Levïticu

15 Tsëpitanam Teyta Jehoväqa Moisestawan Aaronta kënö nirqan: 2 “Israelïtakunatam këta niyänëki: ‘Juk nunapa ishpakunampita esquy* yarqamuptinqa, manam Teyta Diospa rikënimpaq limpiutsu kanqa.+ 3 Ishpakunampita esquy* yarqamuptinmi, tsë nunaqa Teyta Diospa rikënimpaq limpiutsu kanqa. Tsënömi kanqa esquy yarqamur mana päraptin o tsapakashqa kaptimpis.

4 Ishpakunampita esquy* yarquywan këkaq ollqu pununqan cämaqa, manam Teyta Diospa rikëninchö limpiutsu kanqa. Tsënöllam imapis jamakunqanqa, Teyta Diospa rikënimpaq limpiutsu kanqa. 5 Pillapis tsë ollqu pununqan cämata yatarqa, röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa.+ 6 Pillapis tsë ollqu jamakunqanman jamakurqa, röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa. 7 Pillapis tsë ollquta yatarqa, röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa. 8 Ishpakunampita esquy* yarquywan këkaq ollqu, Teyta Diospa rikënimpaq limpiu nunata toqapuptinqa, tsë limpiu nunaqa röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa. 9 Ishpakunampita esquy* yarquywan këkaq ollqu utilizanqan montüraqa, manam Teyta Diospa rikënimpaq limpiutsu kanqa. 10 Y pillapis tsë ollqu jamanqanta yatarqa, tardiyanqanyaqmi Teyta Diospa rikënimpaq limpiutsu kanqa. Tsënöllam tsë ollqu topanqan kaqkunata apaqqa, röpanta taqshanan y bañakunan, y tardiyanqanyaqmi Teyta Diospa rikënimpaq limpiutsu kanqa. 11 Ishpakunampita esquy* yarquywan këkaq ollqu,+ manaraq makinta yakuwan awikur* pitapis yataptinqa, yatanqan nunaqa röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa. 12 Ishpakunampita esquy* yarquywan këkaq ollqu, mitupita imatapis rurayanqanta yataptinqa, pakirmi ushakätsiyänëki, peru qerupita imatapis rurayanqanta yataptinqa, yakuwanmi alli awiyänëki.*+

13 Ishpakunampita esquy* yarquywan kanqampita tsë nuna alliyanqampita qanchis junaq pasariptinmi, Teyta Diospa rikënimpaq limpiu kanampaq röpanta taqshanan, y pukyu yakuwanmi bañakunan.+ 14 Puwaq kaq junaqnam, ishkë kullkushta o ishkë llullu palumata+ Diospa carpa* wayimpa puntanman apamur Teyta Jehoväpa rikëninchö sacerdötita entreganan. 15 Juk kaqqa jutsampita* perdonashqa kanampaq qarëpaqmi kanqa, y juknin kaqnam ushakanqanyaq rupatsina qarëpaq kanqa. Y Teyta Jehoväpa rikëninchö sacerdöti tsëkunata rupatsiptinmi, tsë nunaqa ishpakunampita esquy* yarquywan kanqampita Teyta Diospa rikënimpaq limpiuna kanqa.

16 Juk ollqupa ishpakunampita lichin yarqamuptinqa, bañakunanmi, y tardiyanqanyaqmi Teyta Diospa rikënimpaq limpiutsu kanqa.+ 17 Y tsë lichin röpata o imapis qarapita rurayanqanta pichuptinqa, lichin pichunqantam taqshanan, y tardiyanqanyaqmi Teyta Diospa rikënimpaq limpiutsu kanqa.

18 Juk ollqu warmiwan këkaptin ishpakunampita lichin yarqamuptinqa, ishkanmi bañakuyänan, y tardiyanqanyaqmi Teyta Diospa rikënimpaq limpiutsu kayanqa.+

19 Juk warmi killanwan karninqa, qanchis junaqpam Teyta Diospa rikënimpaq limpiutsu kanqa.+ Y pillapis tsë warmita yatarqa, tardiyanqanyaqmi Teyta Diospa rikënimpaq limpiutsu kanqa.+ 20 Juk warmi killanwan këkar, pununampaq qopikunqan y imapis jamakunqanqa, manam Teyta Diospa rikënimpaq limpiutsu kanqa.+ 21 Tsë warmipa cämanta yataqqa, röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa. 22 Tsë warmi imachöpis jamakunqanta yataqqa, röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa. 23 Pillapis tsë warmipa cämanta o imachöpis jamakunqanta yatarqa, tardiyanqanyaqmi Teyta Diospa rikënimpaq limpiutsu kanqa.+ 24 Juk ollqu tsë warmiwan punuykaptin, yawarnin jananman shutuptinqa,+ tsë ollquqa qanchis junaqpam Teyta Diospa rikënimpaq limpiutsu kanqa. Y tsë ollqu pununqan cämapis, manam Teyta Diospa rikënimpaq limpiutsu kanqa.

25 Mana killanwan këkaptin warmipa yawarnin atska junaqpa shamuptin,+ o killanwan kanqampita mas junaqkunapa yawarnin shamuptinqa,+ killanwan kaptin pasanqannöllam, yawarnin päranqanyaq Teyta Diospa rikënimpaq limpiutsu kanqa. 26 Tsënö këkarnin pununqan cäma o imapis jamakunqanqa, killanwan kaptin pasanqannöllam Teyta Diospa rikënimpaq limpiutsu kanqa.+ 27 Y pillapis tsëkunata yatarqa, röpantam taqshanan y bañakunanmi, y tardiyanqanyaqmi Teyta Diospa rikënimpaq limpiutsu kanqa.+

28 Yawarnin päranqampita qanchis junaq pasariptinmi, tsë warmiqa Teyta Diospa rikënimpaq limpiuna kanqa.+ 29 Puwaq kaq junaqnam, ishkë kullkushta o ishkë llullu palumata+ carpa* wayipa puntanman apamur sacerdötita entreganan.+ 30 Juk kaqqa jutsampita* perdonashqa kanampaq qarëmi kanqa, y juknin kaqnam ushakanqanyaq rupatsina qarëpaq kanqa. Teyta Jehoväpa rikëninchö sacerdöti tsëkunata rupatsiptinmi, tsë warmiqa yawarnin shamunqampita Teyta Diospa rikënimpaq limpiuna kanqa.+

31 Tsënömi israelïtakunata yanapayanki rikënïpaq limpiu kayänampaq, y tsënöpa pëkunapa chowpinchö* këkaq sagrädu carpäta* limpiuta katsiyänampaq,+ y mana wanuyänampaq o wañuyänampaq.

32 Kë mandakunqänömi rurayänëki, juk nunapa ishpakunampita esquy* o lichin yarqamuptin,+ 33 juk warmi killanwan kaptin o yawar ëwëwan qeshyaptin,+ y rikënïchö mana limpiu këkaq warmiwan juk ollqu oqllanakuptin’”.+