Zacarïas
1 Gobernaq Darïu+ ishkë watanöna gobernëkaptinmi, watapa puwaq killanchö Teyta Jehoväqa willakoqnin Zacarïasta*+ parlaparqan. Zacarïasqa Berekïaspa tsurinmi karqan, y Berekïasnam Idöpa tsurin karqan. Teyta Diosqa kënömi Zacarïasta nirqan: 2 “Noqa Jehoväqa papänikikunawan y awiluykikunawanmi alläpa cölerakurqä.+
3 Nunakunata këta nï: ‘Angelkunata mandaq Teyta Jehovämi nin: “‘Noqa angelkunata mandaq Jehoväman kutiyämuy, noqapis qamkunamanmi kutimushaq’+ ninmi angelkunata mandaq Teyta Jehovä”’.
4 ‘Ama papänikikunanö y awiluykikunanöqa kayëtsu. Pëkunataqa unë willakoqnïkunam kënö niyarqan: “Angelkunata mandaq Teyta Jehovämi nin: ‘Ama mana alli portakuyënatsu ni mana allikunata rurayënatsu’”’.+
‘Peru pëkunaqa manam wiyakuyarqantsu ni cäsukuyarqantsu’+ ninmi Teyta Jehovä.
5 ‘Rasunmi papänikikuna, awiluykikuna y willakoqnïkunaqa ushakäyashqana. 6 Papänikikunata y awiluykikunataqa ninqäkunata y mandanqäkunata cäsukuyänampaqmi nirqä. Tsëkunata mana cumpliyaptin ima pasanampaq kaqta willayänampaqmi sirwimaqnï willakoqkunata mandarqä.+ Tsë llapanqa, ¿manaku papänikikunachö y awiluykikunachö cumplikashqa?’. Tsëmi pëkunaqa noqaman kutimur niyarqan: ‘Angelkunata mandaq Teyta Jehoväqa, decidinqannömi portakunqantsikmannö y rurënintsikmannö noqantsikwan rurashqa’”.+
7 Gobernaq Darïu+ ishkë watanöna gobernëkaptinmi, sebat* niyanqan onci kaq killa veinticuatru junaq, Teyta Jehoväqa willakoqnin Zacarïasta suëñuyninchö revelarqan. Zacarïasqa Berekïaspa tsurinmi karqan, y Berekïasnam Idöpa tsurin karqan. 8 Zacarïasqa kënömi willakurqan: “Paqaspa punuykarmi puka cawallun montashqa nunata rikarqä. Pëqa zanjachömi mirtu plantakuna rurinchö këkarqan, qepanchönam puka, marron y yuraq cawallukunata rikarqä”.
9 Tsënam, “¿pikunatan pëkunaqa kayan teyta?” nir tapurqä.
Tsënam noqawan parlëkaq angelqa, “kananmi willashqëki pikuna kayanqanta” nimarqan.
10 Tsëpitanam mirtu plantakuna rurinchö këkaq nunaqa nimarqan: “Pëkunaqa kayan entëru patsata rikapakuyänampaq Teyta Jehovä mandamunqan nunakunam”. 11 Tsëpitanam tsë nunakunaqa, mirtu plantakuna rurinchö këkaq Teyta Jehoväpa angelninta “entëru patsatam rikapakayämurqö, llapampis yamë y tranquïlum këkan” niyarqan.+
12 Tsënam angelqa Teyta Jehoväta kënö tapurqan: “Angelkunata mandaq Teyta Jehovä, ¿imëyaqtan Jerusalenchö y Judächö+ nunakunata llakipëkunkitsu?* Pëkunawanqa setenta watapanam cölerashqa këkanki”.+
13 Teyta Jehoväqa, noqawan parlëkaq angeltam shumaq y shoqëllapa contestarqan. 14 Tsënam angelqa nimarqan: “Këta willakuy: ‘Angelkunata mandaq Teyta Jehovämi këta nin: “Jerusalenta y Siontaqa imëkanöpam defendishaq.+ 15 Yamë kawakoq nacionkunawanmi alläpa cölerashqa këkä.+ Sirwimaqnïkunata mana alläpa castiganä këkaptinmi+ tsë nacion nunakunaqa pasëpa* ushakätsiyashqa”’.+
16 Tsëmi Teyta Jehoväqa kënö nin: ‘“Yapëmi Jerusalenpita nunakunata llakipäshaq,*+ tsëchömi wayïta rurashaq.+ Tsënöllam yapë sharkatsishqa kanampaq entëru Jerusalentapis mediyanqa.* Tsënö kanampaq kaqtam angelkunata mandaq noqa Jehovä nikä”’.+
17 Tsënölla këtapis willakuy: ‘Angelkunata mandaq Teyta Jehovämi këta nin: “Markäkunachöqa yapëmi imëka allikuna kanqa, y noqa Jehovämi Sionchö nunakunata yapë shoqashaq,+ y Jerusalenchö nunakunata yapë akrashaq”’”.+
18 Tsëpitanam chusku waqrakunata rikarqä.+ 19 Tsënam noqawan parlëkaq angelta, “¿imatan tsë waqrakunaqa kayan?” nir tapurqä. Tsë angelnam nimarqan: “Tsë waqrakunaqa Judäpita+ y Jerusalenpita+ israelïtakunata+ mëtsëman chätseqkunam kayan”.
20 Tsëpitanam Teyta Jehoväqa, imëka rurëta yachaq chusku nunakunata rikätsimarqan. 21 Tsëmi, “¿pëkunaqa ima ruraqtan shayämushqa?” nir tapurqä.
Pënam nimarqan: “Imëka rurëta yachaq nunakunaqa, waqrankunawan Judäpita nunakunata mëtsëman chätseq nacionkunata mantsakätseq y ushakätseqmi shayämushqa. Tsë waqrakunaqa defendikuyta mana puëdiyanqanyaqmi Judäpita nunakunata mëtsëman chätsiyashqa”.