Juan
18 Mañakur usharirmi Jesusqa Cedron+ Urampa wak tsimpanman qateqninkunawan ëwarqan, y qateqninkunawanmi tsëchö huertaman yëkurqan.+ 2 Jesuswan qateqninkuna atska kuti tsëchö juntakashqa kayaptinmi, traicionaqnin Jüdaspis tsë sitiutaqa reqirqan. 3 Tsëmi Jüdasqa atska soldädukunata y mandakoq sacerdötikunapa y fariseukunapa guardiankunata tsëman pusharqan. Aktsinkunawan, chiwchinkunawan y armankunawanmi chäyarqan.+ 4 Tsënam Jesusqa ima pasanampaq kaqta musyar, mas puntaman witïkur pëkunata, “¿pitataq ashiyanki?” nir tapurqan. 5 Tsënam pëkunaqa, “Nazaretpita Jesustam”+ niyarqan. Pënam, “noqam kä” nirqan. Traicionaqnin Jüdaspis pëkunawanmi këkarqan.+
6 Tsënö kaptimpis, Jesus “noqam kä” niptinqa, qepapa kutirmi patsaman ishkiriyarqan.+ 7 Tsënam pëkunata yapë, “¿pitataq ashiyanki?” nir tapurqan. Pëkunanam, “Nazaretpita Jesustam” niyarqan. 8 Tsënam Jesusqa nirqan: “Nirqönam noqa kanqäta. Noqata ashimarqa kë nunakuna ëwakuyänanta dejëkuyë”. 9 Tsënöqa pasarqan kikin Jesus kënö ninqan cumplikänampaqmi: “Entregamanqëki kaqkunataqa, manam jukllëllatapis oqrarqötsu”.+
10 Tsënam Simon Pëdruqa espädanta sutaramur, mas mandakoq sacerdötipa sirweqnimpa derëcha kaq rinrinta walluskapurqan.+ Tsë sirwipakoqpa jutinqa Malcum karqan. 11 Jesusqa Pëdrutam kënö nirqan: “Tsë espädata churananman kutitsi.+ ¿Manaku Teyta entregamanqan cöpapita upüman?”.+
12 Tsënam soldädukuna, soldädukunapa comandantin y judïukunapa guardiankunaqa, Jesusta prësur makinta watayarqan. 13 Caifaspa+ suegrun kaptinmi puntataqa Anas jutiyoq nunaman apayarqan. Pëmi tsë wataqa mas mandakoq sacerdöti karqan.+ 14 Tsë Caifasmi judïukunata nishqa karqan, llapan nunakunarëkur juk nunalla wanunan o wañunan mas alli kanqanta.+
15 Simon Pëdruwan juk mas qateqninqa Jesuspa qepantam ëwayarqan.+ Tsë qateqninqa mas mandakoq sacerdötiwan reqinakurmi, mas mandakoq sacerdötipa patiunyaq Jesuswan ëwarqan, 16 peru Pëdruqa punku lädunchömi waqtachö quedakurqan. Tsëmi mas mandakoq sacerdötiwan reqinakoq Jesuspa qateqninqa, punkuta täpaq warmiwan parlaq yarqamur Pëdruta yëkatsirqan. 17 Tsënam punkuta täpaq sirwipakoq warmiqa, “¿manaku qampis tsë nunapa qateqnin kanki?” nir Pëdruta tapurqan. Tsënam pëqa, “manam qateqnintsu kä”+ nir contestarqan. 18 Alläpa alalaptinmi sirwipakoqkuna y guardiakunaqa, ninata tsarirkatsir entëru lädunchö qoñükur këkäyarqan. Pëdrupis pëkunawanmi qoñükur këkarqan.
