Mateu
11 Tsëpitanam Jesusqa imata rurayänampaq kaqta döci qateqninkunata yacharatsir, juk markakunaman yachatsikoq y willakoq ëwakurqan.+
2 Bautizakoq Juanqa carcelchö këkarmi Cristu ruranqankunata musyarir+ qateqninkunata mandarqan+ 3 Jesusta kënö tapuyänampaq: “¿Qamku shamoqpaq kaq kanki, o juktaraqku shuyäyänä?”.+ 4 Tsënam Jesusqa kënö nirqan: “Rikëkäyanqëkita y wiyëkäyanqëkita Juanta willaq ëwayë:+ 5 kananqa wiskukunam o qaprakunam rikäyan,+ cöjukunam puriyan, lepra qeshyayoqkunam alliyäyan,*+ sordukunam wiyayan, wanushqakunam kawariyämun y waktsakunam alli noticiakunata wiyëkäyan.+ 6 Kushikutsun noqaman creikunampaq ima michäkoqtapis mana tareq kaq”.+
7 Pëkuna ëwakuykäyaptinnam, Jesusqa Juanpaq parlar tsëchö mëtsika nunakunata kënö nirqan: “¿Imata rikaqtan tsunyaq sitiuman ëwayarqëki?+ ¿Wakman këman vientu kuyutsinqan shoqushta rikaqku?+ 8 Tsëqa, ¿imata rikaqtan ëwayarqëki? ¿Alli röpawan vistishqa nunata rikaqku? ¡Alli röpawan vistikoqkunaqa gobernaqkunapa wayinkunachötaq këkäyan! 9 Rasumpa kaqchöqa, ¿imaqtan yarquyarqëki? ¿Diospa willakoqninta rikaqku? Awmi, tsëtam rikäyarqëki, peru këtam qamkunata nï,* pëqa Diospa wakin willakoqninkunapitapis mejormi.+ 10 Pëpaqmi kënö qellqarëkan: ‘¡Rikë! ¡Willakoqnïtam puntëkita mandamushaq, pëmi qampaq nänita alistar puntëkita ëwanqa!’.+ 11 Noqam qamkunata nï,* manam ni pï nunapis Bautizakoq Juanpita mas alliqa kashqatsu, peru Teyta Diospa Gobiernunchö mana kaqlla kaqmi, pëpita mas alli kanqa.+ 12 Bautizakoq Juanpa tiempumpitam nunakunaqa Teyta Diospa Gobiernunchö kayänampaq kallpachakuykäyan, y alli kallpachakoqkunaqa lograyanmi.+ 13 Diospa Willakoqninkuna Qellqayanqan y Leypis, Juanpa tiempunyaq pasanqankunapaqmi willakuyarqan.+ 14 Y creiyaptiki o mana creiyaptikipis, pëmi ‘shamoqpaq kaq Elïas’.+ 15 Wiyakuyta munaq kaqqa, shumaq wiyakutsun.
16 ¿Pitawanraq kanan witsan nunakunata igualatsïman?+ Rantikuyänan sitiukunachö tëkaq wamrakunanömi kayan, pëkunam pukllaq mayinkunata qayar niyan: 17 ‘Flautata tocayämuptïpis, qamkunaqa manam tushuyarqëkitsu; aya pampakuychönö llakikuypaq cantayämuptïpis, manam llakikuyarqëkitsu’.* 18 Tsënöllam Juanpis mikurtsu ni upurtsu shamushqa, peru nunakunaqa, ‘demoniuyoqmi’ niyanmi. 19 Nunapa Tsurinqa mikun y upunmi,+ peru nunakunaqa ‘kë nunaqa mëtsikatam mikun y vïnuta upyarmi kakun, y impuestuta cobraqkunapa y jutsata* ruraqkunapa amïgunmi’+ niyanmi. Imanö kaptimpis, juk nuna yachëyoq kanqanqa llapan ruranqanchömi rikakun”.+
20 Tsëpitanam, milagrukunata* ruranqan markakunachö mana arrepentikoq nunakunata mana alli këkäyanqanta rikätsir kënö nirqan: 21 “¡Allaw Corazin markapita nunakuna! ¡Allaw Betsaida markapita nunakuna! Qamkunachö rurakanqan milagrukuna Tïruchö y Sidonchö rurakashqa kaptinqa, unënam tsëchö nunakunaqa chukru tëlakunata janankunaman churakur y uchpa jananman jamakur arrepentikuyanman karqan.+ 22 Noqam qamkunata nï,* Juiciu Junaqchöqa Tïruchö y Sidonchö nunakunapitapis mas feyupam castigashqa kayanki.+ 23 Y Capernaum markapita nunakuna,+ ¿qamkunaqa ciëluyaqtsuraq chäyanki? Manam, tsëpa rantinqa, Sepultüramanmi* uräyanki.+ Sitsun qamkunachö rurakanqan milagrukuna* Sodömachö rurakanman karqan, tsëqa kananyaqmi tsë marka këkanman karqan. 24 Noqam qamkunata nï,* Juiciu Junaqchöqa Sodömachö nunakunapitapis mas feyupam castigashqa kayanki”.+
25 Tsë kutim Jesusqa kënö nirqan: “Ciëluta y patsata Gobernaq Teytallä, llapankunapa jananchömi alabaq. Qamqa manam yachaq ni musyaq nunakunatatsu këkunata musyatsirqunki, sinöqa pishi wamranö kaqkunatam.+ 26 Awmi Teytallä, qamqa tsënö kanantam munarqunki”. 27 Y kënöpis nirqanmi: “Teytäqa llapantam cargüman churamushqa.+ Tsuritaqa manam pï nunapis alli reqintsu, sinöqa Teytallam,+ y Teytatapis manam ni pï alli reqintsu, sinöqa Tsurillam, y Tsuri reqitsita munanqan kaqllam.+ 28 Alläpa trabajaqkuna y imëkawan nitipakashqa* këkaqkuna, jamariyänëkipaq noqaman shayämuy. 29 Noqaqa yachanëpaq y humildim* kä.+ Sirwimaqnïkuna kayë* y noqapita yachakuyë. Tsëta rurarqa yamë këtam tariyanki. 30 Yügüqa fäcil apananllam,* y cargäqa manam alläpatsu lasan”.