Exodu
20 Tsëpitanam Teyta Diosqa israelïtakunata kënö nirqan:+
2 “Noqam Jehovä Diosnikikuna kä, noqam Egiptuchö esclävu kayanqëkipita salvamurqö.*+ 3 Tsëmi noqallata adorayämänëki, y manam santukunataqa adorayänëkitsu.+
4 Manam santukunata rurayänëkitsu, ni ciëluchö këkaq niraqta, ni patsachö këkaq niraqta, ni lamar rurinchö këkaq niraqtapis.+ 5 Y manam tsë santukunata sirwiyänëkitsu ni adorayänëkitsu.*+ Noqam Jehovä Diosnikikuna kä, tsëmi noqallata adorayämänëkita munä.+ Papä kaqkuna chikimarnï mana allikunata rurayanqampitam permitishaq tsurinkuna, willkankuna y tsurimpa willkankuna sufriyänanta. 6 Tsënö kaptimpis, kuyamaqkunapa y mandakunqäta wiyakoq kaqkunapa kastankunataqa imëyaqpis kuyashaqmi.+
7 Noqa Jehovä Diosqa, jutïta mana respetaqkunatam castigashaq,+ tsëmi jutï Jehoväta imëpis respetayänëki.+
8 Säbaduqa noqata adorayämänëkipaq kanqantam yarpäyänëki.+ 9 Joqta junaqpam imëka rurënikikunata rurayänëki,+ 10 peru säbaduqa noqa Jehovä Diosta adorayämänëkipaqmi kanqa. Tsë junaqqa manam wamrëkikuna, sirwishoqnikikuna, animalnikikuna ni markëkichö forastërukuna trabajayänantsu.+ 11 Joqta junaqmi noqa Jehovä Diosqa, ciëluchö, patsachö y lamarchö llapan kaqkunata kamarqä, y qanchis junaqqa jamaparqämi.+ Tsëmi noqa Jehoväqa säbadu junaq noqapaq kanampaq nirqö.
12 Papänikikunata y mamänikikunatam kuyar respetayänëki,+ tsëqa noqa Jehovä qamkunata äninqä* patsachömi mëtsika watapa kawayanki.+
13 Manam nuna mayikikunata wanutsiyänëkitsu.+
14 Mana majëkikunawanqa manam oqllanakuyänëkitsu.+
15 Manam suwakuyänëkitsu.+
16 Imatapis rikäyanqëkipita willakuyänëkipaq qayatsiyäshuptikiqa, ama mana kaqpitaqa pitapis tumpayankitsu.+
17 Manam nuna mayikikunapa wayinta, warminta,+ sirweqninta, törunta, ashnunta ni imantapis munapäyänëkitsu”.+
18 Räyukuna chilapyanqanta, carnërupa waqranta tocayanqanta y jirka qoyëkanqantam o qoshnikanqantam llapan israelïtakuna rikäyarqan. Tsëta wiyar y rikarmi mantsakar karkaryäyarqan, y karullachömi shëkar* quedakuyarqan.+ 19 Tsëmi Moisesta niyarqan: “Qamlla parlapäyämë y wiyayashqëkim, peru Teyta Diosqa ama parlapäyämätsuntsu, tsënöpa mana wanuyänäpaq o wañuyänäpaq”.+ 20 Tsënam Moisesqa israelïtakunata nirqan: “Ama mantsakäyëtsu, Teyta Diosqa imanö këkäyanqëkita rikaqmi shamushqa,+ tsënöpa llapan shonquykikunawan pëta respetayänëkipaq y jutsata* mana rurayänëkipaq”.+ 21 Tsëpitanam Moisesqa pukutë kaqyaq Dios Yayawan parlaq ëwarqan, y tsëyaqmi israelïtakunaqa karullachö quedakuyarqan.+
22 Pukutë kaqman Moises chäriptinnam Teyta Jehoväqa nirqan: “Israelïtakunatam këta ninëki: ‘Qamkunaqa ciëlupita parlamunqätam rikäyarqunki.+ 23 Tsëmi noqallata adorayämänëki, y manam plätapita ni örupita santukunata rurayänëkitsu ni adorayänëkitsu.+ 24 Allpapitam altarnï rurayänëki. Tsë jananchömi üshakunata y wäkakunata noqapaq rupatsiyänëki, y ushakanqanyaq rupatsina qarëkunata, y amïgu kanqantsikta rikätsikoq qarëkunatam rurayänëki. Mëchöpis adorayämänëkipaq akranqä sitiuchömi* këkäshaq,+ y bendiciyashqëkim. 25 Rumikunawan altarnï rurarninqa ama llaqllashqa rumikunawan* rurayankitsu.+ Cincelwan llaqllashqa kaptinqa manam noqapaq allitsu kanqa. 26 Escalompa witsäyaptiki penqënikikuna* mana rikakunampaq altarnï rurarninqa escalonninnaq rurayanki’.