanchö santu espïritu yanapaptinmi, ima nitapis puëdiyarqantsu.+ 11 Tsëmi nunakunawan pakëllapa parlayarqan, “Moisespa y Diospa contran parlëkaqtam wiyayarqö” nir acusayänampaq. 12 Tsënömi llapan nunakunata, markachö dirigeqkunata y Ley qellqaqkunata pëpa contran sharkatsiyarqan. Tsënam pëkunaqa pë këkanqanman illaqpita yurir, amälas prësur Judïukunapa Jatun Cortinman apayarqan. 13 Mana rasumpa kaqta parlaq testïgukunatam, kënö niyänampaq apayarqan: “Kë nunaqa, kë sagrädu sitiupaq y Leypa contranmi imëkata parlan. 14 Musyariyänëkipaq, Nazaretpita Jesus kë sitiuta ushakätsinampaq kaqta y Moises yachatsimanqantsik costumbrikunata cambianampaq kaqtam parlar purikan”.
15 Judïukunapa Jatun Cortinchö këkaqkuna Estëbanta rikarqa, cäran angelpa cärannö kanqantam rikäyarqan.