2 Timoteu
1 Teyta Dios munaptin y Cristu Jesuswan juknölla këkaqkuna chaskiyanqan kawëpita willakunäpaq Cristu Jesuspa apostolnin noqa Pablupita,+ 2 kuyë tsurï Timoteupaq:+
Teyta Dios y Señornintsik Cristu Jesus qamwan alläpa alli këkuyätsun, llakipëkuyäshuy* y yamë kanëkipaq yanapëkuyäshuy.
3 Limpiu concienciawan y unë kastäkuna rurayanqannölla sirwinqä Teyta Diostam agradecikü, y paqasta junaqta rogakunqächömi qamta imëpis yarpaq. 4 Waqanqëkita yarparmi, kushishqa kanäpaq rikënikita munä. 5 Yarpämi janan shonqulla mana markäkunqëkita o yärakunqëkita.+ Awilëki Loida y mamëki Eunïcim tsënöqa puntata markäkuyarqan, y segürum këkä qampis tsënö yärakunqëkita.
6 Tsëmi yarpätseq qamman makïta churamuptï Diospita chaskinqëkita, ninatanö rawrëkaqta o lunyëkaqta katsinëkipaq.+ 7 Teyta Diospita chaskinqantsik santu espïrituqa manam mantsakoqtatsu tikratsimantsik,+ sinöqa poderyoq,+ kuyakoq y alli juiciuyoq kanapaqmi yanapamantsik. 8 Tsëmi ama Señornintsikpita+ willakuyta ni noqa përëkur prësurëkaqpita penqakuytsu. Tsëpa rantinqa, Teyta Dios poderninwan yanapashunëkipaq kaqman confiakur, alli noticiakunarëkur+ sufrinëkipaq kaqta sufri.+ 9 Pëmi salvamarquntsik y limpiu nuna kanapaq qayamarquntsik,+ peru manam imatapis ruranqantsikpitatsu, sinöqa kikin munar y alläpa alli karninmi.+ Tsëtaqa Cristu Jesusrëkurmi alläpa unëna rikätsimarquntsik, 10 peru kananqa Salvamaqnintsik Cristu Jesus yurimunqanchömi mas cläruraq rikakushqa.+ Pëmi wanuyta ushakätsishqa,+ y alli noticiakunawanmi kawëta+ y mana ushakaq cuerpuyoq këta+ imanö tarinapaq kaqta cläru willamarquntsik,+ 11 tsë alli noticiakunata willakunäpaqmi, willakoq, apostol y yachatsikoq kanäpaq carguta chaskirqö.+
12 Tsëmi kë llapantapis sufrikä,+ peru manam penqakütsu.+ Noqaqa reqïmi creikunqä Teyta Diosta, y confiakümi makinman churanqäta tsë junaqyaq cuidanampaq kaqta.+ 13 Jesuswan juknölla kar markäkoq o yärakoq kanqëkita y kuyakoq kanqëkita rikätsikur, noqapita wiyanqëki alli* yachatsikuykuna ninqannölla imëpis rurë.+ 14 Noqantsikchö këkaq santu espïrituwan, carguykichö këkaq alläpa väleqta cuidë.+
15 Qamqa musyankinam Asia provinciapita nunakuna,+ y Figëluwan Hermögenispis noqapita rakikäkuriyanqanta. 16 Onesïforupa wayinchö kaqkunata Señor llakipëkutsun,*+ pëqa seguïdum kallpayoq kanäpaq yanapamashqa, y manam carcelchö cadenarëkanqäpita penqakushqatsu. 17 Y Römachö këkarqa, tarimanqanyaqmi mana jamashpa ashimarqan. 18 Señor permitïkutsun tsë junaqchö Teyta Jehovä* llakipëkunampaq.* Kananqa musyankinam Ëfesuchö imakunata rurar yanapakunqanta.