Exodu
16 Tsëpitanam Elim sitiupita ëwakuyarqan, y Sin nir reqiyanqan tsunyaq sitiumanmi chäyarqan.+ Tsë sitiuqa Elim y Sinaï sitiukunapa chowpinchömi* karqan. Egiptupita yarquyanqampitaqa juk killanam pasashqa karqan, y tsë killapa quinci kaq junaqninmi Sin sitiuman chäriyarqan.
2 Tsë tsunyaq sitiuchömi israelïtakunaqa Moisespita y Aaronpita quejakur qallëkuyarqan.+ 3 Y kënömi niyarqan: “¡Mas alliqa Egiptullachöna Teyta Jehovä wanuykatsiyämanman karqan! Egiptuchöqa ëtsata+ y juk mikuykunatapis pacha juntam mikuyarqä. Peru qamkunaqa mallaqëpita wanuyänäpaqmi kë tsunyaq sitiuman apayämarqunki”.+
4 Tsënam Teyta Jehoväqa Moisesta nirqan: “Ciëlupitam mikuyta shikwatsimushaq,+ y cada junaqmi mikuyänëkipaq tinkulla ëlluyänëki o qoriyänëki.+ Tsëchömi rikäshaq mandakunqäta wiyakuyanqëkita o mana wiyakuyanqëkita.+ 5 Peru joqta kaq junaqchöqa+ ishkë junaqpaqmi mikuynikikuna ëlluyänëki o qoriyänëki,+ y mikuyänëkipaqmi listullatana dejayänëki”.
6 Tsëpitanam Moiseswan Aaronqa llapan israelïtakunata niyarqan: “Kanan tardim musyayanki Egiptu nacionpita Teyta Jehovä salvayäshunqëkita.+ 7 Teyta Jehoväqa musyëkanmi pëpaq quejakuyanqëkita, tsëmi patsa warë Teyta Jehovä alläpa puëdeq kanqanta rikäyanki. ¿Imanirtaq noqakunapita quejakuyanki? Noqakunaqa sirweqninkunallam kayä”. 8 Tsëpitanam Moisesqa nirqan: “Patsa waräramuptin mikuynikikuna kananta, y tardipa mikuyänëkipaq ëtsa kapuyäshunëkita Teyta Jehovä permitiptinmi, pëpaq quejakuyanqëkita Teyta Jehovä wiyashqa kanqanta musyayanki. ¿Imanirtaq sirweqninkunalla këkäyaptï noqakunapita quejakuyanki? Rasumpa kaqchöqa Teyta Jehoväpitam quejakuykäyanki”.+
9 Tsëpitanam Moisesqa Aaronta nirqan: “Llapan israelïtakunata këta nï: ‘Teyta Jehoväqa llapan quejakuyanqëkitam wiyashqa,+ tsëmi pëpa rikëninman shayämunëki’”. 10 Aaron tsëta niptin israelïtakuna tsunyaq sitiuman tumarmi Teyta Jehoväpa podernin pukutëchö chipapëkaqta rikäyarqan.+
11 Teyta Jehoväqa Moisesta kënömi nirqan: 12 “Israelïtakuna quejakayämunqantam wiyarqö,+ tsëmi kënö ninëki: ‘Kanan tardim* ëtsata mikuyanki, y patsa warënam pachëkikuna juntanqanyaq mikuyänëkipaq mikuynikikuna kanqa.+ Tsënöpam musyayanki noqa Jehovä Diosnikikuna kanqäta’”.+
13 Tsë tardim israelïtakuna këkäyanqan campamentuman mëtsika codornizkuna chäyarqan,+ y patsa warënam campamentunkuna tumareq shullya* warämurqan. 14 Shullya* tsakiriptinqa azucarnömi patsachö yuraq quedarqan.+ 15 Tsënam israelïtakunaqa ima kanqanta mana musyar, “¿imatan këqa?” niyarqan. Tsënam Moisesqa nirqan: “Këqa mikuyänëkipaq Teyta Jehovä shikwatsimunqan mikuymi.+ 16 Y Teyta Jehoväqa këta rurayänëkipaqmi nishqa: ‘Mikuyänëkipaq tinkulla llapëki juntayanki, y carpëkikunachö* cada nunapaq ishkë litrutanö* juntayanki’”.+ 17 Israelïtakunaqa tsënömi rurayarqan, wakinmi atskata juntayarqan, y wakinnam wallkallata juntayarqan. 18 Peru atskata o wallkata juntashqa kayaptimpis, cada ünupaq ishkë litrutanö tsaraq* matiwan mediyaptinqa, llapankunam ishkë litrutanö mikuyninkuna chaskiyarqan.+
19 Tsëpitanam Moisesqa, “ama waränin junaqpaqqa sobratsiyankitsu” nirqan.+ 20 Tsënö kaptimpis, wakin israelïtakunaqa Moises ninqanta mana cäsukurmi waränin junaqpaq sobratsiyarqan, y tsë sobratsiyanqanqa kururmi asyar qallëkurqan. Tsëmi Moisesqa pëkunawan cölerakurqan. 21 Tsë mikuyqa inti o rupay yarqaramuptinmi tsullureq, tsëmi cada junaq inti manaraq yarqamuptin mikuyänampaq tinkulla juntayaq.
