Exodu
22 Pï nunapis juk töruta o juk üshata suwëkur tsë animalta wanutsiptinqa o rantikuptinqa, tsë animalkunapa duëñuntam juk töruta suwanqampita pitsqa töruta kutitsinan, y juk üshata suwanqampitam chusku üshata kutitsinan.+
2 Juk wayiman paqaspa yëkuykaq suwakoqta+ wanutsiyaptinqa, manam wanutseq nuna culpayoqtsu kanqa. 3 Peru patsa waranqanchöna wanutsiptinqa, tsë nunata wanutsinqampitam culpayoq kanqa.
Suwaqa suwakunqampitam pagakunan. Y pagakunampaq mana kapuptinqa, suwakunqampita pagakunampaqmi kikinta rantikuyänan. 4 Y apakunqan töruta, ashnuta y üshata taripuyaptinqa, suwakunqampitapis juk mastam tsë animalkunapa duëñunta kutitsinan.
5 Pï nunapis murushqa chakranchö o üvas chakranchö mitsikuykarnin, jukpa murushqa chakranchö o üvas chakranchö animalninkuna däñukuyanqanta rikaräkuptinqa, mas alli kaq cosëchanwan o mas alli kaq üvasninwanmi pagakunan.
6 Pï nunapis kayapakur ninata tsaritsiptin, tsë tsaritsinqan nina kashakunata, jukpa chakranchö segashqa o manaraq segashqa gränukunata o murukunqanta ushaptinqa, tsë kayapakoqmi nina ushakätsinqampita pagakunan.
7 Pï nunatapis qellëta o imatapis umpakuyaptin o paytakuyaptin, y suwa wayimpita apakuptinqa, suwakoqta tarirqa doblitam pagatsiyänëki.+ 8 Y tsë suwakoqta mana tarirqa, tsë wayipa duëñuntam noqapa rikënïman apayämunëki,+ tsënöpa umpakuyanqanta o paytakuyanqanta quedatsikunqanta o mana quedatsikunqanta musyayänëkipaq. 9 Pï nunatapis nuna mayimpa törunta, ashnunta, üshanta, röpanta o imantapis katsinqampita tumpayaptinqa , y pï nunapis, “¡këqa noqapam!” niptinqa, ishkanmi noqapa rikënïman shayämunan,+ tsënöpa noqa Dios Yaya mëqan culpayoq kanqanta musyatsikunäpaq, y culpayoq kaqmi juk masta paganan.+
10 Pï nunapis ashnunta, törunta, üshanta o ima animalnintapis umpakuptin o paytakuptin, y pillapis mana rikëkaptin tsë animal wanuptin, malograkuptin o suwa apakuptinqa, 11 cuidapakoq nunam noqa Jehoväpa rikënïchö cläru ninan tsë animalta mana imanashqa kanqanta, y duëñunqa tsë nuna ninqantam creinan, y cuidapakoqqa manam imatapis kutitsinantsu.+ 12 Peru tsë animalta suwa apakushqa kaptinqa, tsë animalpitam duëñunta paganan. 13 Y ima animalpis mikukurkushqa kaptinqa, tsë animal katunqan ëtsatam duëñunta rikätsinampaq apanan, y manam tsë animalpa duëñunta imatapis paganantsu.
14 Pillapis nuna mayimpa animalninta mañakuptin, y duëñun mana rikëkaptin malograkuptin o wanuptinqa, mañakoq kaqmi tsë animalpa duëñunta paganan. 15 Peru duëñun rikëkaptin wanuptinqa, manam tsë animalpa duëñunta paganantsu. Y tsë animalta alquilashqa kaptinqa, alquilerpa chaninmi pägun kanqa.
16 Pï ollqupis soltëra shipashta shumaq parlapaptin y pëwan punukuykuptinqa, pëwan casakunapaqmi tsë shipashpa papäninta chaninta paganan.+ 17 Y shipashpa papänin warmi tsurinwan casakunanta mana munaptimpis, tsë shipashpa chanintaqa pagananmi.
18 Brujerïa ruraq warmitaqa wanutsiyänëkim.+
19 Pï nunapis juk animalwan kakuptinqa wanutsiyänëkim.+
20 Pï nunapis noqa Jehovällapaq pishtashqa animalkunata rupatsinan këkaptin ima santupaqpis pishtashqa animalkunata rupatsiptinqa wanutsiyänëkim.+
21 Egiptu nacionchö forastëru kayanqëkita yarparmi,+ juk nacion nunakunataqa mana allipa tratayänëkitsu.+
22 Manam viudakunata ni papäninnaq o mamannaq wamrakunata mana allipa tratayänëkitsu.+ 23 Pëkunata sufritsiyaptiki noqaman rogakayämuptinqa, rogakayämunqantam wiyashaq,+ 24 y qamkunawan cölerarmi espädawan wanutsiyäshunëkita o wañutsiyäshunëkita permitishaq. Tsëqa warmikikunam viuda quedayanqa, y wamrëkikunapis papäninnaqmi quedayanqa.
25 Waktsayashqa sirwimaqnïta qellëta prestarqa, marka mayikikuna kaptinmi, qellëta prestakoq nunakunanötsu kayänëki, y manam prestayanqëki qellëpa wachëninta mañayänëkitsu.+
26 Qellëta prestayanqëkipita, nuna mayikipa aqshunanta* prendatanö apakurninqa,+ manaraq inti o rupay jeqaptinmi kutitsiyänëki, 27 sinöqa, ¿imataraq aqshukunqa?* ¿O imawanraq punukunqan höra tsapakunqa?+ Mana kutitsiptiki noqaman rogakamuptinqa, llakipäkoq* karmi rogakamunqanta wiyashaq.+
28 Manam noqa Diosnikikunata, ni markëkikunachö dirigentikunata insultayänëkitsu.*+
29 Cosëchëkikuna alli kaptin, y vïnuykikuna y aceitikikuna atska kaptinqa, manam ‘¿Teyta Diospaq qarënin apäku o manaku?’ nirnin pensar këkäyankitsu.+ Tsënöllam punta kaq wamrëkikunatapis noqata entregayämänëki.+ 30 Y wäkëkikunapa orqu* wawan o üshëkikunapa wawan yuriptinqa,+ qanchis junaqmi mamanwan katsiyänëki, y puwaq kaq junaqqa noqapaqmi apayämunëki.+
31 Qamkunaqa sirweqnïkuna karmi imëkachöpis limpiu kayänëki,+ tsëmi ëtsa mikoq animal katunqan ëtsataqa mikuyänëkitsu,+ tsëpa rantinqa allqukunatam qarëkuyänëki.