2 Rëyes

4 Diospa willakoqnimpa+ viudanmi, juk kuti Eliseuman ëwarnin kënö nirqan: “Majäqa wanukushqanam, musyanqëkinöpis pëqa Jehovä Diosta respetarqanmi.+ Peru kananmi debiyanqä nuna cobramaq shamushqa, y ishkan wamräkunatam sirweqnin kayänampaq apakuyta munan”. 2 Tsënam Eliseuqa nirqan: “¿Imanöraq yanapëkoqman? ¿Imëkillapis wayikichö kanku?”. Viudanam nirqan: “Manam ni imapis kapamantsu, järrachö ichiklla aceitillam këkan”.+ 3 Eliseunam nirqan: “Ëwarnin llapan vecïnuykikunata mëtsika järrakunata mañakamuy. Llapan tarinqëkita apamunki. 4 Tsëpitana wayikichö punkuta wichqarkamur wamrëkikunawan tsë järrakunaman aceitita winayanki. Y cada juntatsir juk läduman churayanki”. 5 Tsënö niptinmi warmiqa ëwakurqan.

Tsëpitanam wayimpa punkunta wichqarkur aceitita winar qallëkurqan+ y wamrankunam järrakunata makyayarqan. 6 Llapan järrakunaman aceiti juntariptinnam juk kaq wamranta, “mas järrakunata makyamë” nirqan.+ Wamrannam, “manam masqa kannatsu” nirqan. Tsë höram winëkanqan aceiti ushakärirqan.+ 7 Tsëpitanam warmiqa ëwarnin Diospa willakoqninta willarqan. Tsënam Eliseuqa nirqan: “Tsë aceitita rantikuskir debikunqëkita pagakuy, y sobraq kaq qellëqa gastuykikunapaqna katsun”.

8 Juk kutinam Eliseuqa Sunem markata ëwarqan,+ y tsëchömi kapoqyoq warmi wayinman mikoq ëwanampaq invitarqan.+ Tsëpitaqa, tsëpa pasarqa tsë wayimanmi Eliseuqa imëpis mikoq chaq. 9 Tsënam warmiqa qowanta o runanta* kënö nirqan: “Wayintsikman imëpis chämoq nunaqa Teyta Diospa sirweqninmi. 10 Cada shamurnin quedakunampaq wayi jananchö+ juk cuartuta rurëkatsishun. Y cäman, sïllan, mësan y chiwchin alistarkapushun”.+

11 Juk kutichönam Eliseuqa chärir wayi jananchö cuartuman punukoq ëwakurqan. 12 Y sirweqnin Guehazïtam,+ “wayiyoq warmita qayaramuy” nirqan. Warmi chäriptinnam, 13 Eliseuqa Guehazïta kënö nirqan: “Warmita nïkullë: ‘Qamqa noqalläkunata shumaqmi chaskiyämarqunki.+ ¿Imanöllaraq noqaqa yanapëkoqman?+ ¿Munankimantsuraq gobernantita o soldädukunapa mandaqninta imanöpis yanapëkushunëkipaq parlapämunäta?’”.+ Guehazï tsënö niptinmi, warmiqa, “manam, marka mayïkunawan allim kawakü, manam imäpis pishintsu” nirqan. 14 Tsënam Eliseuqa Guehazïta nirqan: “Tsëqa, ¿imallataraq rurëkushwan?”. Guehazïnam nirqan: “Manam jukllëllapis wamran kantsu+ y qowanqa o runanqa* awkinnam”. 15 Tsënö niptinnam Eliseuqa, “kanan höra warmita qayamuy” nirqan. Y Guehazï qayaramuptinmi, warmiqa punku kaqman shäkurirqan.* 16 Tsënam Eliseuqa warmita kënö nirqan: “Watan kënö witsampaqqa wamrayoqnam kanki”.+ Warminam nirqan: “Teyta Diospa willakoqnin këkarqa, ¡ama tsënöqa nïkamëtsu!”.

17 Eliseu ninqannömi warmiqa qeshyaq tikrarirqan, y juknin watapaqqa ollqu wamranmi yurikurqan. 18 Y wamraqa jatunna këkarmi, papänin cosëchachö këkaptin chakrata ëwarqan. 19 Tsëchö këkarnam wamraqa papäninta nirqan: “¡Peqämi o umämi alläpa nanan!”. Tsënam papäninqa sirweqninta nirqan: “Wamräta mellqarkur mamanman apëkullë”. 20 Tsëmi sirweqninqa apëkurqan. Y maman mellqarëkaptinmi wamraqa pullan junaq wanurirqan.+ 21 Tsënam warmiqa Diospa willakoqnimpa+ cämanman wanushqa wamranta churëkur punkuta wichqarkamurqan. 22 Tsëpitanam qowanman o runanman* kënö nir qayarqan: “Ashnuta aparkur juk sirwimaqnintsik shamutsun. Diospa willakoqnin Eliseu kaqta ëwarishaq, rätullam kutiramushaq”. 23 Tsënö niptinmi qowanqa o runanqa* nirqan: “¿Imaqtan kanan junaqqa ëwanki? Manam llullu killachötsu ni säbadu junaqchötsu këkantsik”.+ Warminam, “ama yarpachakuytsu, imanö kaptimpis ëwarishaq” nirqan. 24 Tsënam warmiqa ashnunta sillarkur sirweqninta kënö nirqan: “Empëñulla ëwashun, mëchöpis jamanapaqqa noqaraqmi nishqëki”.

