Juan
8 12 Tsënam Jesusqa pëkunata yapë kënö parlaparqan: “Noqaqa rikäyänampaq nunakunata yanapaq aktsinömi kä.+ Qatimaqnï kaqqa, manam imëpis ampichö o tsakëchö* purinqatsu, sinöqa kawatsikoq aktsiyoqmi kanqa”.+ 13 Tsënam fariseukunaqa, “kikikilla favorniki parlaptikim, ninqëkiqa rasumpa kaqtsu”* niyarqan. 14 Tsënam Jesusqa nirqan: “Kikïlla favornï parlaptïpis, mëpita shamunqäta y mëta ëwanqäta musyaptïmi,+ ninqäqa rasumpa kaqlla. Peru qamkunaqa, manam mëpita shamunqäta ni mëta ëwanqätapis musyayankitsu. 15 Qamkunaqa nunakuna pensayanqannömi juzgayanki;+ noqaqa manam pitapis juzgätsu. 16 Tsënö kaptimpis, noqaqa manam japallätsu këkä. Mandamaqnï Teytam noqawan këkan,+ tsëmi juzganä kaptimpis juzganqäqa rasumpa kaqlla kanman. 17 Qamkuna katsiyanqëki Leychöpis, ‘ishkaq niyanqanqa rasumpa kaqmi’*+ nirmi qellqarëkan. 18 Noqam kikïpa favornï parlä, y mandamaqnï Teytapis favornïmi parlan”.+ 19 Tsënö niptinnam pëkunaqa, “¿mëchötaq Teytëki këkan?” nir tapuyarqan. Tsënam Jesusqa nirqan: “Qamkunaqa manam reqiyämankitsu ni Teytäta reqiyankitsu.+ Noqata reqimarqa, Teytätapis reqiyankimanmi”.+ 20 Templuchö qellë churayänan sitiuchö yachatsikuykarmi tsëkunataqa parlarqan.+ Peru manaraq wanutsiyänan höra kaptinmi, ni pï prësuyta puëdirqantsu.+
21 Tsëmi yapë pëkunata kënö nirqan: “Noqaqa ëwakümi, y qamkunaqa ashiyämankim, tsënö kaptimpis, jutsata* rurëkarmi wanuyanki y wañuyanki.+ Noqa ëwanqämanqa, manam ëwëta puëdiyankitsu”.+ 22 Tsënö niptinnam judïukunaqa niyarqan: “Pëqa, ‘noqa ëwanqämanqa, manam ëwëta puëdiyankitsu’ nirmi këkan, manachi wanutsikuytatsu pensëkan ¿aw?”. 23 Tsënam pëqa nirqan: “Qamkunaqa kë patsapitam kayanki; noqaqa ciëlupitam kä.+ Qamkunaqa kë mundupitam kayanki; noqaqa manam kë mundupitatsu kä. 24 Tsëmi qamkunata kënö nirqö: jutsata* rurëkarmi wanuyanki o wañuyanki. Awmi, shamunampaq kaq kanqäta mana creirqa, jutsata rurëkarmi wanuyanki”. 25 Tsënö niptinnam pëkunaqa, “¿pitan qamqa kanki?” nir tapuyarqan. Tsënam Jesusqa nirqan: “¿Imapaqnatan qamkunataqa parlapäyashqëkipis? 26 Qamkunapita parlanäpaqqa mëtsikaran kan, y imëkakunatam juzganä. Rasumpa kaqchöqa, mandamaqnïqa rasumpa kaqllatam parlan, y pëta parlaqta wiyanqällatam nunakunata parlapä”.+ 27 Pëkunaqa manam Teytapaq parlëkanqanta cuentata qokuyarqantsu. 28 Tsënam Jesusqa nirqan: “Nunapa Tsurinta+ qeruman warkurir-ran qamkunaqa musyayanki pï kanqäta,+ y kikïllapitaqa imatapis mana ruranqäta,+ sinöqa Teyta yachatsimanqanllata parlanqäta. 29 Mandamaqnïqa noqawanmi këkan; rikënimpaq alli kaqta imëpis ruraptïmi japallätatsu dejaramashqa”.+ 30 Tsëkunata nikaptinmi, mëtsikaq nunakuna pëman markäkur o yärakur qallëkuyarqan.
