2 Timoteu
2 Tsëmi kuyë tsurillä,+ Cristu Jesus alläpa alli kanqanrëkur poderta chaskinëkipaq Teyta Diosman mañakur sïgui. 2 Noqapita wiyanqëkita y mëtsikaq testïgukuna rasumpa kanqanta rikätsikuyanqanta,+ confiakuypaq nunakunata yachatsi, tsënömi pëkunapis jukkunata yachatsiyänampaq listu këkäyanqa. 3 Cristu Jesuspa alli soldädun karnin,+ imëka mana allikunata sufrinëkipaq listu kë.+ 4 Soldädu kanampaq qayatseqninta kushitsita munarqa, manam mëqan soldädu vïdanchö ima negociumampis* mëtikuntsu. 5 Y pukllakunachöpis, manam pï nunapis premiuta chaskintsu, reglamentu ninqannö mana pukllashqa karqa.+ 6 Chakrachö alli trabajaq nunam, chakrachö wayunqantaqa puntata mikunan. 7 Ninqaqkunaman imëpis pensë; Señormi imëkatapis alli entiendinëkipaq* yanapashunki.
8 Willakunqä alli noticiakuna ninqannöpis,+ Jesucristu wanunqampita kawarimunqanta+ y Davidpa kastan kanqanta+ yarpë. 9 Noqaqa tsërëkurmi sufrikä y mana allita ruraq nunanö prësurëkä.+ Tsënö kaptimpis, Diospa palabranqa manam cadenarëkantsu.+ 10 Tsëmi akrashqa kaqkunarëkur imëkata aguantar këkä,+ tsënöpa pëkunapis salvacionta y mana ushakaq bendicionta Cristu Jesusrëkur tariyänampaq. 11 Kë ninqäqa confiakuypaqmi: pëwan juntu wanurqa o wañurqa, pëwan juntum kawashun;+ 12 alli tsarakur sïguirqa, pëwan juntum gobernashun,+ peru negashqaqa, pëpis negamäshunmi;+ 13 noqantsik mana confiakuypaq kashqapis, kikinta mana negakuyta puëdirmi, pëqa imëpis confiakuypaq kanqa.
14 Pëkunata imëpis këkunata yarpätsi, y Teyta Diospa rikëninchö palabrakunarëkur mana pleytuyänampaq nï,* tsëkunaqa wiyaqkunata mana allita rurarmi,* imachöpis yanapakuntsu. 15 Teyta Diospa rikëninchö alli rikashqa kanëkipaq, imapitapis mana penqakoq trabajador kanëkipaq y rasumpa kaq palabranta alli manejëta yachakunëkipaq llapan puëdinqëkita rurë.+ 16 Peru ama Teyta Diosta deshonrar parlayanqanta cäsuytsu, tsëkunaqa mas mana allikunata rurar Teyta Diosta mana respetëmanmi chätsikun,+ 17 y parlayanqanqa gangrëna ëwaqnömi miranqa. Tsënömi Himeneuta y Filëtutapis pasashqa.+ 18 Tsë nunakunaqa alli yachatsikuykunata dejëkurmi, wanushqakuna kawarimushqana kanqanta nir+ wakinkuna markäkuyanqanta o yärakuyanqanta ushakëkätsiyan. 19 Tsënö kaptimpis, Teyta Dios patsätsinqan alli cimientuqa manam ushakantsu y kënö neq sëlluyoqmi: “Teyta Jehoväqa* musyanmi pikuna pëpa kayanqanta”,+ y: “Teyta Jehoväpa* jutinman confiakoqkunaqa,+ mana alli rurëkunatam dejayänan”.
20 Tsënö kaptimpis, jatun wayichöqa manam imapis örupita y plätallapitatsu kan, sinöqa qerupita y mitupitapis kanmi, y wakinmi alli kaqchö utilizänapaq kayan, y wakinnam mana alli kaqchö utilizänapaq. 21 Tsëmi kë ultimu kaqkunapita rakikashqa karqa, alli kaqchö utilizänapaqmi kanqa, awmi, limpiuyätsishqa karmi duëñumpaq ütil kanqa y imëka allikunata ruranampaqmi listu këkanqa. 22 Tsëmi jövinkuna munayanqampita cuidakuy,* y limpiu shonqunkunawan Señorman confiakoqkunawan juntu, alli kaqta ruranëkipaq, markäkoq o yärakoq kanëkipaq, kuyakoq kanëkipaq y yamë kanëkipaq kallpachakuy.
23 Tsënölla ama mëtikuytsu mana imachöpis yanapakoq pleytukunaman+ y mana cäbeqkunapaq discutiyanqanman, qamqa musyankim tsëkunaqa pelyaman chätsikunqanta. 24 Señorpa sirweqninqa manam pelyar kanantsu, sinöqa llapankunatam shumaq* tratanan,+ alli yachatsikuytam yachanan, mana alli tratayaptinmi controlakuyta yachanan,+ 25 y ninqanwan mana acuerdu kaqkunatam shumaq* yachatsinan.+ Capaz rasumpa kaqta cläru yachakuyänampaq, Teyta Dios arrepentikuyänanta* permitinman,+ 26 tsënöpa juiciunkunaman kutiyänampaq y Diablupa trampampita libri kayänampaq. Pëqa munanqanta rurayänampaqmi pëkunata kawëkaqta achkushqa.+