19 Mandakoq sacerdötiqa,* qateqninkunapaq y imata yachatsikunqampaqmi Jesusta tapurqan. 20 Tsënam Jesusqa nirqan: “Noqaqa nunakuna wiyëkäyaptinmi parlarqö. Judïukuna juntakäyänan Diosta adorayänan wayikunachö y templuchömi+ imëpis yachatsikurqö, y manam imatapis pakëllapaqa parlarqötsu. 21 ¿Imanirtan noqata tapupämanki? Parlanqäkunata wiyashqa kaqkunata tapupë. Pëkunam imata parlanqätaqa musyayan”. 22 Tsënö niptinnam, tsëchö këkaq juk guardiaqa Jesusta laqyëkur,+ “¿tsënöku mandakoq sacerdötita contestanki?” nirqan. 23 Tsënam Jesusqa nirqan: “Ima mana allitapis nishqa kaptïqa, imanir mana alli kanqanta nimë, peru rasun kaqta nishqa kaptïqa, ¿imanirtan maqamanki?”. 24 Tsëpitanam Anas jutiyoq nunaqa, makin watashqata mas mandakoq sacerdöti Caifasman mandarqan.+
25 Tsëyaqmi Simon Pëdruqa tsëchö qoñükur këkarqan. Tsënam, “¿manaku qampis pëpa qateqnin kanki?” nir tapuyarqan. Pënam negakur, “manam qateqnintsu kä”+ nirqan. 26 Tsënam rinrinta Pëdru wallunqan sirwipakoqpa kastan,+ mas mandakoq sacerdötipa juk sirweqninna, “noqaqa huertachö pëwan këkaqtam qamta rikarqoq” nirqan. 27 Peru Pëdruqa yapëmi negarqan, y tsë höram juk gällu cantarirqan.+
28 Tsëpitanam, Caifaspa wayimpita gobernadorpa wayinman+ Jesusta apayarqan, tsë hörapaqqa tempränuran karqan. Peru Pascua Fiesta mikuyta mikuyänampaq limpiu këta munarmi, kikinkunaqa gobernadorpa wayinman yëkuyarqantsu.+ 29 Tsënam Pilätuqa pëkuna këkäyanqanman yarqur, “¿imapitataq kë nunata acusayanki?” nir tapurqan. 30 Tsënam pëkunaqa, “mana allita mana rurashqa kaptinqa, manachi qamman apayämümantsu karqan” nir contestayarqan. 31 Tsënö niyaptinnam Pilätuqa, “tsë nunata apakur leynikikuna ninqanmannö kikikikuna juzgayë”+ nirqan. Tsënam judïukunaqa, “noqakunaqa manam pitapis wanutsita puëdiyätsu”+ niyarqan. 32 Tsëqa pasarqan imanö wanunampaq o wañunampaq kaqta kikin Jesus ninqannölla cumplikänampaqmi.+
33 Tsënam Pilätuqa gobernadorpa wayinman yapë yëkurir Jesusta qayëkur, “¿qamku judïukunapa gobernaqnin kanki?”+ nir tapurqan. 34 Jesusnam, “¿kikikillapitaku tsënö tapumanki, o jukkunaku noqapita parlapäyäshurqunki?” nir contestarqan. 35 Tsënam Pilätuqa nirqan: “Noqaqa manam judïu nunatsu kä. Nacionnikipita nunakuna y mandakoq sacerdötikunam noqaman entregayäshurqunki. ¿Imatataq rurarqunki?”. 36 Jesusnam nirqan:+ “Gobiernüqa manam kë mundupitatsu.+ Gobiernü kë mundupita kaptinqa, yanapamaqnïkunam judïukunaman mana entregashqa kanäpaq pelyayanman karqan.+ Peru qamta ninqaqnöpis, Gobiernüqa manam kë mundupitatsu”. 37 Tsënam Pilätuqa, “tsëqa, ¿gobernaqku kanki?” nir tapurqan. Jesusnam kënö contestarqan: “Awmi, kikikim gobernaq kanqäta nikanki.+ Noqaqa tsëpaqmi yurikurqö y tsëpaqmi nunakunaman shamurqö: rasumpa kaqta musyatsikunäpaq.+ Rasumpa kaqta cäsukoqkunaqa, ninqäkunatam wiyakuyan”. 38 Tsënam Pilätuqa, “¿imatan rasumpa kaqqa?” nirqan.
Tsënö nirirmi judïukuna këkäyanqanman yapë yarqur kënö nirqan: “Manam pëchöqa ima mana allitapis tarïtsu.+ 39 Y qamkunaqa costumbrikikunamannömi cada Pascua Fiestachö juk nunata libri dejanäpaq mañayämanki.+ Tsëqa, ¿judïukunapa gobernaqninta libri dejanätaku munayanki?”. 40 Tsënam pëkunaqa fuertipa, “¡ama kë nunataqa, mejorqa Barrabasta!” niyarqan. Barrabasqa suwakoq nunam karqan.+