22 Joqta kaq junaqqa, ishkë junaqpaq juntayänan kaptinmi cada ünupaq chusku litrutanö* juntayarqan.+ Tsënö rurëkäyanqanta rikarmi israelïtakunata dirigeqkunaqa Moisesta willaq ëwayarqan. 23 Tsënam Moisesqa pëkunata kënö nirqan: “Teyta Jehovämi këta nishqa: warë säbaduqa Teyta Jehoväta alabayänëkipaqmi kanqa,+ y manam imatapis rurayänëkitsu. Tsëmi imatapis kuwayänëkipaq kaqtaqa kananllana kuwayänëki, y yanuyänëkipaq kaqtaqa kananllana yanuyänëki,+ y sobranqan kaqtaqa warëpaqmi churëkuyänëki”. 24 Tsëmi israelïtakunaqa Moises ninqannölla sobranqan mikuyta waränin junaqpaq churëkuyarqan, y manam kururqantsu ni asyarqantsu. 25 Waränin junaqnam Moisesqa israelïtakunata nirqan: “Kananmi churakuyanqëkita mikuyänëki, kanan säbaduqa Teyta Jehoväta alabayänëkipaqmi. Kananqa asheq ëwarpis manam tsë mikuyta tariyankitsu. 26 Joqta junaqpam juntayänëkipaq kanqa, peru säbadu junaqqa+ manam imatapis tariyankitsu”. 27 Tsënö kaptimpis, wakinkunaqa säbadu junaqchömi tsë mikuyta asheq yarquyarqan, peru manam ni imatapis tariyarqantsu.
28 Tsënam Teyta Jehoväqa Moisesta kënö nirqan: “¿Imanirtan mandakunqäkunata cäsukuyankitsu?+ 29 Noqa Jehoväqa jamayänëkipaqmi säbadu junaqta akrarqö,+ y tsëtaqa manam imëpis qonqayänëkitsu. Tsëmi säbadu junaqqa këkäyanqëkillachö quedakuyänëki, y manam mëtapis yarquyänëkitsu. Y joqta kaq junaqmi ishkë junaqpaq mikuynikikuna juntayänëki”. 30 Tsëmi israelïtakunaqa säbadu junaqchö ima trabäjutapis rurayarqantsu.+
31 Israelïtakunaqa manä* nirmi tsë mikuypa jutin churayarqan. Tsë mikuyqa culantrupa murunnömi karqan, y colorninqa yuraqmi karqan, y mikuyaptinqa mielyoq tantanömi karqan.+ 32 Tsëpitanam Moisesqa nirqan: “Teyta Jehovämi këta nishqa: ‘Egiptupita salvayäshurniki tsunyaq sitiuchö manäwan wätayäshunqëkita wamrëkikunata willayänëkipaqmi, ishkë litrutanö manäta guardayanki’”.+ 33 Tsënö nirmi, Moisesqa Aaronta kënö nirqan: “Tsëpita yureq wamrakuna rikäyänampaq ishkë litrutanö manä mikuyta juk järraman winë, y Teyta Jehoväpa rikëninman churë”.+ 34 Tsënam Moisesta Teyta Jehovä mandanqannölla Aaronqa Sagrädu Cäjapa puntanman manä mikuyta churarqan.+ 35 Canaan markakunapa lindërunkunaman chäyanqanyaqmi+ israelïtakunaqa cuarenta watapa manäta mikuyarqan.+ 36 Manä mikuyta juntayänampaq utilizäyanqan matiqa ishkë litrutanömi tsaraq.*