31 Tsënam Jesusqa pëman creikoq judïukunata kënö nirqan: “Ninqäkunata imëpis cäsukurqa, rasumpa qatimaqnïkunam kayanki. 32 Rasumpa kaqtam yachakuyanki,+ y tsë yachakuyanqëkim esclävunö kayanqëkipita libri kayänëkipaq yanapayäshunki”.+ 33 Tsënö niptinnam pëkunaqa kënö niyarqan: “Noqakunaqa Abrahanpa kastankunam kayä, y manam imëpis esclävutsu kayarqö. ¿Imanirtan ‘librim kayanki’ niyämanki?”. 34 Tsënam Jesusqa nirqan: “Rasunllatam qamkunata nï,* llapan jutsa ruraqkunam, jutsapa esclävun kayan.+ 35 Esclävuqa manam imëyaqpis patronnimpa wayinchötsu quedakun; tsuri kaqmi sïqa imëyaqpis quedakun. 36 Tsëmi libri kayänëkipaq Tsuri yanapayäshuptikiqa, rasumpa libri kayanki. 37 Noqaqa musyämi Abrahanpa kastankuna kayanqëkita. Peru yachatsikunqäta mana chaskikurmi, wanutsimëta munayanki. 38 Noqaqa Teytäwan këkar rikanqäpitam parlä,+ peru qamkunaqa teytëkikuna parlanqantam rurayanki”. 39 Tsënö niptinnam pëkunaqa, “Teytäkunaqa Abrahanmi” niyarqan. Tsënam Jesusqa kënö nirqan: “Abrahanpa tsurinkuna karqa,+ Abrahan ruranqantam rurayankiman. 40 Peru qamkunaqa, Teyta Diospita wiyashqa karnin rasumpa kaqta willëkaptïmi*+ wanutsimëta munayanki. Abrahanqa manam tsëta rurarqantsu. 41 Qamkunaqa teytëkikuna ruranqantam rurayanki”. Tsënö niptinnam pëkunaqa, “noqakunaqa manam wachapakuytsu kayä,* noqakunapaqa jukllëllam Teytäkuna, Dioslla” niyarqan.
42 Tsënam Jesusqa kënö nirqan: “Dios Teytëkikuna kaptinqa, kuyayämankimanmi.+ Noqaqa Teyta Dios mandamashqa kaptinmi këchö këkä. Manam kikï munartsu shamurqö, sinöqa pëmi mandamashqa.+ 43 ¿Imanirmi qamkunaqa ninqäta entiendiyankitsu? Ninqäkunata wiyëta mana munarmi. 44 Qamkunaqa teytëkikuna Diablupa tsurinkuna karmi, teytëkikuna munanqanta rurëta munayanki.+ Pëqa qallanampitam asesïnu karqan.+ Rasumpa kaq pëchö mana kaptinmi, rasumpa kaqchö tsarakurqantsu. Pëqa ulim o llullam, y ulikoqkunapa o llullakoqkunapa teytanmi, tsëmi mana rasumpa kaqta parlarqa, kikin imanöpis kanqanmannö parlan.+ 45 Peru noqa rasumpa kaqta niptïmi, qamkunaqa creiyämankitsu. 46 ¿Mëqëkitan ima jutsatapis ruranqäta niyankiman? Rasumpa kaqta parlëkaptïqa, ¿imanirtan creiyämankitsu? 47 Teyta Diospita kaqqa, Dios ninqankunatam wiyakun.+ Tsëmi qamkunaqa Diospita mana karnin wiyakuyankitsu”.+
48 Tsëta wiyëkurnam judïukunaqa kënö niyarqan: “¿Manaku, ‘qamqa Samariapitam kanki+ y demoniuyoqmi kanki’ nirqa, rasumpa kaqllata nikäyä?”.+ 49 Tsënam Jesusqa kënö contestarqan: “Noqaqa manam demoniuyoqtsu kä, sinöqa Teytätam alabä, peru qamkunaqa llutam tratayämanki. 50 Noqaqa manam kikï alabashqa këtatsu ashï;+ jukmi noqapaq tsëta ashin, y pëmi juzgaqqa. 51 Rasunllatam qamkunata nï,* pï nunapis ninqäkunata cäsukurqa, manam imëpis wanunqatsu”.+ 52 Tsënö niptinnam judïukunaqa kënö niyarqan: “Kananmi sïqa cläru musyayä demoniuyoq kanqëkita. Abrahanpis y Diospa willakoqninkunapis wanuyarqanmi, peru qamqa, ‘pï nunapis ninqäkunata cäsukurqa, manam imëpis wanunqatsu’ ninkim. 53 ¿Wanukushqa teytäkuna Abrahanpita mas alli kanqëkitaku pensanki? Diospa willakoqninkunapis wanuyarqanmi o wañuyarqanmi. ¿Pï kanqëkitataq creinki?”. 54 Tsënam Jesusqa nirqan: “Kikïlla alabakuptïqa, manam alabakunqä imapaqpis välinmantsu. Diosnikikuna kanqanta niyanqëki Teytämi, noqataqa alabaman.+ 55 Qamkunaqa manam pëta reqiyankitsu,+ peru noqaqa reqïmi.+ “Manam reqïtsu” nirqa, qamkunanö ulim o llullam käman. Peru noqaqa reqïmi, y ninqankunatam cäsukü. 56 Qamkunapa teytëkikuna Abrahanqa, shamunäpaq kaq junaqtam alläpa kushishqa shuyararqan, y tsë junaqman pensarmi* alläpa kushikurqan”.+ 57 Tsënö niptinnam judïukunaqa kënö niyarqan: “Qamqa manaran cincuenta watayoqtsu kanki, ¿tsënö këkarku Abrahanta rikarqunki?”. 58 Tsënam Jesusqa nirqan: “Rasunllatam qamkunata nï,* Abrahan manaraqpis yuriptinmi noqaqa karqäna”.+ 59 Tsënö niptinnam pëkunaqa rumikunata aptarkur Jesusta tsampita o saqmëta munayarqan, peru pëqa ratakurirmi o tsinkaskirmi* templupita ëwakurqan.