25 Warmiqa Diospa willakoqnin kawanqan Carmëlu jirkayaqmi ëwarqan. Diospa willakoqninqa warmi shamuykaqta karuman rikëkurmi, sirweqnin Guehazïta kënö nirqan: “¡Rikë! Sunem markapita warmim shamuykan. 26 Jinan höra ëwarnin imanö këkäyanqanta tapuri. Mä imanöshi majampis wamrampis këkäyan”. Ëwarnin Guehazï tapuptinnam warmiqa, “allim këkäyä” nirqan. 27 Eliseu kaqman chärirnam warmiqa chakimpita achkukurkurqan.+ Guehazï rakirnin sutëta munaptinnam Diospa willakoqninqa nirqan: “Ama sutëtsu, alläpa llakishqam këkan. Teyta Jehoväqa manam ima pasanqantapis willamashqatsu”. 28 Tsënam warmiqa nirqan: “Teytallë, noqaqa manam wamrayoq kanäpaq mañakurqätsu. ¿Manaku yarpanki ‘ama ulipämëtsu o llullapämëtsu’ ninqaqta?”.+

29 Tsënö niptinmi Eliseuqa Guehazïta nirqan: “Tseqllëkita alli watarkur,+ tukrüta aparkur jinan höra ëwë. Piwampis nänichö tinkurqa ama saludankitsu ni saludashuptikipis contestankitsu. Chärirqa wamrapa cäranman tukrüta churanki”. 30 Warminam Eliseuta kënö nirqan: “Teytallë, kikikiwan mana ëwarqa manam kutishaqtsu.+ Tsëtaqa Teyta Jehoväpa y qampa jutikichömi nikaq”. Tsënö niptinmi Eliseupis ëwarqan. 31 Guehazïqa puntata chärirmi wamrapa cäranman tukruta churarqan, peru wamraqa manam kawarimurqantsu.+ Tsëmi Eliseuman kutïkur, “manam wamraqa kawarimuntsu” nirqan.

32 Pununqan cuartuman Eliseu yëkurirnam wanushqa wamrata cämanchö tarirqan.+ 33 Tsënam punkuta wichqarkamur Teyta Jehoväman mañakurqan.+ 34 Tsëpitanam aya jananman lätakëkur, shiminta ayapa shiminman topatsirqan, nawinta ayapa nawinwan topatsirqan y maki paltanta ayapa makinwan topatsirqan. Tsënö juk rätu kariptinmi ayaqa qoñur qallëkurqan.+ 35 Eliseuqa sharkurmi kë läduman y wak läduman purirqan. Y yapëmi aya jananman lätakarqan. Tsënam wanushqa wamraqa qanchis kuti wishqëkur* nawinta kicharkamurqan.+ 36 Tsëpitanam Eliseuqa Guehazïta nirqan: “Wayiyoq warmita qayamuy”. Qayariptinnam warmiqa Eliseu këkanqan cuartuman yëkurqan. Eliseunam, “kananqa wamrëkita mellqarkur apakuy” nirqan.+ 37 Tsënam warmiqa patsamampis urkun chanqanyaq Eliseupa chakin kaqman qonqurikurqan. Tsëpitanam wamranta mellqarkur yarqaramurqan.

38 Tsëpitanam Eliseuqa Guilgal markaman kutikurqan, y tsë witsanqa alläpa mallaqë tiempum karqan.+ Juk kutim Diospa willakoqninkunawan*+ këkarnin sirweqninta nirqan:+ “Diospa willakoqninkuna mikuyänampaq, jatun mankachö cocinakaramuy”. 39 Tsëyaqnam juk kaqqa, qorakuna* asheq chakrapa ëwarqan. Tsënö ashikanqanchömi calabäzu niraq frütata tarïkur atskata mellqakurkur kutirqan. Chäratsirnam mikuna kanqanta pensar picar picar mankaman winarkurqan. 40 Tsëpitanam Diospa willakoqninkuna mikuyänampaq cocinayanqanta sirwiyarqan. Y pëkunaqa ichik mikurkurmi mantsakarnin Eliseuta niyarqan: “Teyta Diospa willakoqnin, kë mikuyqa venenashqam, mikurninqa wanushunmi”. Tsënö nirmi mikuyarqantsu. 41 Eliseunam, “harinata apayämuy” nirqan, chäratsiyaptinnam mankaman harinata winarkur, “kananqa llapankunata sirwiyë” nirqan. Y mikuyqa allinam karqan.+

42 Juk kutim Baal-Salisä+ sitiupita juk nuna, punta poqoq cebädapita veinti tantakunata+ rurarkur Diospa willakoqnin Eliseupaq aparqan. Tsënöllam punta poqoq cebädatapis aparqan.+ Tsënam Eliseuqa sirweqninta nirqan: “Apamunqan mikuyta nunakunata qarë”. 43 Tsënö niptinmi sirweqninqa, “manam këqa cien nunakunapaq tinkunqatsu” nirqan.+ Tsënam Eliseuqa nirqan: “Wallkalla kaptimpis qarëlla, Teyta Jehovämi nimashqa llapankuna mikuykäyaptimpis sobranampaq kaqta”.+ 44 Tsënö niptinmi llapankunata sirwirqan, y Jehovä Dios ninqannömi llapankuna mikuykäyaptimpis mikuyqa sobrarqan.+