Exodu

21 Y kë mandakunqäkunatam willanëki:+

2 Juk nuna sirweqnin kanampaq hebreu ollquta rantiptinqa,+ joqta watapam sirweqnin kanqa; peru qanchis kaq wataqa, mana pagakurlla libri ëwakunantam dejanan.+ 3 Japallanta rantishqa kaptinqa, japallanmi libri ëwakunan; peru warmiyoqta rantishqa kaptinqa, ishkankunam libri ëwakuyänan. 4 Peru patronninraq warmin ashipushqa kaptinqa, tsë warmichö wamrankuna kaptimpis, japallanmi libri ëwakunan.+ Y warminwan wamrankunaqa patronnimpa makinchömi quedakuyänan. 5 Peru tsë sirweqnin rogakurnin, “patronnïta, warmïta y wamräkunatam kuyä” nir quedakuyta munaptinqa,+ 6 patronninmi sirweqninta punkuman o punkupa marcunman apëkur noqapa rikënïchö rinrinta uchkupunan.* Tsëpitaqa wanunqanyaqmi patronninta sirwinan.

7 Juk teyta warmi tsurinta sirwipakoq kanampaq rantikuptinqa, manam sirwipakoq ollqunötsu libri yarqunqa. 8 Y patronnin tsë shipash juknin kaq warmin kananta mana munarqa, tsë shipashtam mana allipa tratashqa. Tsëmi pillapis rantita munaptinqa rantikuykunan, peru manam juk nacion nunataqa rantikunmantsu. 9 Y lumtsuynin kananta munarqa, warmi wamrantanömi rikänan. 10 Y juk mas warmiwan casakurninqa, manam punta warmimpaq mikuynin ni röpan pishitsinantsu, y pëwan oqllanakurmi sïguinan.+ 11 Peru tsëkunawan mana cumplirninqa, warmin mana pagakur libri ëwakunantam dejanan.

12 Pï nunapis maqar nuna mayinta wanutsiptinqa o wañutsiptinqa, kikintapis wanutsiyänëkim.+ 13 Peru ardëpa* mana wanutsishqa kaptinqa, y noqa Dios Yaya tsë nuna wanunanta permitiptïqa, noqa ninqaq markamanmi tsë asesïnu nunaqa qeshpir ëwakunan.+ 14 Pï nunapis cölerarnin nuna mayinta wanutsiptinqa,+ kikintapis wanutsiyänëkim; altarnïman qeshpir ëwashqa kaptimpis, tsëpita yarquratsirninmi wanutsiyänëki.+ 15 Papäninta o mamäninta maqaq nunataqa wanutsiyänëkim.+

16 Pï nunapis nuna mayinta suwëkur rantikuptinqa,+ o suwanqan nunata pakarëkätseqta taripuyaptikiqa,+ tsë suwakoq nunatam wanutsiyänëki.+

17 Papäninta o mamäninta insultaq* nunataqa wanutsiyänëkim.+

18 Ishkaq ollqukuna pelyëkäyanqanchö, juknin kaq rumiwan chëkatsiptin o fuertipa kutëkuptinqa,* y cämaraqpaq maqëkuptin, peru mana wanutsiptinqa, këtam rurayänëki: 19 tsë nuna tukruwan purita puëdiptinqa, manam maqaqnin nunata castigayänëkitsu, peru cämaräkurnin trabajëta mana puëdiptinqa, yapë trabajëta puëdinqanyaqmi tsë nunata manteninan.

20 Juk patron sirweqnin ollquta o warmita garrutir wanutsiptinqa, patronnintapis wanutsiyänëkim.+ 21 Peru tsë sirwipakoq juk o ishkë junaqraq kawaptinqa, tsë sirwipakoqta rantishqa kaptinmi patronninta wanutsiyänëkitsu.

22 Ishkaq ollqukuna pelyëkarnin qeshyaq warmita chëkatsiyaptin manaraq tiempunchö llullun yuriptinqa,+ y llullun ni mamampis mana wanuptinqa,* warmita chätseq kaqmi warmipa qowan o runan* mañanqanta y juezkuna churayanqan chaninta pagakunan.+ 23 Peru maman o llullun wanuptinqa, wanutseqnin nunatapis wanutsiyänëkim.+ 24 Pillapis nuna mayimpa nawinta pashtapuptinqa, kikimpa nawintapis pashtapuyänëkim; y pipa kiruntapis shikwatsiptinqa, kikimpa kiruntapis shikwatsiyänëkim. Tsënöllam pipa makinta o chakinta pakipuptimpis, kikimpatapis pakipuyänëki,+ 25 pitapis ninawan rupatsiptinqa, kikintapis rupatsiyänëkim; y pitapis herïdayanqanyaq o qoyunqanyaq maqaptinqa, tsënöllam kikintapis rurayänëki.

26 Juk patron sirweqnin ollquta o warmita wiskuyäratsirqa o qaprayätsirqa, mana pagatsirllam libri ëwakunanta dejanan.+ 27 Y sirweqnin ollqupa o warmipa kirunta shikwatsiptinqa, mana pagatsirllam libri ëwakunanta dejanan.

28 Juk nunapa törun juk ollquta o juk warmita waqrar* wanutsiptinqa, tsë törutam rumiwan wanutsiyänëki,+ y manam ëtsanta mikuyänëkitsu. Y duëñuntaqa manam castigayänëkitsu. 29 Peru törun waqrakunqanta* musyëkar duëñun mana cuidaptinqa, y juk ollquta o juk warmita waqrar wanutsiptinqa, törutam rumiwan wanutsiyänëki, y duëñuntapis wanutsiyänëkim. 30 Peru wanushqa nunapa vïdampita tsë törupa duëñunta pagakunampaq niyaptinqa, mana wanutsiyänampaqmi llapan mañayanqanta pagakunan. 31 Tsënöllam rurayänëki waqrakoq* töru warmi wamrata o ollqu wamrata wanutsiptimpis. 32 Y juk töru sirwipakoq ollquta o warmita waqrar* wanutsiptinqa, törupa duëñunmi tsë sirwipakoqpa patronninta treinta yuraq pläta qellëta* paganan. Y törutaqa rumiwanmi wanutsiyänëki.

33 Juk nuna patsata uchkuskir mana tsapaptin, juk töru o juk ashnu tsëman ishkiptinqa, 34 uchkuta ruraq nunam tsë animalpa chaninta duëñunta paganan,+ y wanushqa animaltam apakunan. 35 Juk nunapa törun, nuna mayimpa törunta waqrar* wanutsiptinqa, waqrakoq töruta rantikuskirmi ishkankuna chaninta rakipänakuyänan. Y wanushqa törupa ëtsantapis tsënöllam rakipänakuyänan. 36 Peru törun waqrakoq* këkaptin duëñun mana cuidarqa, wanushqa törupa duëñuntam juk töruwan paganan, y wanushqa törutam apakunan.