1 Samuel
26 Tiempu pasariptinnam Zif+ markapita ollqukunaqa, Guibeä+ markata ëwar Saulta niyarqan: “Davidqa mana tariyänampaqmi Jesimonpa+ frentin Hakilä jirkachö këkan”. 2 Tsëmi Saulqa mas puëdeq tres mil soldädukunawan,* Zif markapa tsunyaq jirkankunachö Davidta ashinampaq ëwarqan.+ 3 Saulqa Jesimonpa frentin Hakilä jirkachömi näni kuchunchö campamentun rurarqan. Y Davidnam tsunyaq jirkachö këkarnin musyarirqan, tsë jirkakunachö Saul ashikanqanta. 4 Tsënam Davidqa soldädunkunata mandarqan Saul tsëchö rasumpa këkanqanta o mana këkanqanta musyapakayämunampaq. 5 Tsëpitanam Davidqa Saulpa campamentunman ëwarqan. Chärirmi rikarqan Saulwan soldädunkunapa mandaqnin Nerpa tsurin Abner+ mëchö punuykäyanqanta. Saulqa campamentupa chowpinchömi* punuykarqan y soldädunkunanam entëru lädunchö punuykäyarqan. 6 Tsënam Davidqa Zeruyäpa+ wamran Abisaita (Zeruyäpa juk kaq wamranqa Joabmi karqan) y Ahimëlec jutiyoq hitïta+ nunata kënö tapurqan: “¿Mëqëkitan noqawan ëwëta munayanki Saulpa campamentunman?”. Tsënam Abisaiqa,+ “noqawan ëwashun” nirqan. 7 Davidwan Abisaiqa paqaspam ëwayarqan, y campamentuman yëkurirmi Saulta punukashqata tariyarqan. Lanzanta jawnan lädunchö patsaman jawïkurmi punuykarqan. Y Abnerwan wakin soldädunkunaqa entëru lädunchömi punuykäyarqan.
8 Tsënam Abisaiqa Davidta kënö nirqan: “Kananmi Diosnintsikqa chikishoqnikita entreguëkäshunki.+ Juk makillapaqmi kanqa, lanzanwan tuksiramushaq”. 9 Peru Davidnam Abisaita nirqan: “Ama imanëtsu. Jehovä Dios akranqan gobernantita+ yataqqa culpayoqmi tikranqa”.+ 10 Yapëmi Davidqa kënö nirqan: “Jehovä Diospa jutinchömi neq, kikin Jehovämi wanutsinqa+ o guërraman ëwaptinmi wanutsiyanqa+ o manaqa imë höra karpis wanunqam.+ 11 ¡Jehovä Dios akranqan gobernantitaqa manachi ni imanöpapis yatëkullämantsu!+ Tsëta rurëkuptïqa manachi Jehoväta gustanqatsu. Jawnan lädunchö këkaq lanzanllata y yaku puritsinan porongunllata aparkur ëwakushun”. 12 Tsënam Davidqa Saulpa jawnan lädunchö këkaq lanzanta y yaku puritsinan porongunta aparkur ëwakurqan. Jehovä Diosmi permitirqan Saulwan soldädunkuna wanushqanö punukäriyänanta, tsëmi David yëkoqta sientiyarqantsu ni rikäyarqantsu.+ 13 Tsëpitanam Davidqa wak tsimpaman pasarir jirka puntanyaq witsarqan. Y Saul këkanqampitaqa karuchönam këkarqan.
14 Tsë jirkapitam Davidqa Saulpa soldädunkunaman qayakurqan, y Nerpa tsurin Abnertam,+ “¡wiyamankiku Abner!” nirqan. Abnernam, “¿qamqa pitaq kanki Israelpa gobernaqninman tsënö qayakamunëkipaq?” nirqan. 15 Tsënam Davidqa Abnerta kënö nirqan: “Qamqa valienti soldädum kanki, qamnöqa manam Israelchö jukllëllapis kantsu. Tsënö këkarqa, ¿imanirtaq cuidarqunkitsu Israelpa gobernaqninta? Juk soldädum wanutsinampaq campamentuman paqaspa yëkamurqan.+ 16 Y manam sientirqunkitsu. ¡Mä ashiri! ¿Mëtaq jawnan lädunchö këkaq lanzan y yaku puritsinan porongun?+ Jehovä Diospa jutinchömi neq, qamkunaqa Jehovä akranqan gobernantita+ mana cuidayanqëkipitam wanuyanki o wañuyanki”.
17 Tsënam Saulqa David kanqanta reqiskir, “David, ¿qamku parlapëkämanki hïju?”+ nirqan. Davidnam, “awmi, noqam parlapëkaq teytallë” nirqan. 18 Y kënömi nirqan: “Teytallë, noqalläqa sirwishoqnikim kallä. ¿Imanirtan wanutsimänëkipaq ashikämanki?+ ¿Imapitataq culpayoq kallä? ¿Ima mana allitataq rurarqö?+ 19 Teytallë wiyaramë, chikimänëkipaq Jehovä Dios permitishqa kaptinqa, pëpaq gränupita rurashqa qarëkunata rupëkatsishaq. Peru nunakuna chikinakatsimashqantsik kaptinqa,+ Jehovä Dios pëkunata castiguëkutsun.* Pëkunapa culpanrëkurmi Teyta Jehoväta sirweqkunawan* juntu kawakuyta puëdïtsu,+ y ‘¡këpita ëwakuy, santukunata adorakunëkipaq!’ neq cuentam qarqayämashqa. 20 Jehovä Diosta adorayanqampita karuchöqa, ama wanunäta dejëkuytsu. Noqalläqa pulganö mana väleqllam kallä.+ Peru qamqa tsakwatanömi jirkakunachö qatikachämanki”.
21 Tsënam Saulqa Davidta nirqan: “Hïju kutikamuy, manam imanashqëkinatsu. Kananmi musyarqö wanutsimëta mana munanqëkita.+ Upa rurëtam rurarqö, alläpa mana allitam rurarqö”. 22 Davidnam nirqan: “Këchömi lanzëkita këkätsï, mëqan soldädupis shamutsun qamman kutitsimunampaq. 23 Jehovä Dios akranqan gobernanti kanqëkita musyarmi, Jehovä permitikämaptimpis wanutsirqoqtsu.+ Teyta Jehovänam llapan ruranqantsikta cuentachö katsir cada ünuta pagamäshun.+ 24 Qamta kanan mana wanutsinqaqpita Jehovä Dios cuidëkamätsun y imëka mana allipita salvëkamätsun”.+ 25 Saulnam nirqan: “David, hïju, Teyta Dios bendicïkushuy. Qamqa imëkata ruranëkipaqmi listu këkanki, y llapan ruranqëkim alli kanqa”.+ Tsëpitanam Davidqa ëwakurqan y Saulpis wayintam kutikurqan.+